GDP / નવા વર્ષમાં પણ મોદી સરકાર માટે આર્થિક ક્ષેત્રે ખરાબ સમાચાર, 11 વર્ષમાં સૌથી ઓછા GDPનું અનુમાન

• અર્થવ્યવસ્થામાં ચાલી રહેલી મંદીથી હાલ કોઇ રાહત નહીં
• વર્ષ 2019-20માં જીડીપી (GDP) વિકાસ દર 5 ટકા રહેવાનું અનુમાન
• ઉત્પાદન ક્ષેત્રનો વૃદ્ધિદર ઘટીને 2 ટકા પર આવવાનું અનુમાન

ગત નાણાકીય વર્ષ 2018-19માં આર્થિક વૃદ્ધિ દર 6.8 ટકા રહ્યો હતો. આંકડા અને કાર્યક્રમ અમલીકરણ મંત્રાલય (CSO) એ મંગળવારે રાષ્ટ્રીય આવકનું પહેલું અગ્રિમ અનુમાન જાહેર કર્યું. તેમા કહેવામાં આવ્યું છે કે, આર્થિક વૃદ્ધિદરમાં ઘટાડાનું મુખ્ય કારણ ઉત્પાદન ક્ષેત્રમાં ઘટાડો છે. જીડીપી (GDP) આકારણીના આંકડા એવા સમયે જાહેર કરવામાં આવ્યા છે, જ્યારે ભારતીય અર્થવ્યવસ્થામાં ભારે મંદી દેખાઈ રહી છે. જીડીપીના અનુમાનને લઇને નીતિ નિયંત્રક પણ હેરાન છે. જીડીપીમાં આ ઘટાડો 11 વર્ષના સૌથી નીચલા સ્તરે છે. 

ઉત્પાદનનો વૃદ્ધિદરમાં પણ ઘટાડો

ચાલૂ નાણાકીય વર્ષમાં ઉત્પાદન ક્ષેત્રનો વૃદ્ધિદર ઘટીને 2 ટકા પર આવવાનું અનુમાન છે. આ પહેલા ગત નાણાકીય વર્ષમાં તે 6.2 ટકા રહ્યો હતો. અનુમાન અનુસાર ખેતી, નિર્માણ અને વીજળી, ગેસ અને જળ આપૂર્તિ જેવા ક્ષેત્રોનો વૃદ્ધિદર પણ નીચે આવશે. જ્યારે ખાણ, જાહેર વહીવટ અને રક્ષા જેવા ક્ષેત્રોનો વૃદ્ધિદરમાં સામાન્ય સુધારાનું અનુમાન છે. 

ભારતીય રિઝર્વ બેન્ક (RBI) એ વિકાસ દર ઘટાડ્યો 

જૂન અને સપ્ટેમ્બર ત્રિમાસીક ગાળામાં ભારતીય અર્થવ્યવસ્થા ક્રમશ: 5 ટકા અને 4.5 ટકાના દરે આગળ વધી રહી છે. જીડીપી (GDP) વિકાસ દરના આંકડાઓમાં સતત આવી રહેલા ઘટાડાથી ભારતીય રિઝર્વ બેન્ક (RBI)ને 2019-20ના વિકાસ દર અનુમાનને 7.4 ટકાથી ઘટાડીને 5 ટકા કર્યો હતો. 

કેન્દ્ર સરકાર આવનાર 1 ફેબ્રુઆરીએ સામાન્ય બજેટ રજૂ કરશે. નાણાકીય વર્ષ 2019-20ના વિકાસ દરનું બીજુ અનુમાન બજેટ બાદ જાહેર કરવામાં આવશે. 

નોંધનીય છે કે, ભારતીય અર્થવ્યવસ્થાની હાલત ધીરે-ધીરે કથળતી જઇ રહી છે. બીજા ત્રિમાસિક (જુલાઇ-સપ્ટેમ્બર) માં વિકાસ દર ઘટીને 4.5 ટકા પર પહોંચી ગયો. ત્રીજા ત્રિમાસિક ગાળામાં (ઓક્ટોબર-ડિસેમ્બર)ને લઇને જાપાનની નાણાકીય સેવા આપનાર કંપની નોમુરાનું માનવું છે કે, વિકાસની ઝડપ વધુ ધીમી પડશે અને તે ઘટીને 4.3 ટકા પર પહોંચી શકે છે.