બ્રોડબેન્ડ સ્પીડ પર રિસર્ચ કરનારી કંપની ઓક્લાએ જાહેર કરેલા એક રિપોર્ટમાં ભારતીય એરટેલ અને રિલાયન્સ જીઓના 5G સ્પીડના આંકડા આપ્યા છે. જાણો કોણ મારશે ટક્કર
ભારતમાં 5G બીટા સ્પીડ ટેસ્ટ કરવામાં આવી
સ્પીડ પર રિસર્ચ કરનાર ઓક્લાએ આપ્યા આંકડા
ભારતીય એરટેલ અને રિલાયન્સ જીઓનું થયું ટેસ્ટીંગ
ટેલિકોમ ઓપરેટર રિલાયન્સ જિયોએ 5જી ઇન્ટરનેટના બીટા ટેસ્ટિંગમાં સરેરાશ 600 Mbps ની સ્પીડ અને ભારતી એરટેલે સરેરાશ 516 Mbps ની સ્પીડ રેકોર્ડ કરી છે. બ્રોડબેન્ડ સ્પીડ પર રિસર્ચ કરનારી કંપની ઓક્લાએ મંગળવારે જાહેર કરેલા એક રિપોર્ટમાં આ જાણકારી આપી છે. ઓકલાએ ચાર શહેરોમાં સરેરાશ 5G ડાઉનલોડ સ્પીડની તુલના કરી છે જ્યાં જિઓ અને એરટેલ બંનેએ તેમના 5G નેટવર્ક બનાવ્યા છે. ઓકલાના 'સ્પીડટેસ્ટ ઇન્ટેલિજન્સ' રિપોર્ટ અનુસાર, દિલ્હીમાં એરટેલની એવરેજ 5જી ડાઉનલોડ સ્પીડ 197.98 Mbps હતી. જ્યારે જિયોના નેટવર્ક પર 5Gનો સરેરાશ ડાઉનલોડ સ્પીડ રેકોર્ડ 598.58 Mbps નોંધાયો હતો. આ એરટેલની સ્પીડ કરતા ત્રણ ગણી વધારે છે. આનો અર્થ એ થયો કે બે કલાકની એચડી મૂવી એક મિનિટ 25 સેકન્ડમાં ડાઉનલોડ કરી શકાય છે, જે સામાન્ય રીતે છ જીબી સાઇઝની હોય છે. તે જ સમયે, 4K ક્વોલિટી મૂવી લગભગ ત્રણ મિનિટમાં 600 Mbps ની ટોપ સ્પીડ પર ડાઉનલોડ કરી શકાય છે.
એરટેલ નેટવર્ક ની ટોપ સ્પીડ 500 Mbps
ભારતી એરટેલે દિલ્હી, મુંબઇ, ચેન્નાઇ, બેંગલુરુ, હૈદરાબાદ, સિલિગુડી, નાગપુર અને વારાણસી એમ આઠ શહેરોમાં 5G સેવા શરૂ કરી છે. જિયોએ દિલ્હી, મુંબઈ, કોલકાતા અને વારાણસીમાં બીટા ટેસ્ટિંગ શરૂ કરી દીધું છે. ટ્રાયલમાં એરટેલના નેટવર્કે વારાણસીમાં 516.57 Mbps ની ટોપ એવરેજ સ્પીડ હાંસલ કરી છે.
સ્પીડમાં વધારો
તે જ સમયે, એરટેલે મુંબઈમાં સરેરાશ 271.07 Mbps ની ડાઉનલોડ સ્પીડ હાંસલ કરી છે, જ્યારે જિયોની નાણાકીય રાજધાનીમાં 515.38 Mbps ની 5G સ્પીડ છે. સ્પીડટેસ્ટના ગ્લોબલ ઈન્ડેક્સ મુજબ ઓગસ્ટ 2022માં મોબાઈલ ડાઉનલોડ સ્પીડ 13.52 Mbps ની સાથે ભારત વિશ્વમાં 117મા ક્રમે હતું. ઓકલાના રિપોર્ટમાં કહેવામાં આવ્યું છે કે નવા 5G પરિણામો દર્શાવે છે કે 5જી સ્પીડ ભારતના હાલના નેટવર્ક કરતા ઘણી સારી છે.