ચિંતાજનક / આ રાજ્યમાં ફરીથી વધવા લાગ્યું કોરોનાનું સંક્રમણ, આ વખતે જોવા મળ્યા ખતરનાક વેરિયન્ટના લક્ષણો

• થોડા દિવસોની રાહત બાદ કોરોના વાયરસે ફરી એકવાર મુશ્કેલી વધારી 
• મહારાષ્ટ્રના મુખ્યમંત્રી ઉદ્ધવ ઠાકરેએ કોરોનાને લઈને તાત્કાલિક બેઠક બોલાવી
• કોરોનાના સંક્રમણને મામલે મુંબઈ પછી પુણા બીજા નંબર પર 

થોડા દિવસોની રાહત બાદ કોરોના વાયરસે ફરી એકવાર મુશ્કેલી વધારી 

મહારાષ્ટ્રમાં કોવિડ-19ના કેસ ઝડપથી વધી રહ્યા છે. રવિવારે અહીં 1036 લોકોમાં કોરોનાની પુષ્ટિ થઈ હતી. આ નવા કેસો સાથે, મહારાષ્ટ્રમાં કોરોના દર્દીઓની સાપ્તાહિક સરેરાશ 26 ફેબ્રુઆરી પછી ઉચ્ચ સ્તરે પહોંચી ગઈ છે. તે જ સમયે, મુંબઈમાં પણ દર્દીઓ ઝડપથી વધી રહ્યા છે. અહીં 5 દિવસમાં 50 ટકા દર્દીઓ વધ્યા છે. ચોંકાવનારી વાત એ છે કે આખા મહારાષ્ટ્રમાં જે નવા દર્દીઓ મળી આવ્યા છે તેમાંથી 60-70 ટકા મુંબઈના છે.

મહારાષ્ટ્રના મુખ્યમંત્રી ઉદ્ધવ ઠાકરેએ કોરોનાને લઈને તાત્કાલિક બેઠક બોલાવી

મહારાષ્ટ્રમાં કોરોના કેસો વધતાં પરિસ્થિતિની સમીક્ષા કરવા માટે મહારાષ્ટ્રના CM ઉદ્ધવ ઠાકરેની અધ્યક્ષતામાં સોમવારે એક બેઠક બોલાવવામાં આવી હતી. નિર્ણય લેવામાં આવ્યો હતો કે કોઈ નવા નિયંત્રણો લાદવામાં આવશે નહીં. હાલ પરિસ્થિતિ ગંભીર નથી. સમગ્ર સ્થિતિ પર સતત નજર રાખવામાં આવશે. જો હોસ્પિટલોમાં દર્દીઓ વધશે તો ફરીથી નિયંત્રણો લાદવામાં આવી શકે છે.

સંક્રમણના મામલે મુંબઈ પછી પુણા બીજા નંબર પર 

બેઠકમાં  મંત્રી ટોપેએ  છેલ્લા એક સપ્તાહમાં સંક્રમિત લોકોની સંખ્યા જણાવતાં કહ્યું હતું કે, ગયા અઠવાડિયે મુંબઈમાં સૌથી વધુ 67 ટકા દર્દીઓ, પુણેમાં 7.4 ટકા, રાયગઢમાં 3.3 ટકા અને પાલઘરમાં 2 ટકા દર્દીઓ જોવા મળ્યા હતા. માહિતી અનુસાર, મહારાષ્ટ્રમાં ફેબ્રુઆરી પછી ચેપગ્રસ્ત લોકો ફરીથી સંક્રમિત થઈ રહ્યા છે. જો કે, કોરોના સંક્રમણ વધતા તેમજ દર્દીઓને જોતા, ઘણા લોકો મુંબઈમાં ચોથી લહેરની અપેક્ષા રાખી રહ્યા છે, જો કે નિષ્ણાતો અત્યારે તેને નકારી રહ્યા છે. મહારાષ્ટ્રમાં હાલમાં સરેરાશ પોઝિટિવીટીનો દર 4.25% છે. જે 13 ફેબ્રુઆરી પછી સૌથી વધુ છે. ડૉક્ટરો મહારાષ્ટ્રમાં દર્દીઓમાં વધારો થવાનું કારણ ઓમિક્રોનના BA.4 અને BA.5 પેટા સ્ટ્રેનને જણાવ્યું છે. મોટાભાગના દર્દીઓ અહીં આ 2 વેરિયન્ટમાંથી મળી રહ્યા છે.

India Corona Update: દેશમાં છેલ્લાં 24 કલાકમાં કોરોનાના નવા 3714 કેસ, 7ના મોત અને 2513 દર્દીઓ સાજા થયા, કુલ એક્ટિવ કેસનો આંક 26,976#CoronavirusUpdates #CoronaUpdate pic.twitter.com/zJkVBR3TEw

— VTV Gujarati News and Beyond (@VtvGujarati) June 7, 2022

દેશમાં હાલ 26,976 સક્રિય દર્દીઓ સારવાર લઈ રહ્યાં છે  

જો આખા દેશની વાત કરીએ તો મંગળવારે 3714 નવા સંક્રમિત જોવા મળ્યા છે. જે સોમવારે જોવા મળેલા દર્દીઓ કરતાં 17 ટકા ઓછા છે.  3714 નવા દર્દીઓ મળ્યા બાદ દેશમાં કોરોના સંક્રમિતોની સંખ્યા 4,31,85,049 પર પહોંચી ગઈ છે. આ સિવાય સક્રિય દર્દીઓની સંખ્યા 26,976 છે. આ કુલ કેસના 0.06 ટકા છે. છેલ્લા 24 કલાકમાં કોરોનાને કારણે 7 લોકોના મોત પણ થયા છે. આ સાથે દેશમાં કોરોનાથી અત્યાર સુધીમાં મૃત્યુઆંક 5,24,708 થઈ ગયો છે.