ભારત અને ઓસ્ટ્રેલિયા વચ્ચેની વન ડે શ્રેણીનો બીજો મુકાબલો આવતી કાલ રવિવારે સિડનીમાં જ રમાશે.
પ્રથમ મેચમાં થયેલા પરાજય બાદ શ્રેણી જીવંત રાખવા માટે ટીમ ઇન્ડિયાએ કોઈ પણ સંજોગોમાં આવતી કાલની મેચ જીતવી પડશે. હાલ ઓસ્ટ્રેલિયા ત્રણ વન ડેની શ્રેણીમાં ૧-૦થી આગળ છે. ગઈ કાલે ઓસી.એ ૬૬ રનથી પ્રથમ વન ડે જીતી લીધી.
સિડનીમાં ટીમ ઇન્ડિયાનો રેકોર્ડ બહુ જ ખરાબ
આમ પણ સિડનીમાં ટીમ ઇન્ડિયાનો રેકોર્ડ બહુ જ ખરાબ છે. અહીં ભારતે અત્યાર સુધીમાં કુલ ૨૧ મેચ રમી છે, જેમાંથી માત્ર મેચમાં જ ટીમ ઇન્ડિયા જીતી શકી છે, જ્યારે ૧૫ મેચમાં હારનો સામનો કરવો પડ્યો છે.
કેપ્ટન તરીકે વિરાટે ઓસ્ટ્રેલિયા સામે ૧૮માંથી ૧૧ મેચ જીતી છે, જ્યારે ફિંચને ૧૩માંથી માત્ર છ મેચમાં જ જીત હાંસલ કરી થઈ છે.
ભારતીય બોલર્સે આ બેટ્સમેનો પર કાબૂ મેળવવો પડશે
ગઈ કાલે ઓસ્ટ્રેલિયન ઓપનર્સ વોર્નર અને ફિંચને ગઈ કાલની વન ડેમાં ૧૫૬ રનની ઓપનિંગ પાર્ટનરશિપ નોંધાવી હતી. વોર્નરે ૬૯ રનની ઇનિંગ્સ રમી. ફિંચ (૧૧૪) અને સ્મિથ (૧૦૫)એ શાનદાર સદીઓ ફટકારી. ગ્લેન મેક્સવેલે પણ ૧૯ બોલમાં ૪૫ રનની તોફાની ઇિનંગ્સ રમી હતી. વન ડે શ્રેણી જીવંત રાખવા માટે ભારતીય બોલર્સે આ બેટ્સમેનો પર કાબૂ મેળવવો પડશે.
ભારતીય બેટ્સમેનોએ આ બોલરોથી ચેતવું પડશે
જ્યારે ભારતીય બેટ્સમેનોએ હેઝલવૂડ અને એડમ ઝમ્પાથી સાવધ રહેવું પડશે. હેઝલવૂડે ગઈ કાલની મેચમાં ભારતીય ટોપ ઓર્ડરની કમર તોડી નાખી હતી, જ્યારે મિડલ ઓવરમાં ઝમ્પાએ ભારતીય બેટ્સમેનોની જોરદાર પરીક્ષા લીધી હતી. ભારત સામે સૌથી વધુ વિકેટ ઝડપનારો પેટ કમિન્સ પણ ટીમ ઇન્ડિયા માટે મુશ્કેલી સર્જી શકે છે.
આવતીકાલની મેચમાં ટીમ ઇન્ડિયાના બેટ્સમેન ઉપર દારોમદાર
ગઈ કાલની મેચમાં વિરાટ કોહલી અને કે. એલ. રાહુલ કંઈ ખાસ કરી શક્યા નહોતા. કોહલી ૨૧ અને રાહુલ ૧૨ રન બનાવીને પેવેલિયનમાં પાછા ફર્યા હતા. મયંક અગ્રવાલ ૨૨ અને શ્રેયસ ઐયર પણ માત્ર બે જ રન બનાવી શક્યો હતો. હવે જો ટીમ ઇન્ડિયાએ શ્રેણીમાં વાપસી કરવી હશે તો ભારતીય બેટ્સમેનોએ રન બનાવવા જ પડશે.
ગઈ કાલની મેચમાં માત્ર શિખર ધવન અને હાર્દિક પંડ્યા જ ઓસ્ટ્રેલિયન બોલિંગ આક્રમણનો દૃઢતાથી સામનો કરી શક્યા હતા. ધવને ૮૬ બોલમાં ૭૪ રન અને હાર્દિકે ૭૬ બોલમાં ૯૦ રનની ઇનિંગ્સ રમી હતી. હવે ફરી એક વાર ભારતીય ચાહકો આ બંને પાસેથી વધુ મોટી ઇનિંગ્સની આશા રાખી રહ્યા છે.