VTV વિશેષ / ટેલેન્ટેડ યુવાનો ધરાવતા દેશોમાં ભારતનો ક્રમ નિરાશાજનક, રિપોર્ટથી સરકારની નીતિઓ પર ઉઠ્યાં સવાલ

•  પાછળના ક્રમ માટે મુખ્યત્વે ભારતની ખરાબ ગુણવત્તાની જીવનશૈલી જવાબદાર 
• ટોચના ક્રમે છે સ્વિત્ઝરલેન્ડ 

IMD શું છે?

IMDનું આખું નામ International Institute for Management Development છે. તેનું મુખ્ય મથક સ્વિત્ઝર્લેન્ડમાં આવેલું છે. આ પહેલા IMD એ World Digital Competitiveness Ranking 2019નો અહેવાલ જાહેર કર્યો હતો જેમાં પણ ભારતનું ઘણું પાછળ એટલે કે 43માં ક્રમે સ્થાન હતું. 

IMD World Talent Ranking 2019 

IMD World Talent Ranking 2019 એ ગણિત, વિજ્ઞાન, ભૌતિકશાસ્ત્ર, અર્થશાસ્ત્ર, IT વગેરે ક્ષેત્રોના કુશળ લોકોને જે તે દેશ કેટલી સારી રીતે વિકસાવી, આકર્ષી અને ટકાવી શકે છે તેના ક્રમ આપે છે. આ રેન્કિંગમાં ભારતનો અત્યંત નિરાશાજનક એવો 59મો ક્રમ આવ્યો હતો. ભારત પાછલી ગણતરી કરતા 6 સ્થાન ગબડ્યું છે. 

ભારતના આ નિરાશાજનક આંકડા પાછળનું કારણ શું?

આ માટેના મુખ્ય કારણો ભારતમાં નબળી ગુણવત્તાનું જીવન અને શિક્ષણ પાછળ કરવામાં આવતા ખૂબ ઓછા ખર્ચને માનવામાં આવે છે. ભારતમાં જીવનની ગુણવત્તા એટલે કે ક્વોલિટી ઓફ લાઈફ આટલી પછાત હોવાનું મુખ્ય કારણ વાયુ પ્રદુષણ પાર્ટિકલ પોલ્યુશન છે જેમાં ભારતનો છેક 61મો ક્રમ આવે છે. 

ભારતમાં વિદ્યાર્થી દીઠ ખર્ચ કરવામાં આવતી રકમમાં 62મો ક્રમ આવે છે. બહારના દેશોના પ્રોફેશનલ્સનું ભારત કામ કરવા માટે આવવાનું આકર્ષણ ખૂબ ઓછું છે જેમાં ભારતનો 40મો ક્રમ આવે છે જેની સામે ભારતના કુશળ લોકો બીજા દેશમાં જવા માટે તલપાપડ છે. આ પાછળનું મોટું કારણ ભ્રષ્ટાચાર, સુરક્ષાનો અભાવ, ઈન્ફ્રાસ્ટ્રક્ચરનો અભાવ અને કર્મચારીઓનું નિરાશ વલણ જવાબદાર માનવામાં આવે છે. આ ઉપરાંત ભારતમાં આરોગ્ય વ્યવસ્થાની સમસ્યા અને નોકરીઓમાં મહિલા કર્મચારીઓનો ઓછો ભાગ પણ જવાબદાર રૂપ છે. 

ટોચના સ્થાને કોણ છે?

સ્વિત્ઝર્લેન્ડ આ યાદીમાં પ્રોફેશનલ્સને આકર્ષવા માટે ટોચના સ્થાને છે. બીજા નંબરે ડેનમાર્ક છે અને ત્રીજા નંબરે સ્વીડન દેશ આવેલો છે. 

USA આ યાદીમાં 12માં સ્થાને છે. UK 24માં સ્થાને છે. ભારત ચીન, રશિયા, સાઉથ આફ્રિકા જેવા હરિફ દેશોથી પાછળ છે.