કાળું નાણું / નેપાળ બન્યું નકલી ચલણી નોટોના કાળા કારોબારનું ‘સૉફ્ટ ટાર્ગેટ’, બોર્ડર પર એલર્ટ

પાડોશી દેશ નેપાળ (nepal) માં નકલી ભારતીય ચલણી નોટો (black money) નો ગેરકાયદે કારોબાર અટકવાનું નામ લેતો નથી. પાકિસ્તાન અને તેની ગુપ્તચર સંસ્થા આઈએસઆઈએ છેલ્લા ઘણા સમયથી નેપાળને નકલી નોટોના કાળા કારોબાર માટે ‘સૉફ્ટ ટાર્ગેટ’ બનાવી દીધું છે. સુરક્ષા એજન્સીઓ (Security agency) ના અથાગ પ્રયત્નો છતાં પણ આ રેકેટ પર અંકુશ લગાવવામાં સફળતા મળી નથી.
ગત 20 જુલાઈએ કૈલાલી જિલ્લામાં પોલીસે યુપીના લખમીપુર ખીરીના રહેવાસી બે યુવકોને 40,900 રૂપિયાની નકલી ચલણી નોટો સાથે ઝડપ્યા ત્યારે અનેક ચોંકાવનારા ખુલાસા થયા હતા.

સુરક્ષા એજન્સીઓના અધિકારીઓના જણાવ્યા અનુસાર, રૂપિયા 100ની નવી ભારતીય નકલી ચલણી નોટો મળી આવતા સાફ થયું છે કે, ભારત વિરોધી તત્વો નેપાળને ‘ટ્રાન્ઝિટ પોઈન્ટ’ બનાવીને નકલી નોટો બજારમાં ઠાલવવાનો ‘માસ્ટર પ્લાન’ અમલમાં મૂકી ચૂક્યા છે.આ પ્લાનને રોકવા માટે હાલ ભારત-નેપાળ બોર્ડર પર એલર્ટ જારી કરવામાં આવ્યું છે અને નેપાળથી ભારત આવતી દરેક વ્યક્તિ પર બાજનજર રાખવામાં આવી રહી છે.

નકલી ચલણી નોટોના આ ફૂલપ્રૂફ રેકેટ અને મજબૂત નેટવર્કને તોડવા માટે હાલ ભારત અને નેપાળ બંને દેશની સુરક્ષા એજન્સીઓ ભારે મહેનત કરી રહી છે. એજન્સીઓએ આ રેકેટના માસ્ટર માઈન્ડ સુધી પહોંચવા માટે મની એક્સચેન્જ કરતા લોકો અને કંપનીઓની પણ મદદ લીધી છે. નેપાળમાં ભારતીય ચલણી નોટોનો કારોબાર ફેલાવવામાં આઈએસઆઈ સામેલ હોવાની સ્ફોટક માહિતી સામે આવી છે.

નેપાળની રાજધાની કાઠમાંડુના ત્રિભુવન ઈન્ટરનેશલ એરપોર્ટ પર ગત 24 મેના રોજ 7.68 કરોડની નકલી ભારતીય ચલણી નોટો સાથે ત્રણ પાકિસ્તાની નાગરિકો પકડાયા હતા. આરોપીઓ મોહમ્મદ અખ્તર, નાદિયા અનવર અને નસીરુદ્દીને પૂછપરછમાં જણાવ્યું હતું કે, તેઓ નકલી નોટોનું કન્સાઈન્મેન્ટ લઈને દોહાથી નેપાળ આવ્યા હતા. નેપાળમાં ત્રણ એજન્ટોને આ કન્સાઈન્મેન્ટ આપવાનું હતું.

ભારતમાં નકલી નોટો માટે સુરક્ષા એજન્સીઓ સતત એલર્ટ રહે છે અને તેમની કડક કાર્યવાહી અને લોકોમાં વધતી જાગૃતિના કારણે હવે નકલી નોટોના માફિયાઓએ નેપાળને સૉફ્ટ ટાર્ગેટ બનાવ્યું છે. નેપાળમાં ફક્ત 100 રૂપિયાની ભારતીય નોટો ચલણમાં છે. થોડા સમય પહેલા નેપાળ સરકારે 200, 500 અને 2000 રૂપિયાની ભારતીય નોટોને પ્રતિબંધિત કરી હતી.

સુરક્ષા એજન્સીના અધિકારીના કહેવા પ્રમાણે, નેપાળમાંથી મોટાપાયે નકલી ભારતીય ચલણી નોટો પકડાયા બાદ બોર્ડર પર એલર્ટ જારી કરીને ચેકિંગ સઘન કરી દેવાયું છે. પોલીસ અને એસએસબી દ્વારા સંયુક્ત ઓપરેશન હાથ ધરીને તમામ લોકો પર વૉચ રાખવામાં આવી રહી છે.