VTV વિશેષ / 2021માં હરણફાળ ભરી રહેલા ભારત દેશની આ સમસ્યાઓ તાત્કાલિક હલ કરવી પડશે

૨૦૨૧: વધતી તાકાત સાથે ઊભરતું ભારત

 દેશનો ગ્રોસ ડોમેસ્ટિક પ્રોડક્ટ (GDP) વૃદ્ધિદર વર્ષ ૨૦૧૯માં ભલે ૫.૦૨ ટકા થઈ ગયો હોય, પરંતુ આજે પણ GDPનો લગભગ ૧૦ ટકા હિસ્સો આપણે સામાજિક-આર્થિક પેકેજના રૂપે જરૂરિયાતમંદ લોકો ઉપર ખર્ચ કરીએ છીએ. ભારત નિયમિતરૂપે અંતરિક્ષ અભિયાનો ચલાવતું રહે છે. તેનાથી આપણી અંતરિક્ષ સુવિધાઓનો ફાયદો તો થયો જ છે સાથે સાથે આપણી આવક પણ વધી છે. સાયન્સ અને ટેક્નોલોજીના ક્ષેત્રમાં તો ‘ગ્લોબલ ઈનોવેશન ઈન્ડેક્સ’ના ટોપ-૫૦ દેશોમાં આપણે પહેલી વખત સામેલ થયા છીએ.

સંરક્ષણ ક્ષેત્રમાં ભારતની વૃદ્ધિ પ્રશંસનીય

ભારતની આ તમામ જ્વલંત સફળતાઓમાં સંરક્ષણ ક્ષેત્રમાં સાધેલી પ્રગતિનો ઉલ્લેખ ખાસ જરૂરી છે. સંરક્ષણ ક્ષંત્રના ખર્ચના મામલે ત્રીજો મોટો દેશ અને સશસ્ત્ર દળોના મામલે ચોથો મોટો દેશ ભારત હવે એક મુખ્ય ક્ષેત્રિય શક્તિ, પરમાણુ શક્તિ સંપન્ન રાષ્ટ્ર, એક ઊભરતી વૈશ્વિક શક્તિ અને એક સંભવિત મહાશક્તિ પણ છે. ૧૪ લાખથી વધુ સ્વૈચ્છિક અને સક્રિય સૈનિકોની સંખ્યા સાથે આ વિશ્વનું બીજું સૌથી મોટું સૈન્યદળ પણ ધરાવે છે.

ભારત પાસે વિશ્વની ચોથી સૌથી શક્તિશાળી સેના

ગ્લોબલ ફાયરપાવર રિપોર્ટ-૨૦૨૦ અનુસાર ભારત પાસે વિશ્વની ચોથી સૌથી શક્તિશાળી સેના છે. આપણી સૌથી મોટી તાકાત આપણા સૈનિકો અને તેમના નેતૃત્વની બહાદુરી, સમપર્ણ અને દેશભક્તિ છે. સર્જિકલ સ્ટ્રાઈક, બાલાકોટ એરસ્ટ્રાઈક અને જમ્મુ-કાશ્મીરમાં આતંકવાદ વિરોધી અભિયાનોમાં સેનાની સફળતા પ્રશંસનીય રહી છે.

ભારતની સરહદીય અને આંતરિક સુરક્ષા મોટો પડકાર

ભારત ક્ષેત્રફળની દૃષ્ટિએ દુનિયાનો સાતમો સૌથી મોટો દેશ છે અને આથી જ પાડોશી દેશો સાથેના દ્વિપક્ષીય સંબંધો આપણા માટે મહત્ત્વના બની રહે છે. પાકિસ્તાન અને ચીન જેવા પાડોશી દેશો હંમેશાં આપણી તાકાત તોડીને અવળચંડાઈ કરવા આતુર બેઠા હોય છે ત્યારે દેશમાં આંતરિક સુરક્ષા જાળવી રાખવી એ પણ મોટો પડકાર છે.

વર્ષ ૨૦૧૯માં ભારતે ચીનની આક્રમકતાનો જે દ્રઢતાપૂર્વક જવાબ આપ્યો છે તે જોતાં લાગે છે કે હવે આપણી ઈચ્છાશક્તિ અને તાકાત વધી રહ્યા છે. આગામી દાયકામાં પણ હજુ અનેક પડકારોનો સામનો આપણે કરવાનો છે અને દેશને આ રીતે જ વધુ મજબૂત પણ બનાવવાનો છે.

સંરક્ષણ ક્ષેત્રમાં હજુ પણ સુધારા કરવા પડશે

આપણે સંરક્ષણ ક્ષેત્રમાં હજુ પણ કેટલાક સુધારા કરીને આ પાસું મજબૂત કરવાની ખાસ જરૂર છે. આપણા દેશનું સંરક્ષણ બજેટ પણ હવે વધારવું પડશે અને તેમાં કેટલીક દીર્ઘકાલિન યોજનાઓ સામેલ કરવી પડશે. સંરક્ષણ ક્ષેત્રના નિષ્ણાતોના મતે ભવિષ્યના પડકારોને ધ્યાનમાં રાખીને આપણે જીડીપીનો ત્રણ ટકા હિસ્સો દેશની સુરક્ષા પાછળ વાપરવાની જરૂર છે. 

અનુશાસન, હકારાત્મક વિચારસરણી, સખત મહેનત અને સમપર્ણથી જ આપણે સૌ દેશને સફળતાના શિખર સુધી પહોંચાડી શકીશું. આપણે એકજૂથ થઈને સમગ્ર દુનિયાને આપણી અસલી તાકાત દેખાડવી પડશે.

કોરોના મહામારી પછી અર્થતંત્ર હવે પાટે ચડી રહ્યું છે

કોરોના મહામારીના સંકટ બાદ હાંફી ગયેલી અર્થવ્યવસ્થા હવે પાટે ચઢી ગઈ છે અને આપણે આત્મનિર્ભર બનવાની દિશામાં આગેકૂચ કરી રહ્યા છીએ ત્યારે આગામી દાયકામાં ઝનૂન સાથે માંડવામાં આવેલું એક એક પગલું પણ દેશને નવી તાકાત પ્રદાન કરશે.

દેશની ધુરા હવે નવયુવાનોના હાથમાં

‘વોટ બેન્કની રાજનીતિ’ આપણા સમાજ અને દેશમાં હંમેશાં ભાગલા પડાવતી રહી છે. આ ચિત્ર બદલવાનો સમય હવે આવી ગયો છે. બાળકો અને નવયુવાનોમાં રાષ્ટ્રવાદની ભાવના વધારવાથી આ પ્રકારની સમસ્યાનો કાયમી અંત આવી શકે છે. 

આગામી દાયકામાં દેશને સશક્ત બનાવવા માટે આપણે રાષ્ટ્ર ધ્વજ, રાષ્ટ્રીય પ્રતિકો, રાષ્ટ્રગીત અને રાષ્ટ્રીય સિદ્ધિઓને વધુ મહત્ત્વ આપવાની જરૂર છે. ધાર્મિક અને પ્રાદેશિક આયોજનોના બદલે હવે રાષ્ટ્રીય કાર્યક્રમોને વધુ પ્રાથમિકતા આપવાનો સમય આવી ગયો છે. આગામી સમયમાં વધુ મજબૂતીથી વિશ્વમંચ પર બિરાજમાન થવા માટે આ બધું કરવું જ રહ્યું.