રિપોર્ટ / સ્ત્રીઓને સમાનતા આપનારા દેશોમાં ભારતનો ક્રમ અધધધ.. નીચો, આર્થિક સ્થિતિમાં પણ તળિયે

• વર્લ્ડ ઇકોનોમિક ફોરમની રિપોર્ટમાં જેન્ડર ગેપ ઇન્ડેક્ષ મામલે ભારતનું સ્થાન કથળ્યું
• ભારત ગત વર્ષથી ચાર સ્થાન પાછળ 108થી 112માં નંબર પર પહોંચ્યું
• ભારતમાં સ્થિતિ બાંગ્લાદેશ, નેપાળ અને શ્રીલંકાથી પણ ખરાબ

મહત્વપૂર્ણ બાબત છે કે, બાંગ્લાદેશે લગ્ઝમબર્ગ, અમેરિકા અને સિંગાપુરથી પણ સારુ પ્રદર્શન કર્યું છે. દક્ષિણ એશિયાઇ દેશોમાં માત્ર માલદીવ અને પાકિસ્તાન ક્રમશ: 123માં અને 151માં સ્થાને રહેતા ભારતથી પાછળ છે. વિવિધ માપદંડોને આધારે જાહેર કરાયેલ આ રિપોર્ટ કહે છે કે દક્ષિણ એશિયાને જેન્ડર ગેપનું લક્ષ્ય હાંસલ કરવામાં હજુ 71 વર્ષ લાગશે. આ રિપોર્ટ મુજબ, આઇસલેન્ડ હાલ દુનિયમાં જેન્ડર ન્યુટ્રાલિટી મામલામાં સૌથી ઉપર છે. 

જેન્ડર ગેપના મામલામાં ભારત 112માં સ્થાન પર આવી ગયું છે. વર્લ્ડ ઇકોનોમિક ફોરમની રિપોર્ટ અનુસાર સ્વાસ્થ્ય અને આર્થિક મોરચે ભારતની સ્થિતિ ખરાબ છે. વાર્ષિક સર્વેથી જાણવા મળે છે કે, જેન્ડર ગેપના મામલામાં ભારત 4 સ્થાન નીચે પછડાયું છે. મહિલા સ્વાસ્થ્ય અને તેમની આજીવિકા મામલામાં પણ ભારતની સ્થિતિ પહેલા કરતા ખરાબ થઇ છે. 

વૈશ્વિક સ્તર પર રેગ્યુલર નોકરીઓના મામલામાં દર ત્રણ પુરુષે બે મહિલાઓની સરેરાશ છે જ્યારે ભારતમાં આ આંકડો દર ત્રણ પુરુષે એક મહિલાનો છે. ભારતમાં માત્ર એચઆર (HR) એવું એક ક્ષેત્ર છે, જ્યાં પુરુષોની તુલનામાં મહિલાઓ વધારે છે.  

જીનેવા ખાતેની આંતરરાષ્ટ્રીય સંગઠન ડબલ્યુઇએફે કહ્યું કે, પુરુષો અને મહિલાઓ વચ્ચે રાજનીતિ અસમાનતા ખતમ થવામાં હજુ લગભગ 95 વર્ષ લાગશે. ગત વર્ષ કહેવામાં આવી રહ્યું હતું કે, તેમા 107 વર્ષ લાગી શકે છે. WEF મુજબ, દુનિયાની વિવિધ સંસદોમાં નીચલા ગૃહમાં મહિલાઓની હવે કુલ ભાગીદારી 25.2 ટકા થઇ ગઇ છે. જે ગત વર્ષે 24.1 ટકા હતી.