T20 વર્લ્ડકપ 2021ના પોતાના ત્રીજા મુકાબલામાં આજે ટીમ ઇન્ડિયાનો ભવ્ય વિજય થયો છે. ભારતે અફઘાનિસ્તાનને 66 રનથી હરાવ્યું છે.
T20 વર્લ્ડ કપમાં ભારતને મળી પ્રથમ જીત
અફઘાનિસ્તાન 20 ઓવરમાં માત્ર 144 રન બનાવી શક્યું
ભારતે દમદાર બેટિંગ કરતા અફઘાનિસ્તાન 211 રનનો લક્ષ્યાંક આપ્યો હતો
T20 વર્લ્ડકપમાં ભારતીય ટીમનો મુકાબલો અફઘાનિસ્તાનની ટીમ સાથે હતો. જેમાં ભારત વિરૂદ્ધ અફઘાનિસ્તાને ટૉસ જીતીને પહેલા બોલિંગ કરવાનો નિર્ણય લીધો હતો. ભારતે પહેલા બેટિંગ કરતા 210 રન બનાવીને અફઘાનિસ્તાનને 211 રનનો લક્ષ્યાંક આપ્યો હતો. ત્યારે હવે ભારતીય ટીમે ટી-20 વર્લ્ડ કપના ત્રીજા સુપર 12 મુકાબલામાં અફઘાનિસ્તાન ટીમને સજ્જડ હાર આપી છે. આજની ભારત અને અફઘાનિસ્તાન વચ્ચે મહત્વની મેચ હતી. જેમાં જીત મેળવીને ભારતને સેમિફાઇનલમાં પ્રવેશની આશા જીવંત રાખી છે.
અફઘાનિસ્તાન સામે ભારતની મોટા માર્જિનથી જીત બાદ વર્લ્ડ કપમાં હજુ સેમિફાઇનલની આશા જીવંત રહી છે. ભારત સેમીફાઈનલમાં કેવી રીતે પહોંચી શકે તેની વાત કરીએ તો હવે આગામી બે મેચો નામિબિયા અને સ્કોટલેન્ડ સામે છે. આ બંને મેચોમાં જો ભારત મોટા સ્કોર કરીને આ જ રીતે મોટા માર્જિનથી જીત મેળવે તો નેટ રનરેટ ભારતની સારી બની શકે છે. આવામાં જો અફઘાનિસ્તાન તેની આગામી મેચો મોટા રન રેટથી ન જીતે તો ભારત માટે સેમીમાં પહોચવું હજુ પણ સરળ થઈ જશે.
રોહિત-રાહુલ અને પંત-પંડ્યાની જોરદાર ઇનિંગે અપાવી જીત
ભારતના 210 રનના જવાબમાં અફઘાનિસ્તાન 7 વિકેટે 144 રન કરી શક્યું હતું. ટોસ જીતીને અફઘાનિસ્તાને ભારતને બેટિંગ માટે આમંત્રણ આપ્યું હતું. ભારતે ન્યુઝીલેન્ડ સામેની પોતાની શરમજનક રમતનો બદલો લેતું હોય તેમ ઓપનર રોહિત-રાહુલે ધુંઆધાર શરૂઆત કરી હતી. બાદમાં હાર્દિક પંડ્યા ઋષભ પંતે ભારતીય ટીમનો સ્કોર 210 પર પહોચાડી દીધો હતો. ભારત ભલે આ મુકાબલો જીતી ગયું હોય પરંતુ હજુ ભારતે ઘણી ગણતરીઓ પછી પોતાનું સ્થાન ક્યાં છે તેનો ખ્યાલ આવશે. પોઈન્ટ ટેબલ અને આંકડાકીય સમીકરણો ભારતની ગણતરી માંડશે.
ભારત તરફથી મોહમ્મદ શમીને 3 અને ચાર વર્ષ પછી T-20 રમી રહેલા રવિચંદ્રન અશ્વિને 2 વિકેટ ઝડપી હતી.જાડેજાને 1 અને બુમરાહને 1 વિકેટ મળી હતી. અફઘાનિસ્તાન તરફથી મોહમ્મદ નાબીએ 35 અને કરીમ જનતે 34 રન કર્યા હતા.