ચેન્નાઇમાં ઇંગ્લેન્ડ સામેની મેચમાં ભારતનો 227 રનથી પરાજય, 4 વર્ષ બાદ હોમ ગ્રાઉન્ડ પર હાર્યું ભારત.
કેપ્ટન કોહલીએ 72 રન બનાવ્યા
ચેન્નાઈમાં રમાયેલી પહેલી ટેસ્ટમાં ઈંગ્લેન્ડે ભારતને 227 રનથી હરાવી દીધું છે. ઈંગ્લેન્ડે ભારતને 420 રનનો પહાડ જેટલો ટાર્ગેટ આપ્યો હતો. જેનાં જવાબમાં ભારતીય ટીમ 192 રનમાં સમેટાઈ ગઈ હતી. 192 રનની ભારતીય ઈનિંગમાં સૌથી વધારે કેપ્ટન કોહલીએ 72 રન બનાવ્યા હતા. જ્યારે ઈંગ્લેન્ડ તરફથી સૌથી સફળ બોલર જેક લીચ રહ્યો હતો. તેણે 4 વિકેટો ઝડપીને ભારતીય ટીમનાં બેટ્સમેનોને ક્રિઝ પર વધુ સમય ટકવા નહોતા દીધા.
પાંચમા દિવસની રમત હંમેશાથી મુશ્કેલ
ચેન્નાઈમાં પાંચમા દિવસની રમત હંમેશાથી મુશ્કેલ રહી છે. આજે પણ એવુજ થયુ. ભારતીય બેટ્સમેનોને ઈંગ્લિશ બોલર્સનો મુકાબલો કરવામાં ખૂબ મુશ્કેલીઓ પડી રહી હતી. પણ કેપ્ટન કોહલીએ પોતાની બેટીંગથી બધાને પ્રભાવિત કર્યાં હતા. સ્પીનર હોય કે ફાસ્ટ બોલર તેણે બધાનો સરળતાથી સામનો કર્યો હતો, પણ તેનાં એકલાથી ટીમ ઈન્ડિયાની નૈયા પાર ના લાગી.
ઈંગ્લેન્ડ વિરુદ્ધ સૌથી મોટી હાર
ઈંગ્લેન્ડ વિરુદ્ધ ભારતને પોતાના ઘરમાં સૌથી મોટી હારનો સામનો કરવો પડી રહ્યો છે. અગાઉ 2006માં મુંબઈમાં ભારતીય ટીમ 212 રનથી હારી હતી. જ્યારે આજે ભારત ઈંગ્લેન્ડ વિરુદ્ધ 227 રનથી પરાસ્ત થયું છે. ભારતીય ટીમ 4 વર્ષ બાદ ઘરમાં ટેસ્ટ મેચ હાર્યું છે. અગાઉ 2017માં ભારતીય ટીમ ઓસ્ટ્રેલિયા સામે હાર્યું હતું. જે મેચ પુણેમાં રમાઈ હતી.
India vs England;1st Test: England won by 227 runs