ઓસ્ટ્રેલિયામાં આજથી શરૂ થયેલી ત્રણ વનડેની પ્રથમ મેચમાં ટીમ ઇન્ડિયાનો 34 રને પરાજય થયો છે. ઓસ્ટ્રેલિયાએ ટોસ જીતીને પહેલા બેટિંગ કરીને 50 ઓવરમાં 5 વિકેટે 288 રન કર્યા હતા. 289 રનના ટાર્ગેટ પૂરો કરવા માટે આવેલી ટીમ ઇન્ડિયા 50 ઓવરમાં 254 રન જ બનાવી શકી હતી. આ જીતની સાથે ઓસ્ટ્રેલિયાએ 3 મેચની સીરિઝમાં 1-0થી આગળ છે.
ટોસ જીતીને બેટિંગ કરવા માટે આવેલી ઓસ્ટ્રેલિયાએ શરૂઆતમાં જ બે વિકેટ ગુમાવી જે પછી ક્રિઝ પર ઉસ્માન ખ્વાજા અને શોન માર્શે બાજી સંભાળી અને 92 રનની પાર્ટનરશિપ કરી. પરંતુ રવિન્દ્ર જાડેજાએ 59 રનના સ્કોરે ઉસ્માન ખ્વાજાને આઉટ કરી દીધો હતો.શોન માર્સ પણ 54 રન બનાવી કુલદીપનો શિકાર બન્યો હતો. ઓસ્ટ્રેલિયા માટે સૌથી વધારે પીટર હેન્ડસકોમ્બે 73 રનની ઇનિંગ રમી હતી. જ્યારે ઓલરાઉન્ડર માર્કસ સ્ટોઇનિસ 47 રન કર્યા હતા. ટીમ ઇન્ડિયા તરફથી ભુવનેશ્વર કુમારે અને કુલદીપ યાદવે 2-2 વિકેટો ઝડપી જ્યારે રવિન્દ્ર જાડેજા 1ને વિકેટ મળી. મોહમ્મસ શમીએ પણ સારી 10 ઓવરમાં 46 રન આપ્યા હતા. પરંતુ તેને કોઇ સફળતા ના મળી.જ્યારે ખલિલ ઈબ્રાહિમે 8 ઓવરમાં 55 રન આપ્યા હતા.
ટીમ ઇન્ડિયાની શરૂઆત જ બેકાર થઇ હતી. ટીમે માત્ર 4 રનમાં 3 વિકેટ ગુમાવી દીધી હતી. ઓપનર શિખર ધવન અને અંબાતી રાયડુ ખાતુ પણ નહોતા ખોલી શક્યા. જ્યારે કેપ્ટન વિરાટ કોહલીએ માત્ર 3 જ રન કર્યા હતા. રોહિત શર્મા અને મહેન્દ્ર સિંહ ધોનીએ ઇનિંગ સંભાળીને ટીમ ઇન્ડિયાનો સ્કોર 100 સુધી પહોંચાડ્યો હતો. બંનેએ ચોથી વિકેટ માટે 137 રનની પાર્ટનરશિપ કરી હતી. ધોની 51 રન બનાવીને આઉટ થયો જ્યારે ટીમ ઇન્ડિયાની તરફથી રોહિત શર્મા એ 133 રન કર્યા પરંતુ તે પણ 46મી ઓવરમાં આઉટ થઇ ગયો હતો. કાર્તિક અને જાડેજા પણ બેટિંગમાં કંઇ ખાસ ના કરી શક્યા. ભુવનેશ્વર કુમારે થોડી મહેનત કરીને ગતિ વધારવાનો પ્રયાસ કર્યો તેણે 23 બોલમાં 29 રન કર્યા હતા. ઓસ્ટ્રેલિયાની તરફથી બૉલર જ્યે રિચાર્ડસે સૌથી સારી બૉલિંગ કરીને 4 વિકેટ ઝડપી. જ્યારે જેસન બેહરેનડોફ અને સ્ટોઇનિસે 2-2 વિકેટો લીધી અને પીટર સિડલે 1 વિકેટ ઝડપી હતી.
ઉલ્લેખનીય છે કે મહિલા વિરોધ ટિપ્પણીને કારણે હાર્દિક પંડ્યા અને કેએલ રાહુલને સીરિઝમાંથી સસ્પેન્ડ કરવામાં આવ્યા છે જેના કારણે તેઓ કોઇ મેચમાં નથી. પંડ્યાની ગેરહાજરીમાં ટીમ ઇન્ડિયાએ બે સ્પીનર્સ કુલદીપ યાદવ અને રવિન્દ્ર જાડેજા અને 3 ઝડપી બોલરના કોમ્બિનેશન સાથે ગ્રાઉન્ડમાં ઉતારી છે.