ભારત સરકારે હવે ચીનને સીધું દોર કરવાની કાર્યવાહી શરૂ કરી દીધી છે. તાજેતરમાં ભારત સરકારે ટિકટોક, યુસી બ્રાઉઝર્સ જેવી પ૯ ચીની એપ પર પ્રતિબંધ મૂકી દીધો છે. ટિકટોક વાસ્તવમાં એક રાજકીય શસ્ત્ર જ છે. તેની તાકાત અમેરિકામાં ર૦ જૂને જોવા મળી હતી. જ્યારે અમેરિકાના યુવાનોએ ટિકટોક દ્વારા ડોનાલ્ડ ટ્રમ્પની પ્રથમ રેલીને ફલોપ કરાવી હતી. વાસ્તવમાં ટિકટોકને એક સોશિયલ કોમ્યુનિટી એપ્લિકેશન તરીકે જોવામાં આવે છે, પરંતુ વાસ્તવિકતા એ છે કે ટિકટોક એક જાસૂસી એપ્લિકેશન સ્પાયવેર છે. થોડા સમય પહેલાં જ એવા સમાચાર આવ્યા હતા કે ટિકટોકે ભારતીય આઇફોન યુઝર્સની જાસૂસી કરી હતી.
ચીનને સીધું દોર કરવા ભારતે કમર કસી
ચીન ભારત પર કરી શકે છે સાયબર અટેક
ભારતે સાયબર આર્મી તૈયાર કરવી પડશે
સરકારે અત્યારે જેના પર રોક લગાવી છે તે મોટા ભાગે સોશિયલ મીડિયા કોમોડિટી પ્લેટફોર્મ અથવા વીડિયો પ્લેટફોર્મ છે, પરંતુ સરકારે એ યાદ રાખવું જોઇએ કે ટિકટોક જેવી એપ્લિકેશન પર પ્રતિબંધ મૂકવાથી વાત નહીં બને. ચીન હવે ખતરનાક હવે આગળ વધી રહ્યું છે અને ચીન તરફથી અનેક મોરચે ખતરો છે.
ભારતીય સાયબર સ્પેસમાં 40,000થી વધુ વખત હુમલો કરવાની થઇ કોશિશ
ચીનનો પ્લાન મોટા પાયે ભારત વિરુદ્ધ સાયબર યુદ્ધ છેડવાનો છે.ચીને આમ તો ભારત વિરુદ્ધ સાયબર યુદ્ધ છેડવાની શરૂઆત કરી દીધી છે. થોડા દિવસ અગાઉ ચીની હેકરોએ ભારતીય સાયબર સ્પેસમાં 40,000થી વધુ વખત હુમલો કરવાની કોશિશ કરી હતી. આમાના મોટા ભાગના હુમલા ચીનના ચેંગડુ પ્રદેશમાંથી કરવામાં આવ્યા હતા.
ચીની સૈન્યનું સાયબર આર્મી હેડકવાર્ટર આવેલું છે
ચેંગડુ સિંચુવાન પ્રદેશની રાજધાની છે અને ત્યાં ચીની સૈન્યનું સાયબર આર્મી હેડકવાર્ટર આવેલું છે. અલબત્ત ચીની હેકરોને તેમના પ્રયાસોમાં સફળતા મળી ન હતી, પરંતુ હવે સાયબર હુમલાને લઇને ભારતના ઇન્ટરનેટ યુઝર્સને સતર્ક રહેવાની જરૂર છે. ચીનના સૈન્યની બીજા નંબરની સૌથી મોટી તાકાત તેની સાયબર આર્મી છે. ચીનની સેના મોરચા પર માત્ર દુશ્મન સાથે લડતી જ નથી, પરંતુ બીજા દેશની સુરક્ષા ટેકનિકમાં ગાબડાં પાડવા માટે તેની પાસે હેકરોની એક મોટી ફોજ છે. આ લોકો જાસૂસી કરવા ઉપરાંત સુરક્ષાને તોડવાનું પણ કામ કરે છે.
ચીન અમેરિકાની પણ કરી રહ્યું છે જાસૂસી
સુરક્ષા બાબતોના નિષ્ણાત અને સેન્ટર ફોર ચાઇના એનાલિસીસ એન્ડ સ્ટ્રેટેજીના પ્રમુખ જયદેવ રાનડેનું માનવું છે કે ચીન સાયબર એટેક કરી શકે છે. તેમના મત મુજબ ત્રણ તબક્કામાં ચીન સાયબર હુમલો કરી શકે છે. પ્રથમ તબક્કામાં ચીન મિલિટરીમાં કમાન્ડ એન્ડ કંટ્રોલ સિસ્ટમને તબાહ કરવા માટે મિલિટરીને લિંક કરતા નેટવર્કમાં ગાબડાં પાડી શકે છે. બીજા તબક્કામાં ચીન નાગરિક નેટવર્કને તબાહ કરવા માટે વીજળી, રેલવે, હોસ્પિટલ વગેરે નેટવર્કને નિશાન બનાવી શકે છે અને ત્રીજા તબક્કામાં ચીન ફાઇનાન્શિયલ સંસ્થાઓના નેટવર્કને નિશાન બનાવીને સાયબર હુમલો કરી શકે છે. ચીન માત્ર ભારત જ નહીં, પરંતુ અમેરિકાની પણ સાયબર જાસૂસી કરી રહ્યું છે.
રાનડેએ કર્યો ખુલાસો
રાનડેના જણાવ્યા અનુસાર ભારતે પણ સાયબર હુમલા સામે કામ લેવા ક્ષમતા તૈયાર કરી લીધી છે, પરંતુ તેમાં આપણે થોડો વિલંબ કર્યો છે. જ્યાં સુધી આપણે કોમ્પ્યૂટર કે સાયબર હાર્ડવેર જાતે તૈયાર નહીં કરીએ ત્યાં સુધી ખતરો રહેશે. જયાં સુધી આપણે ચીન પાસેથી રાઉટર, ચિપ વગેરે ખરીદતા રહીશું ત્યાં સુધી આપણે તેમને કિલ સ્વિચ આપતા રહીશું. આ માટે ચીનની કંપનીઓને 5-જી નેટવર્કમાં સામેલ કરવી જોઇએ નહીં અને બીજી બાજુ આપણે દેશમાં મોબાઇલનું ઉત્પાદન શરૂ કરી દેવું જોઇએ અને ટેલિ કોમ્યુનિકેશન નેટવર્કમાં પણ આપણે આત્મનિર્ભર બનવું જોઇએ. તોજ આપણે ચીનના સાયબર હુમલાને નિષ્ફળ બનાવી શકીશું.
ભારતે સાયબર આર્મી તૈયાર કરવી પડશે
આ માટે ભારતે પણ ચીનની ટક્કર લેવા સાયબર આર્મી તૈયાર કરવી પડશે. જેમ ચીનમાં સાયબર આર્મીને મહત્ત્વ આપવામાં આવે છે એ રીતે આપણે પણ સાયબર ટીમને પ્રાથમિકતા આપવી પડશે. ચીનમાં જે રીતે હેકરો અલગ અલગ હજારો સર્વર પર કામ કરે છે એ રીતે ભારતે પણ વળતો હુમલો કરવા હેકરોની ફોજ ઊભી કરવી પડશે કે જેથી ચીનના હુમલા સામે આપણે આપણા તમામ નેટવર્કને બચાવી શકીએ.