ગુજરાતમાં પડેલા સાર્વત્રિક વરસાદ બાદ હવે રાજ્યભરમાં નવી ઉપાધિઓ સામે આવી રહી છે. જેમ કે રાજ્યના ઘણા જિલ્લાઓના ખેતરોમાં પાણી ભરાયાં છે, ત્યારે શહેરોની વાત કરીએ તો મુખ્ય માર્ગો પર ઠેર-ઠેર ખાડાઓ જોવા મળી રહ્યાં છે. સુરત શહેરમાં વરસાદે વિરામ લીધા બાદ ઠેર-ઠેર ખાડાઓના કારણે પ્રિમોન્સુન કામગીરીના ધજાગરા ઉડયા છે.
વરસાદે વિરામ લીધા બાદ સૂરતવાસીઓ માટે નવી ઉપાધિ સામે આવી છે. જેમાં શહેરના મુખ્ય માર્ગો પર ઠેર-ઠેર ખાડાઓ પડ્યાં છે. સહારા દરવાજા પાસે જર્જરિત માર્ગથી વાહન ચાલકો પરેશાન જોવા મળ્યાં છે.
જ્યારે કડોદરા તરફ જતા સ્ટેટ હાઇવે પર પણ ખાડાઓ પડ્યાં છે. રસ્તા રિપેરની કામગીરીમાં પાલિકા નિષ્ફળ નીવડી છે. શહેરના ખાડાઓના કારણે પ્રિમોન્સુન કામગીરીના ધજાગરા ઉડ્યાં છે. શહેરમાં બિસ્માર રસ્તાઓથી વાહન ચાલકોની મુશ્કેલી વધી છે.
ભારતના બીજા નંબરના સ્વચ્છ શહેરની હાલત બદસૂરત
ભારતના બીજા નંબરના સ્વચ્છ શહેર એવા સુરતના રસ્તા બદસૂરત બન્યા છે. જી હા, આમ તો દેશનું બીજા નંબરનું સ્વચ્છ શહેર સુરત છે પરંતુ સુરતના રસ્તા પર ખાડા જ ખાડા જોવા મળી રહ્યાં છે. 10 દિવસના વરસાદમાં રસ્તાનું ધોવાણ થઇ ગયું છે. ખાડા અને ખાડામાં ભરેલા ગંદા પાણીથી સુરત શહેરની બદસૂરત તસવીર સામે આવી છે.
સ્વચ્છ શહેર સુરતના રસ્તાઓની હાલત બિસ્માર જોવા મળી છે. શહેરના મેયર ડો. જગદિશ પટેલના વોર્ડમાં જ તૂટેલા રોડથી લોકો પરેશાન થયા છે. તૂટેલા રસ્તા બાબતે અનેક ફરિયાદ છતાં રીપેરિંગ થયું નથી. શહેરના કતારગામ દરવાજા વિસ્તારમાં રોડની બિસ્માર હાલત જોવા મળી છે.