પૂર્વ લદ્દાખમાં એલએસી પર ચીન સાથે વધતા જતા તણાવ વચ્ચે ભારતે વધુ એક વખત ચીનની મશહૂર ગેમિંગ એપ પબજી અને લુડો સહિત ૧૧૮ વધુ મોબાઇલ એપ પર પ્રતિબંધ લગાવી દીધો છે.
આ એપ ચીનની કંપનીઓ સાથે સંકળાયેલી છે. આ અગાઉ જૂનમાં પણ ભારતે ટિકટોક સહિત પ૯ ચીની એપ્લિકેશન પર પ્રતિબંધ મૂક્યો હતો. ભારત સરકારે ઘણા મહિનાથી સરહદ પર નફ્ટાઇની હદ વટાવી ચૂકેલા ચીનને વેપાર તથા આર્થિક સંબંધોના સ્તરે વધુ એક લપડાક લગાવી છે. હવે ભારત તરફથી ચીનની કુલ ૨૨૪ એપ પર પ્રતિબંધ મૂકી દેવાયો છે.
પબજીના ભારતમાં કરોડોની સંખ્યામાં યુઝર્સ હતા
પબજી એપ્લિકેશન પર પ્રતિબંધ મૂકવાનું પગલું ખરેખર ચીન માટે વધુ નુકસાનકારક પુરવાર થઇ શકે છે. પબજીના ભારતમાં કરોડોની સંખ્યામાં યુઝર્સ હતા. પબજી એપ્લિકેશન છ કરોડથી વધુ વાર ડાઉનલોડ થઇ ચૂકી છે. ભારતમાં તેના ૩.૩ કરોડ એક્ટિવ યુઝર્સ હતા, જે ખરેખર ખૂબ મોટી સંખ્યા કહેવાય. હવે તેના પર પ્રતિબંધનું શસ્ત્ર ઉગામવાથી ચીની કંપનીઓની કમાણી સીધેસીધી પ્રભાવિત થશે.
પબજી એપ્લિકેશન સૌથી વધુ નફો કરતી મોબાઇલ ગેમ હતી
અગાઉ જૂનમાં જ્યારે પ૯ એપ્લિકેશન પર પ્રતિબંધ મૂકવામાં આવ્યો ત્યારે ચીનના સરકારી મીડિયાએ સ્વીકાર્યું હતું કે આ પ્રતિબંધના કારણે ચીની કંપનીઓને રૂ.૪પ,૦૦૦ કરોડનું જંગી નુકસાન થશે. તેના પરથી હવે પબજી અને લુડો સહિત ૧૧૮ એપ્લિકેશન પર પ્રતિબંધ મૂકવાથી ચીનને કેટલું જંગી નુકસાન થશે તેનો અંદાજ લગાવી શકાય છે. એવું કહેવાય છે કે ગેમિંગની દુનિયામાં ડંકો વગાડનાર પબજી એપ્લિકેશન સૌથી વધુ નફો કરતી મોબાઇલ ગેમ હતી.
બાળકો અને ટીનેજરો પબજી રમવામાં જ મોટા ભાગનો સમય બગાડવામાં વ્યસ્ત રહેતા
ભારતમાં યુવા વર્ગને પબજીનું ઘણાં વર્ષથી ગજબનું ઘેલું લાગ્યું હતું. ઘર-ઓફિસમાં તો લોકો પબજી ગેમ રમવામાં મશગૂલ રહેતા હતા. મુસાફરી દરમિયાન પણ ઘણા લોકો આ ડિજિટલ ગેમ રમવામાં વ્યસ્ત રહેતા હતા. ખાસ કરીને બાળકો અને ટીનેજરો પબજી રમવામાં જ મોટા ભાગનો સમય બગાડવામાં વ્યસ્ત રહેતા હોવાથી તેમણે માતા-પિતા કે વાલીઓનો ઠપકો પણ સાંભળવો પડતો હતો. ભારતે ચીનની વધુ ૧૧૮ મોબાઇલ એપ્લિકેશન્સ (એપ) પર પ્રતિબંધ મૂકી દીધો છે અને એમાં લોકપ્રિય પબજી એપનો પણ સમાવેશ છે.ભારતના ઇલેક્ટ્રોનિક્સ એન્ડ ઇન્ફર્મેશન ટેક્નોલોજી મંત્રાલયે ઇન્ફર્મેશન ટેક્નોલોજી એક્ટની કલમ-૬૯એ હેઠળ સત્તાનો ઉપયોગ કરીને એન્ડ્રોઇડ તથા આઇઓએસ પ્લેટફોર્મ પર કેટલીક એપનો દુરુપયોગ કરવામાં આવી રહ્યો હોવાનું કહીને એના પર બાન મૂકી દીધું છે.
