IND vs SA / માહીના રાંચીમાં રમાવવામાં આવનારી અંતિમ ટેસ્ટમાં ચાઇનામેન કુલદીપને તક મળે તેવી શક્યતા

અહીંના સ્ટેડિયમમાં ભારતીય ટીમના પ્રેક્ટિસ સેશન દરમિયાન કુલદીપે લગભગ એક કલાક સુધી પ્રેક્ટિસ કરી હતી. ટીમનો હેડ કોચ રવિ શાસ્ત્રી ખુદ આ ચાઇનામેન બોલર સાથે હાજર રહ્યો હતો. પીચ અને પ્રેક્ટિસને જોતાં એવા સંકેતો મળી રહ્યા છે કે ટીમ મેનેજમેન્ટ મહેમાન ટીમને ફરીથી સ્પિન ફીરકીમાં ફસાવીને ક્લીન સ્વીપ કરવા ઇચ્છે છે. 

શરૂઆતની બંને ટેસ્ટમાં આફ્રિકન ટીમના બેટ્સમેન આર. અશ્વિન અને જાડેજા સામે સંઘર્ષ કરતા નજરે પડ્યા છે. સાઉથ આફ્રિકાના કેપ્ટન ફાફ ડુ પ્લેસિસે પણ કહ્યું હતું કે તેમના બેટ્સમેન ભારતના બંને સ્પિનરને સમજી શકતા નથી. આ સ્થિતિમાં કુલદીપને પણ અંતિમ ઈલેવનમાં સામેલ કરાઈ શકે છે. જો આમ થયું તો મહેમાન ટીમની અંતિમ ટેસ્ટમાં પણ રાહ મુશ્કેલ બની જશે. પીચની સ્થિતિ જોતાં કેપ્ટન કોહલી ત્રણ સ્પિનર સાથે મેદાનમાં ઊતરી શકે છે.

SET for Test Match 3 against South Africa ☑️#TeamIndia #INDvSA pic.twitter.com/0Htv31nPwW

— BCCI (@BCCI) October 18, 2019

ત્રીજા દિવસથી બોલ ટર્ન થશેઃ 
રાંચીમાં ત્રીજા દિવસથી બોલ ટર્ન થવા માંડશે. પીચ ક્યુરેટરની વાત માનવામાં આવે તો ચોથી ઇનિંગ્સમાં બેટિંગ કરવી આસાન નહીં હોય. શાસ્ત્રીએ પીચને જોઈને મયંક અગ્રવાલની પીઠ થપથપાવી હતી. શરૂઆતની બંને ટેસ્ટમાં સદી ફટકારનારા મયંક પાસે સતત ત્રીજી ટેસ્ટમાં સદી ફટકારવાની તક છે.

ફરી ટોસ બનશે બોસઃ 
ત્રીજી ટેસ્ટમાં ટોસની ભૂમિકા મહત્ત્વપૂર્ણ રહેશે. પ્રથમ બેટિંગ કરનારી ટીમ ફાયદામાં રહેશે. સ્કોરબોર્ડ પર મોટો સ્કોર મૂક્યા બાદ ચોથી ઇનિંગ્સમાં અહીં બેટિંગ કરવી મુશ્કેલ હોવાથી અહીં ટોસ જીતવો મહત્ત્વપૂર્ણ બની રહેશે. આ જ કારણથી દક્ષિણ આફ્રિકાના કેપ્ટન ફાફ ડુ પ્લેસિસે કહ્યું હતું, ''શનિવારે શરૂ થનારી ટેસ્ટ માટે નસીબ તેનો સાથ આપે, કારણ કે અત્યાર સુધી રમાયેલી બંને ટેસ્ટ મેચમાં હું ટોસ હારી ચૂક્યો છું. આ પીચ પર હું પહેલાં બેટિંગ કરવા ઇચ્છું છું.''