રાજસ્થાનના બીકાનેર જિલ્લામાં સ્થિત ભારત-પાકિસ્તાન આંતરરાષ્ટ્રીય બોર્ડર પર નશીલા પદાર્થો વિરુદ્ધ મોટી કાર્યવાહી કરતી વખતે બોર્ડર સિક્યુરિટી ફોર્સ (BSF) એ 56 કિલો હેરોઇન મળી આવતા હડકંપ મચ્યો છે.
ભારત-પાકિસ્તાન આંતરરાષ્ટ્રીય બોર્ડર પરથી ઝડપાયું હેરાઈન
બોર્ડર સિક્યુરિટી ફોર્સે કરી કાર્યવાહી
હેરોઇનની માર્કેટ વેલ્યુ 300 કરોડ રૂપિયા અંદાજવામાં આવી
જપ્ત કરાયેલ હેરોઇનની માર્કેટ વેલ્યુ 300 કરોડ રૂપિયા અંદાજવામાં આવી છે. આ દરમિયાન બીએસએફ દ્વારા પાકિસ્તાનની તરફથી ભારતમાં ઘુસણખોરી કરવાના શંકાસ્પદ તસ્કરોના પ્રયાસોને નિષ્ફળ બનાવ્યા હતા. બીએસએફ દ્વારા આ અત્યાર સુધીની સૌથી મોટી કાર્યવાહી કહેવામાં આવી રહી છે.
પાઈપમાં નાંખીને કરાઈ રહી હતી તસ્કરી
આ હેરોઇનની તસ્કરી એક પાઇપ દ્વારા સરહદ પારથી કરવામાં આવી રહી હતી. હેરોઇનને બેરીકેડ પાર કરીને ભારતીય સીમામાં પીવીસી પાઇપમાં નાખીને લાવવામાં આવી હતી. મોડીરાત્રે વાવાઝોડા અને તોફાન વચ્ચે બીએસએફના જવાનોએ આ કાર્યવાહી કરી હતી. પાકિસ્તાની તસ્કરો નાસી છૂટવામાં સફળ રહ્યા હતા.
બંદલી પોસ્ટ નજીક વાવાઝોડા અને તોફાન વચ્ચેની કાર્યવાહી
બીએસએફના ડીઆઈજી પુષ્પેન્દ્રસિંહે જણાવ્યું હતું કે બીએસએફને આ વિસ્તારમાંથી ઇનપુટ્સ પહેલેથી જ છે. દરેક લોકો આ અંગે સજાગ હતા. બુધવારે મધ્યરાત્રિએ લગભગ 2 વાગ્યે, બંદલી પોસ્ટ નજીક સીમા પર BSFની 127 બટાલિયનના જવાનોને અંદાજ આવી ચૂક્યો હતો કે, સીમા પર કાંઈક થઈ રહ્યું છે. આંધી અને તોફાનની વચ્ચે પણ સરહદ પર હિલચાલ જોવા મળતા ઉપકરણોની મદદથી પાકિસ્તાની તસ્કરો શોધી કાઢવામાં આવ્યા હતા.
2 શંકાસ્પદોને દબોચી લેવાયા
આ ઘટના બાદ BSF તસ્કરોની તપાસમાં જોતરાઈ હતી. તો કેટલાક ઉચ્ચાધિકારીઓએ ઘટના સ્થળની મુલાકાત લીધી હતી અને મોડી રાતે 2 શંકાસ્પદોને દબોચી લીધા હતા.