ભારત અને અમેરિકા બંને દેશો 8 વર્ષ બાદ આંતરિક સુરક્ષા ડાયલોગ શરૂ કરવા માટે રાજી થઈ ગયા છે.
ભારત-અમેરિકાનો મોટો નિર્ણય
ફરી શરૂ થશે આંતરિક મુદ્દા પર ડાયલોગ
ડોનાલ્ડ ટ્રમ્પે કરાવ્યું હતું બંધ
ભારત અને અમેરિકા બંને દેશો 8 વર્ષ બાદ આંતરિક સુરક્ષા ડાયલોગ શરૂ કરવા માટે રાજી થઈ ગયા છે. આ ડાયલોગમાં ઘણા બધા આંતરિક મુદ્દા પર ચર્ચા કરવામાં આવશે અને તેમાં સમાધાન કરી રીતે આવે તેના પર ચર્ચા કરવામાં આવશે. અમેરિકાના ઓબામાએ આ પ્રકારના ડાયલોગની શરૂઆત કરાવી હતી.
આંતરિક સુરક્ષા સંવાદ ફરીથી શરૂ
ભારત અને અમેરિકા વચ્ચે ફરીવાર આંતરિક સુરક્ષા ડાયલોગ શરૂ થવા જઈ રહ્યો છે. બંને દેશો વચ્ચે ફરીથી આ કામ માટે સહમતી બની ગઈ છે અને રાષ્ટ્રપતિ જૉ બાયડનની સરકાર દ્વારા કહેવામાં આવ્યું છે કે ભારત સાથે આંતરિક સુરક્ષા સંવાદ ફરીથી શરૂ કરવામાં આવી રહ્યો છે. આ ડાયલોગની મદદથી સાયબર સિક્યુરિટી, આતંકવાદ અને ટેકનોલોજીના મુદ્દા પર ચર્ચા કરવામાં આવશે.
ટ્રમ્પે બંધ કરાવ્યું હતું
નોંધનીય છે કે અમેરિકાના પૂર્વ રાષ્ટ્રપતિ ડોનાલ્ડ ટ્રમ્પના કાર્યકાળ દરમિયાન આ સંવાદને બંધ કરી દેવામાં આવ્યો હતો. અમેરિકા તરફથી ફરીવાર સંવાદ શરૂ કરવાને લઈને જાહેરાત કરવામાં આવી છે. એક દિવસ પહેલા જ અમેરિકાના આંતરિક મામલાના સુરક્ષા મંત્રી મયોરકસ અને અમેરિકામાં ભારતના રાજદૂત તરનજીત સિંહ વચ્ચે વાતચીત કરવામાં આવી હતી. નોંધનીય છે કે ભારત અને અમેરિકા બંને દેશો દ્વારા ક્વોડ સહિત અન્ય ભાગીદારી પર જોર આપવામાં આવ્યું છે. મયોરકસ અને સંધૂ વચ્ચે વિદ્યાર્થીઓ અને ઉદ્યમીઓના યોગદાન પર પણ ચર્ચા કરવામાં આવી હતી જેનાથી દેશ મજબૂત બન્યો છે.
ઓબામાએ શરૂ કરાવી હતી
નોંધનીય છે કે વર્ષ 2011માં પહેલીવાર ઓબામાના કાર્યકાળ દરમિયાન આ પ્રકારનો સંવાદ શરૂ કરવામાં આવ્યો હતો. તે બાદ બીજી વાર ભારત અમેરિકા આંતરિક સુરક્ષા સંવાદ વર્ષ 2013માં વોશિંગ્ટનમાં કરવામાં આવ્યું હતું.