ભારતમાં કોરોના વાયરસનો કહેર અટકવાનું નામ નથી લઇ રહ્યો. દેશમાં બુધવાર રાત્રિ સુધીમાં કોવિડ-19ના કુલ કેસ 6 લાખને પાર થઇ ચૂક્યા છે. જેમાં અંદાજિત 17,700 લોકોના મોત થઇ ચૂક્યા છે. ભારત સૌથી વધુ કેસ મામલે હાલ ચોથા નંબર પર છે. ત્યારે પાંચ દિવસની અંદર રશિયાને પાછળ છોડીને ત્રીજા નંબર પર આવી શકે છે. દુનિયામાં સૌથી વધુ કેસ અમેરિકામાં છે. અહીં અત્યાર સુધીમાં 27 લાખથી વધુ કેસ આવી ચૂક્યા છે. દુનિયાની આ મહાશક્તિ કહેવાતા દેશમાં 1.30 લાખ લોકોના કોરોનાના કારણે મોત થઇ ચૂક્યા છે.
ભારત સૌથી વધુ કેસ મામલે વિશ્વમાં ચોથા નંબરે
ભારત સૌથી વધુ કેસ મામલે એશિયામાં પ્રથમ નંબરે
દુનિયામાં સૌથી વધુ કેસ અમેરિકામાં
ભારતમાં બુધવારે કોવિડ-19ના અંદાજિત 16 હાજર 200 નવા કેસ આવ્યા. વર્લ્ડોમીટરના અનુસાર, નવા કેસ આવવાની સાથે જ ભારતમાં કોરોનાના કુલ કેસ 6.02 લાખ પહોંચી ગયા. દેશમાં આ મહામારીથી અત્યાર સુધીમાં 17,786 લોકોના મોત થઇ ચૂક્યા છે. જેમાં બુધવારે થયેલા અંદાજિત 376 મોત સામેલ છે. મહામારીના આ સંકટમાં ભારત માટે એક જ આશાનું કિરણ દેખાય છે કે દેશમાં રિકવરી રેટ સારો છે. દેશમાં જેટલા લોકો અત્યાર સુધી કોરોનાથી સંક્રમિત થયા છે, તેમાંથી 60 ટકા સ્વસ્થ થઇ ચૂક્યા છે.
ભારતમાં 31 મેના રોજ 1.90 લાખ કોરોના કેસ હતા. આગામી 31 દિવસમાં 4.12 લાખ કેસ આવ્યા અને હવે આ આંકડા 6 લાખને પાર થઇ ચૂક્યા છે. દેશમાં અત્યાર સુધીમાં 3,57,665 લોકો કોરોનાથી સંક્રમિત થઇને સાજા થઇ ચૂક્યા છે. દેશમાં અંદાજિત 2,26,582 એક્ટિવ કેસ છે.
હાલ દુનિયામાં અંદાજિત 1.07 કરોડ કેસ છે. જેમાંથી અંદાજિત 54 લાખ માત્ર ચાર દેશોમાં છે. આ દેશ અમેરિકા, બ્રાઝીલ, રશિયા અને ભારત છે અમેરિકામાં આ સમયે 27.45 લાખ કેસ છે. બ્રાઝીલ 14.29 લાખ કેસ કેસ સાથે બીજા નંબરે છે. રશિયા (6.55 લાખ) ત્રીજા અને ભારત (6.02 લાખ) ચોથા નંબર પર છે.
ભારત સૌથી વધુ કેસ મામલે એશિયામાં પ્રથમ નંબર પર છે. એશિયામાં બુધવાર રાત્રે અંદાજિત 23.42 લાખ કેસ હતા. જેમાંથી 6 લાખ ભારતમાં છે. એટલે કે, એશિયાના 25 ટકા કેસ ભારતમાં છે. એશિયામાં સૌથી વધુ કેસ મામલે ઈરાન બીજા, પાકિસ્તાન ત્રીજા, તુર્કી ચોથા, સાઉદૂ અરબ પાંચમાં અને બાંગ્લાદેશ છઠ્ઠા નંબર પર છે. ઈરાનમાં 2.30 લાખ અને પાકિસ્તાનમાં 2.13 લાખ કેસ છે. તુર્કીમાં 2 લાખ અને સાઉદી અરબ 1.95 લાખ કેસ છે. બાંગ્લાદેશમાં 1.50 લાખ કેસ છે.