કોરોના સંકટ / રશિયાની વેક્સિન સ્પૂતનિક-V પહોંચશે ભારત, વાર્ષિક આટલા કરોડ ડોઝ તૈયાર કરવાનો પ્લાન

• રશિયા વેક્સિન સ્પૂતનિક-Vની પહેલો જથ્થો 1 મેના રોજ પહોંચશે ભારત
• વાર્ષિક 85 કરોડ ડોઝ તૈયાર કરવાનો છે પ્લાન
• સપ્લાઈથી ભારતમાં કોરોના સામે જંગમાં મદદ મળશેઃ દિમિત્રીવ

આ વાતની માહિતી રશિયન ડાયરેક્ટ ઇન્વેસ્ટમેન્ટ ફંડના પ્રમુખ કિરીલ દિમિત્રીવે આપી છે. જોકે, હજુ સુધી એ સ્પષ્ટ નથી કે આ જથ્થામાં વેક્સિનના કેટલા ડોઝ સામેલ હશે. સરકારે 1 મેથી 18 વર્ષથી વધુ ઉંમરના લોકોને વેક્સિન આપવાનો નિર્ણય કર્યો છે.

દિમિત્રીવે કહ્યું કે, પહેલો ડોઝ 1 મેના રોજ ડિલીવર થશે. તેમણે સંભાવના વ્યક્ત કરી છે કે રશિયા તરફથી મળનારી આ સપ્લાઈથી ભારતમાં કોરોના સામે જંગમાં મદદ મળશે. RDIFએ 5 મોટા ભારતીય નિર્માતાઓને વાર્ષિક 85 કરોડથી વધુ વેક્સિન ડોઝ તૈયાર કરવાનો કરાર કર્યો છે. રશિયા વિશ્વસ્તરે સ્પૂતનિક 5ની માર્કેટિંગ કરી રહ્યું છે. સંભાવના વ્યક્ત કરાઇ રહી છે કે ભારતમાં જલ્દીધી સ્પૂતનિક 5નું ઉત્પાદન શરૂ થઇ શકે છે. શરૂઆતમાં 5 કરોડ ડોઝ પ્રતિ મહિનાનો અંદાજ છે, જેને આવનારા સમયમાં વધારવાની સંભાવના દર્શાવાય રહી છે.

હાલ ભારતમાં કોરોના વાયરસની બીજી લહેરનો કહેર યથાવત્ છે. તેવામાં સ્વાસ્થ્ય વ્યવસ્થાઓ ખૂટી પડતા મુશ્કેલીઓ વધી ગઇ છે. જોકે, અમેરિકા, બ્રિટન અને જર્મની સહિત કેટલાક દેશ ભારતની મદદ માટે આગળ આવ્યા છે. આ દેશોએ તાત્કાલિક ભારતને મદદ મોકલવાનો નિર્ણય કર્યો છે. ત્યારે, વિશ્વ સ્વાસ્થ્ય સંગઠને પણ ભારતમાં બગડતી કોવિડ પરિસ્થિતિ પર ચિંતા વ્યક્ત કરી છે. સાથે જ ડબલ્યૂએચઓએ મદદ અને એક્સપર્ટ્સ મોકલવાની વાત કહી છે.

દુનિયાની પહેલી આર્ટિફિશિયલ સેટેલાઇટની જેમ જ રશિયાએ વેક્સિનનું નામ સ્પૂતનિક 5 રાખ્યું છે. આ એડીનોવાયરસ આધારિત વેક્સિન છે, જેનો ઉપયોગ મૉસ્કોમાં મોટા સ્તરે રસીકરણમાં કરવામાં આવી રહ્યો છે. રશિયાના રાષ્ટ્રપતિ વ્લામિદીર પુતિને કહ્યું કે, તેમની એક દીકરી આ વેક્સિનના બન્ને ડોઝ લગાવી ચૂકી છે. સાથે જ આ વેક્સિનને 59 દેશોમાં મંજૂરી મળી ચૂકી છે. જોકે ભારતમાં સીમ ઇન્સ્ટીટ્યૂટ ઑફ ઇન્ડિયામાં તૈયાર થયેલી ઑક્સફોરર્ડ-એસ્ટ્રાજેનેકાની કોવિશીલ્ડ અને ભારત બાયોટેકની કોવેક્સિનને ઇમરજન્સી ઉપયોગ માટે મળી છે.