કિંમત / ચીનમાં કોરોના વાઇરસને પગલે ઘટી રહી છે પેટ્રોલ-ડીઝલની કિંમત, ભારતને મળી શકે છે રાહત

• દુનિયાભરમાં ફેલાયેલા કોરોના વાઇરસના સંક્રમણને લઇને ભારત પણ ચિંતિત
• કોરોના વાઇરસના સંક્રમણને પગલે તેલની કિંમતોમાં ઘટાડો
• જાન્યુઆરીમાં ચીનમાં એક્સપોર્ટ ઓર્ડર્સમાં મોટો ઘટાડો આવ્યો

આ ઉપરાંત દુનિયાની બીજી સૌથી મોટી અર્થવ્યવસ્થા માટે સપ્લાઇ ચેન પણ પ્રભાવિત થઇ છે. સોમવારે અમેરિકી ક્રુડ ઓઇલમાં સતત ચોથા સપ્તાહે ઘટાડો જોવા મળ્યો. અમેરિકી બજારમાં સવારે ક્રુડ ઓઇલની કિંમત 79 સેન્ટ ઘટીને 55.83 ડોલર રહી. જાન્યુઆરી મહીનામાં જ ક્રુડ ઓઇલમાં 12 ટકાનો ઘટાડો જોવા મળ્યો છે. 

ચીનમાં એક્સપોર્ટ ઓર્ડરમાં ઘટાડો

જાન્યુઆરીમાં ચીનમાં એક્સપોર્ટ ઓર્ડર્સમાં મોટો ઘટાડો આવ્યો છે. તેના પગલે ત્યાં ક્રુડ ઓઇલની માંગ પણ ઘટી ગઇ છે. ચીનના વેપાર પર નજર રાખનાર જાણકારોનું કહેવું છે કે, ફેબ્રુઆરી મહીનામાં ચીનના કારોબાર પર વધુ અસર જોવા મળી શકે છે. તેનાથી સ્પષ્ટ છે કે હાલ પાડોશી દેશના પગલે તેની કિંમતોમાં પણ ઘટાડો આવશે. 

ભારતને મળી શકે છે રાહત 

આવી સ્થિતિમાં તેલના બીજા સૌથી મોટા આયાતકાર દેશ ભારતને કંઇક લાભ મળી શકે છે. મોંઘવારીના ભાર નીચે રહેલા ભારતને આંતરરાષ્ટ્રીય બજારમાં તેલની કિંમતોમાં રાહત મળશે. તેની અસરને પગલે ગ્રાહકોને પણ તેની કિંમતોમાં કેટલીક રાહત મળી શકે છે. 

સતત 5માં દિવસે ફરી સસ્તા થયા પેટ્રોલ અને ડીઝલ 

ભારતમાં સોમવારે સતત 5માં દિવસે પેટ્રોલ અને ડીઝલની કિંમતોમાં ઘટાડો આવ્યો છે. પેટ્રોલ સોમવારે સવારે 6 પૈસા, જ્યારે ડીઝલ 5 પૈસા સસ્તુ થઇ ગયું. દિલ્હીમાં પેટ્રોલની કિંમત 73.04 રૂપિયા અને ડીઝલની કિંમત 66.09 રૂપિયા છે.