ભૂમિકા શર્માએ 21 વર્ષની ઉંમરે ગત જૂનમાં વેનિસ ખાતે મિસ વર્લ્ડ બોડી બિલ્ડરનો ખિતાબ પોતાના નામે કરીને ભારતનું નામ દુનિયામાં રોશન કર્યું હતું. ભૂમિકા ભારતની પહેલી મિસ બોડી બિલ્ડર છે.
આ બોડી બિલ્ડર દહેરાદૂનની છે. ભારતની પહેલી મિસ વર્લ્ડ બનીને તેણે દેશનું ગૌરવ વધારવાની સાથે સાથે એ સાબિત કરી દીધું કે છોકરીઓ પણ કોઈથી કમ નથી. ઉલ્લેખનીય છે કે 50 દેશોમાંથી આવેલી મહિલા બોડી બિલ્ડરોને પછાડી ભૂમિકાએ સૌથી વધુ પોઇન્ટ હાંસલ કરીને ખિતાબ પોતાના નામે કર્યો હતો. ભૂમિકા સહિત ભારતમાંથી 27 સ્પર્ધકો એ ઇવેન્ટમાં ભાગ લેવા પહોંચ્યા હતા.
ભૂમિકાએ એ ઇવેન્ટની ત્રણ કેટેગરીમાં સૌથી વધુ પોઇન્ટ મેળવ્યા, જેમાં ઇન્ડિવિઝ્યુઅલ પોસિંગ, બોડી પોસિંગ અને ફોલ સામેલ હતા. ભૂમિકાની માતા હંસા શર્મા ભારતીય મહિલા વેઇટલિફ્ટિંગનાં કોચ છે.
ભૂમિકાના જણાવ્યા અનુસાર, ''આ ફિલ્ડમાં આવવું આસાન વાત નહોતી. મારાં માતાપિતા નહોતાં ઇચ્છતાં કે હું બોડી બિલ્ડર બનું. હું મારાં માતાપિતાની એકમાત્ર સંતાન છું તેથી માતાપિતાને બોડી બિલ્ડિંગમાં કરિયર બનાવવા રાજી કરવા માટે મને બહુ જ મુશ્કેલી પડી હતી. મારો વિચાર તો શૂટર બનવાનો હતો, પરંતુ જિમમાં ટ્રેનરને મને મહિલા બોડી બિલ્ડરનો વીડિયો દેખાડ્યો. એ પહેલાં મેં ક્યારેય કોઈ મહિલાની પુરુષ જેવી બોડી નહોતી જોઈ. એ વીડિયો જોયા બાદ મેં બોડી બિલ્ડર બનવાનો નિર્ણય કર્યો. મારી બોડીમાં ઘણી ચરબી હતી. એક સમય એવો પણ હતો, જ્યારે લોકો મારી મજાક ઉડાવતા હતા.'' ભૂમિકા એક દિવસમાં સાત કલાક કસરત કરે છે.