આમંત્રણ / ભારતે પાકિસ્તાનને આપ્યું નિમંત્રણ, દિલ્હીમાં થશે હાઈલેવલ બેઠક, દુનિયા ભરના દેશોની હશે નજર

• દિલ્હીમાં યોજાશે SCO કોન્ફરન્સ
• ભારતે પાકિસ્તાનને આપ્યું આમંત્રણ
• SCOનું પ્રમુખપદ હાલમાં ભારત પાસે

ભારત હાલમાં SCOનું પ્રમુખપદ ધરાવે છે. જેમાં ચીન, ભારત, કઝાકિસ્તાન, કિર્ગિસ્તાન, રશિયા, પાકિસ્તાન, તાજિકિસ્તાન અને ઉઝબેકિસ્તાનનો સમાવેશ થાય છે. SCO ના અધ્યક્ષ તરીકે ભારત આ બેઠકોની યજમાની કરવા તૈયાર છે. મળતી માહિતી મુજબ ભારતે અગાઉ પાકિસ્તાનના મુખ્ય ન્યાયાધીશ (CJP) ઉમર અતા બંદિયાલને આમંત્રણ આપ્યું હતું. જો કે CJP SCO ના મુખ્ય ન્યાયાધીશોની બેઠકમાં હાજર રહ્યા ન હતા અને તેમના સ્થાને જસ્ટિસ મુનીબ અખ્તરે તાજેતરમાં વીડિયો લિંક દ્વારા બેઠકમાં હાજરી આપી હતી.

ગોવામાં વિદેશ મંત્રીઓની બેઠક યોજાશે

જણાવી દઈએ કે વિદેશ મંત્રીઓની બેઠક મે મહિનામાં ગોવામાં યોજાવા જઈ રહી છે, જ્યારે રક્ષા મંત્રીઓની બેઠક એપ્રિલમાં નવી દિલ્હીમાં યોજાશે. પ્રાપ્ત માહિતી અનુસાર ભારત તરફથી મોકલવામાં આવેલા આમંત્રણ પર પાકિસ્તાને હજુ સુધી કોઈ નિર્ણય લીધો નથી. પાકિસ્તાન સરકારે કહ્યું કે તેણે હજુ સુધી નિર્ણય લીધો નથી કે વિદેશ મંત્રી બિલાવલ ભુટ્ટો ઝરદારી કે રક્ષા મંત્રી ખ્વાજા આસિફ ભારતમાં યોજાનારી બેઠકોમાં ભાગ લેશે. બિલાવલ ભુટ્ટો ઝરદારી અને ચીનના કિન ગેંગ SCO સદસ્ય દેશોના વિદેશ મંત્રીઓમાં સામેલ છે જેમને ભારતે મે મહિનામાં બેઠક માટે આમંત્રિત કર્યા છે.

યોગ્ય સમયે નિર્ણય લેવામાં આવશે

પાકિસ્તાનના વિદેશ કાર્યાલયે કહ્યું કે યોગ્ય સમયે નિર્ણય લેવામાં આવશે. જો પાકિસ્તાની વિદેશ મંત્રી આ બેઠકમાં રૂબરૂ હાજરી આપે છે તો 2011 પછી ઈસ્લામાબાદની ભારતની આ પ્રથમ મુલાકાત હશે. તે સમયે તત્કાલિન વિદેશ મંત્રી હિના રબ્બાની ભારતની મુલાકાતે આવ્યા હતા.