કઇ રીતે થશે 'ડિજિટલ ઇન્ડિયા' સ્પીડના મામલામાં આટલું પાછળ છે ભારત

દુનિયામાં ભલે સૌથી વધારે ડેટા ઉપયોગ કરવાના મામલામાં ભારત ટૉપ પર હોય પરંતુ ઇન્ટરનેટની સ્પીડમાં હજુ સુધી આપણે ઘણા પાછળ છીએ. મોબાઇલ ઇન્ટરનેટ ડાઉનલોડ સ્પીડના મામલામાં ભારતને વિશ્વભરમાં 109માં સ્થાન પર છે.  એક રિપોર્ટમાં જણાવાયું કે ભારતમાં ડાઉનલોડ સ્પીડ હજુ પણ વિશ્વના અન્ય દેશોની સરખામણીમાં ઘણી ઓછી છે.

ઉકલાના સ્પીડટેસ્ટ ઈન્ડેક્સ મુજબ દેશમાં મોબાઈલ ઈન્ટરનેટની સરેરાશ ડાઉનલોડ સ્પીડ ગત વર્ષે નવેમ્બરે 8.80 Mbps હતી તે વધીને આ વર્ષે ફેબ્રુઆરીમાં 9.01 Mbps પર પહોંચી ગઈ. જોકે તે પછી પણ દેશની રેન્કિંગમાં કોઈ ફેરફાર નથી થયો અને ભારત 109માં સ્થાન પર જ રહ્યું છે.

આ રેન્કિંગમાં નોર્વે 62.07 Mbpsની સરેરાશ સ્પીડની સાથે પહેલા નંબરે રહ્યું. નીતિ આયોગના મુખ્ય કાર્યકારી અધિકારી અમિતાભ કાંતે ડિસેમ્બરમાં દાવો કર્યો હતો કે દેશ 150 કરોડ ગીગાબાઈટ વપરાશની સાથે વિશ્વનું સૌથી મોટું ડેટા ઉપભોક્તા છે. તેમણે કહ્યું હતું કે તે અમેરિકા અને ચીનનો સંયુક્ત વપરાશથી વધુ છે.

ઉકલાના સ્પીડટેસ્ટ અનુસાર ભારતે બ્રોડબેન્ડના મામલામાં સારું પ્રદર્શન કર્યું છે. આ હિસાબે દેશ ગત વર્ષે 76મા સ્થાનની સરખામણીમાં આ વર્ષે ફેબ્રુઆરીમાં 67મા સ્થાને આવી ગયો. ઈન્ડેક્સમાં જણાવાયું છે કે બ્રોડબેન્ડ સ્પીડ ગત વર્ષે નવેમ્બરમાં 18.82 Mbps હતી તે વધીને આ વર્ષે ફેબ્રુઆરીમાં 2072 Mbps પર પહોંચી ગઈ છે. આ મામલે 161.53 Mbps સ્પીડની સાથે સિંગાપોર પહેલા સ્થાને છે. રિપોર્ટ મુજબ વધુ વસ્તીવાળા દેશોમાં બ્રોડબેન્ડ સ્પીડ વૃદ્ધિમાં ભારત આગળ છે.