ભારતમાં કોરોના વાયરસના કેસની સંખ્યા ચીનથી વધી ગઇ છે. તાજેતરમાં પ્રાપ્ત થયેલ આંકડા પ્રમાણે ભારતમાં કોરોના સંક્રમિતોની સંખ્યા 85,546 પહોંચી ચૂકી છે. જ્યારે ચીનમાં 82933 લોકો તેની ઝપેટમાં આવી ચૂક્યા છે. દુનિયાભરમાં કોરોના વાયરસના આંકડા પર નજર રાખતી worldometers.info વેબસાઇટના જણાવ્યા પ્રમાણે ચીનમાં શુક્રવારે માત્ર 4 મામલા જ સામે આવ્યા હતા. જ્યારે ભારતમાં 3,549 નવા કેસ નોંધાયા હતા.
સમગ્ર વિશ્વમાં કોરોના વાયરસે મચાવ્યો હાહાકાર
ચીન કરતા ભારતમાં કોરોનાના દર્દીની સંખ્યા વધી
જગત આખામાં હાહાકાર મચાવનાર કોરોના વાયરસની શરૂઆત ચીનના વુહાન શહેરથી થઇ હતી અને જોત-જોતામાં અહીં હજારોની સંખ્યામાં લોકો તેની ઝપેટમાં આવી ચૂક્યા હતા. પરંતુ આજે ચીન સૌથી વધુ કોરોના વાયરસના કેસની યાદી ધરાવતા રાષ્ટ્રોની સૂચિમાં નથી. આ યાદીમાં ભારત 11મું સ્થાન ધરાવે છે અને ચીન 12 નંબરનું સ્થાન ધરાવે છે.
મૃત્યુઆંકમાં ચીન આગળ
ચીનમાં કોરોના વાયરસના દર્દીઓની સંખ્યામાં મોટો ઘટાડો થયો છે. ત્યારે હવે અહીં એકાદ-બે મામલા જ સામે આવી રહ્યા છે. તો બીજી તરફ ભારતમાં કોરોના વાયરસના દર્દીઓની સંખ્યા ચિંતાજનક રીતે વધી રહી છે. ચીનમાં કોરોનાને કારણે 4633 લોકોના મોત થયાં છે. ત્યારે ભારતમાં હજી 2,746 લોકોના મોત થયાં છે.
મહત્વનું છે કે ચીનમાં પહેલો કેસ 31 ડિસેમ્બરના રોજ નોંધાયો હતો જ્યારે ભારતમાં પ્રથમ કેસનો મામલો 30 જાન્યુઆરી કેરલમાં સામે આવ્યો હતો.
જ્યારે ચીને લૉકડાઉન 23 જાન્યુઆરીએ જાહેર કર્યુ હતું અને ભારત 25 માર્ચ એટલે કે 55 દિવસ બાદ લૉકડાઉન જાહેર કર્યુ હતું. ચીનમાં કુલ 76 દિવસ સુધી લૉકડાઉન રહ્યું હતું. આ બાજુ ભારતમાં 17 મે સુધી ત્રણ તબક્કામાં કુલ 54 દિવસનું લૉકડાઉન રહ્યું છે. બંને દશોને રિકવરી રેટની વાત કરીએ તો ચીનમાં 94 ટકા છે જ્યારે ભારતમાં 33 ટકા જ છે.
ટોપ ટેન દેશોની યાદી
અમેરિકા, સ્પેન, રશિયા, બ્રિટન, ઇટાલી, બ્રાઝિલ, ફ્રાંસ, જર્મની, તુર્કી અને ઈરાન આ ટોપ ટેનની યાદીમાં સ્થાન ધરાવે છે. કોરોના વાયરસથી અમેરિકામાં સૌથી વધુ હાહાકાર મચ્યો છે. ત્યાં 14 લાખ 60 હજાર વધુ લોકો કોરોનાને ઝપેટમાં આવી ચૂક્યા છે અને 87 હજારથી વધુ લોકોનાં મોત નીપજ્યાં છે.