આ એપ્સ ઉપર પ્રતિબંધ મુકાયો છે
ભારતે ચીનની ટિકટોક એપ પર ઘણા દિવસ પહેલાં જ પ્રતિબંધ મૂકી દીધો હતો. એ ઉપરાંત પબજી સહિત જે એપ પર ભારત દ્વારા બાન મૂકવામાં આવ્યું છે એમાં પબજી મોબાઇલ નોર્ડિક મેપ, લિવિક, પબજી મોબાઇલ લાઇટ, વીચેટ, વીપીએન ફૉર ટિકટૉક, બાઇદુ, લિવ યુ મીટ, કૅરમ ફ્રેન્ડ્સ, લુડો ઓલ સ્ટાર, એપસ લોન્ચર, કટ કટ કટ આઉટ એન્ડ ફોટો બેકગ્રાઉન્ડ એડિટર, ફેસયુ-ઇન્સ્પાયર યોર બ્યુટી, શેરસેવ બાય શીઓમી, કેમકાર્ડ, ઇનનોટ, વૂવ મિટિંગ-ટેન્સન્ટ વીડિયો કોન્ફરન્સિંગ, સુપર ક્લીન, પિટુ, સાયબર હન્ટર, સુપર મેકા ચેમ્પિયન્સ, લાઇફઆફ્ટર, ફોન ઓફ આઇસલ્સ, ચેસ રશ, રાઇઝ ઓફ કિંગ્ડમ્સ, આર્ટ ઓફ કોન્ક્વેસ્ટ, ડેન્ક ટેન્ક્સ, વોરપાથ, ગેમ ઓફ સુલતાન્સ, સ્માર્ટ એપલૉક, હાઇડ એપ-હાઇડ એપ્લિકેશન આઇકન, ઝાકઝાક પ્રો, મ્યુઝિક-એમપીથ્રી પ્લેયર, મ્યુઝિક પ્લેયર, ઓડિયો પ્લેયર, વેબ બ્રાઉઝર એન્ડ ફાસ્ટ એક્સપ્લોરર, વીડિયો પ્લેયર, ફોટો ગેલેરી એચડી એન્ડ એડિટર, ફોટો ગેલેરી એન્ડ આલબમ, મ્યુઝિક પ્લેયર-બાસ બુસ્ટર, વેબ બ્રાઉઝર, બાઇક રેસિંગ, ઝેડ કેમેરા, ટેન્ટેન-ડેટ ફોર રિયલ, યુ-ડિક્શનરી, યોઉકુ, રોડ ઓફ કિંગ્સ, સાઇના ન્યૂઝ, પેન્ગિવન એફએમ વગેરેનો સમાવેશ છે. આમ, ભારતે સરહદે તો ચીનની ચોમેર જબરદસ્ત કિલ્લેબંધી કરી છે, પરંતુ હવે કરોડોની કમાણી કરતી એપ્લિકેશન્સ પર પ્રતિબંધ મૂકીને ભારતે બીજિંગને વધુ એક કડક સંદેશ આપી દીધો છે.