ભારત અને ન્યૂઝીલેન્ડ વચ્ચે આજે રોમાંચક મેચ થઇ હતી. સતત બીજી વખત મેચમાં સુપરઓવરમાં ભારતે જીત નોંધાવી હતી. આ મેચમાં ભારતે પોતાનો જુનો એક રેકોર્ડ યથાવત્ રાખ્યો છે. જયારે બીજી તરફ ન્યૂઝીલેન્ડ સાથે સુપરઓવરનો ફરી એક વખત કડવો અનુભવ થયો છે.
આજ સુધી ભારત ટાઈ થયેલી મેચ હાર્યું નથી
ન્યૂઝીલેન્ડની ટીમ સાતમી વખત સુપરઓવરમાં હારી
સતત બીજી સુપરઓવરમાં જીત નોંધાવી ભારતે રચ્યો ઈતિહાસ
T 20નાં ઈતિહાસમાં ડ્રો થયેલી બધી મેચમાં ભારતની જીત
T 20નાં ઈતિહાસમાં નોંધનીય છે કે ભારત માટે આ ત્રીજો મોકો છે જયારે ભારતનો કોઈ મુકાબલો ટાઈ થયો હોય. વર્ષ 2007માં પહેલો મોકો પાકિસ્તાન સામે હતો જયારે મેચ ટાઈ થઇ હોય. તે મેચમાં ભારતે બોલ-આઉટથી જીત નોંધાવી હતી. જે બાદ ન્યૂઝીલેન્ડ સામે 29મી જાન્યુઆરી 2020ના રોજ મેચ ટાઈ થઇ. આ મેચમાં ભારત સુપરઓવરમાં વિજયી બન્યું હતું. અને આજની મેચ પણ ડ્રો થઇ જતા સુપર ઓવરનો વારો આવ્યો હતો. ડ્રો મેચમાં ભારતે પોતાનો ઈતિહાસ જાળવી રાખ્યો અને આ મેચમાં પણ ભારતની ભવ્ય જીત થઇ. આમ ડ્રો મેચના ભારતે પોતાનો રેકોર્ડ જાળવી રાખ્યો.
ન્યૂઝીલેન્ડની ટીમને ફરી એકવાર થયો સુપરઓવરનો કડવો અનુભવ
ન્યૂઝીલેન્ડની ટીમ માટે સુપરઓવરનો ફરી એક વખત કડવો અનુભવ થયો છે. સુપરઓવરના કારણે ઘણી વખત ન્યૂઝીલેન્ડની ટીમના મોંઢામાંથી જીત છીનવાઈ જાય છે. ન્યૂઝીલેન્ડની ટીમ સાતમીવાર સુપરઓવરનાં હારી છે.
મનીષ પાંડેએ ફટકાર્યા 50 રન
આજની મેચમાં સીરીઝમાં સતત ચોથી મેચમાં ન્યૂઝીલેન્ડ ટીમે ટોસ જીત્યો અને ભારતને બેટિંગ કરવા માટે આમંત્રણ આપ્યું. ટીમ ઈન્ડિયાએ 8 વિકેટ ગુમાવી 165 રન બનાવ્યા. સૌથી વધારે 50 રન મનીષ પાંડેએ બનાવ્યા. જયારે કે એલ રાહુલે 39 રનનું યોગદાન કર્યું. ન્યૂઝીલેન્ડની ટીમ જવાબમાં મેદાનમાં ઉતારી ત્યારે તે પણ 165 રન જ બનાવી શકી. તેમની તરફથી કોલીન મુનરોએ 64 રન ફટકાર્યા. ટિમ સીફર્ટે 57 રન બનાવ્યા.
વિરાટ કોહલીએ બાઉન્ડ્રી કરીને ભારતને જીત અપાવી
બંને ટીમ વચ્ચે મેચ ટાઈ થઇ ગયા બાદ ફરીથી સુપરઓવર કરવાનો વારો આવ્યો. સુપરઓવરમાં ન્યૂઝીલેન્ડની ટીમે 13 રન કર્યા. ભારત તરફથી વિરાટ કોહલી અને કે એલ રાહુલ ઉતર્યા ત્યારે કે એલ રાહુલે ચોક્કો ફટકારી ટીમને જીતની નજીક લઇ ગયા જે બાદ એક શોટ બાઉન્ડ્રી તરફ રમ્યા પરંતુ તેઓ કેચ આઉટ થઇ ગયા જે બાદ વિરાટ કોહલીએ 2 રન કર્યા અને પછીની બોલમાં બાઉન્ડ્રી ફટકારી ઐતિહાસિક જીત હાંસલ કરી.