ભારતે અરુણાચલ પ્રદેશમાં લાઈન ઓફ એક્ચ્યુઅલ કન્ટ્રોલ (LAC)માં બોફોર્સ તોપ તહેનાત કરી દેતા જ ચીનના ગાત્રો શિથિલ થયા છે.
ભારતે LACમાં ઘાતક બોફોર્સ તોપ તહેનાત કરી
અરુણાચલના ફોરવર્ડ એરિયામાં બોફોર્સ ગોઠવાઈ
ચીનના ગાત્રો શિથિલ થયા
હવે સરહદે છમકલા ચીનને પડશે ભારે
છેલ્લા ઘણા સમયથી ચીન લદ્દાખમાં લાઈન ઓફ એક્ચ્યુઅલ કન્ટ્રોલમાં છમકલા કરી રહ્યું છે. ચીનની આ હરકતથી તંગ ભારતે અરુણાચલ પ્રદેશમાં આવેલી તેને સીમામાં બોફોર્સ તોપને તહેનાત કરી દીધી છે. અરૃણાચલ પ્રદેશમાં ચીન સાથેની એડવાન્સ ચોકીઓમાં બોફોર્સ તહેનાત કરાઈ છે.
ભારતીય સેનાએ ચીન સાથેની સરહદે રખેવાળી વધારી દીધી
ભારતીય સેનાએ ચીન સાથેની સરહદે રખેવાળી વધારી દીધી છે. ચીનની કોઈ પણ ચાલબાજીને જડબાતોડ જવાબ આપવા ભારતીય સેનાએ તૈયારી કરી લીધી છે. તેને માટે એડવાન્સ વિસ્તારોમાં બોફોર્સ તોપોને તહેનાતી કરવામાં આવી છે.
શું છે બોફોર્સ તોપ
ઉલ્લેખનીય છે કે બોફોર્સ તોપોએ જ કારગીલ યુદ્ધમાં પાકિસ્તાનને ધૂળ ચાટતું કરી દીધું છે. બોફોર્સ તોપ 27 કિલોમીટર દૂર ગોળા ફેંકી શકે છે. બોફોર્સ તોપની ગણતરી દુનિયાની સૌથી ઘાતક તોપમાં થાય છે. હળવા વજનને કારણે બોફોર્સને યુદ્ધભૂમિમાં ક્યાંય પણ ગોઠવી શકાય છે અને દુશ્મનને ધૂળ ચાટતો કરી શકાય છે. 155 mm વાળી આ લાંબી તોપમાં એક મિનિટમાં 10 ગોળા ફેંકવાની ક્ષમતા છે. આ તોપ પહાડી વિસ્તારમાં ઘણી ઉપયોગી પુરવાર થાય છે.
એલ70 એન્ટી એરક્રાફ્ટ ગન પણ તૈનાત
ભારતીય સેનાએ એલએસી નજીકના પર્વતોમાં અપગ્રેડ કરેલી એલ70 એન્ટી એરક્રાફ્ટ ગન પણ તૈનાત કરી છે. લશ્કરી અધિકારીઓએ જણાવ્યું હતું કે બે-ત્રણ મહિના પહેલા અરુણાચલ પ્રદેશમાં અનેક મહત્વપૂર્ણ સ્થળોએ અપગ્રેડ કરેલી એલ-70 બંદૂકો તૈનાત કરવામાં આવી છે. આ શસ્ત્રોની વિશેષતા એ છે કે તેને સરળતાથી એક જગ્યાએથી બીજી જગ્યાએ પહોંચાડી શકાય છે. આ શસ્ત્રો ઓટોમેટિક ટાર્ગેટિંગ દ્વારા ચલિત થાય છે. તદુપરાંત તે તમામ પ્રકારના હવામાનમાં આગળ ઉભા રહીને દુશ્મનોને જવાબ આપવા સક્ષમ છે.
અરુણાચલ પ્રદેશને લઈને ચીન સાથે ભારતનો વિવાદ જૂનો છે. ચીન અરુણાચલ પ્રદેશને તિબેટનો ભાગ માને છે અને તેનો દાવો કરે છે. ભારત સતત ચીનના અભિપ્રાયનો વિરોધ કરી રહ્યું છે અને અરુણાચલ પ્રદેશને ભારતનું અભિન્ન અંગ ગણાવી રહ્યું છે. ચીને તાજેતરમાં દેશના ઉપરાષ્ટ્રપતિ વેંકૈયા નાયડુની અરુણાચલ પ્રદેશની મુલાકાત સામે વાંધો ઉઠાવ્યો હતો. ચીનના વિદેશ મંત્રાલયના પ્રવક્તાએ કહ્યું હતું કે તેણે અરુણાચલ પ્રદેશને માન્યતા આપી નથી. ભારતે ચીનના નિવેદનની સખત નિંદા કરી હતી.