ભારતમાં શુક્રવારે વિક્રમજનક 4 લાખ 20 હજાર 898 કોવિડ 19ના ટેસ્ટ કરવામાં આવ્યા હતા જે દેશમાં અત્યાર સુધીના સૌથી વધારે છે. દેશમાં છેલ્લા કેટલાક દિવસથી દરરોજના 3.5 લાખ ટેસ્ટ કરવામાં આવ્યા હતા.
ભારતમાં પ્રતિ દસ લાખની વસ્તીએ ટેસ્ટિંગનો આંકડો 11,485 ઉપર પહોંચ્યો છે. આ ઉપરાંત ભારતમાં અત્યાર સુધી કુલ 1 કરોડ 58 લાખ 49 હજાર 68 ટેસ્ટ કન્ડક્ટ કરવામાં આવ્યા છે. ભારતમાં અસરકારક મેનેજમેન્ટના પરિણામે કેસ ફેટાલિટી રેટ (CFR) વિશ્વની સરખામણીએ ઘણો ઓછો છે. દેશમાં થોડા દિવસ પહેલા CFR 2.49% હતો જે અત્યારે ઘટીને 2.35% થઇ ગયો છે.
છેલ્લા કેટલાક દિવસથી દેશમાં વિક્રમજનક રિકવરી નોંધાઈ રહી છે
આ ઉપરાંત દેશમાં રિકવરી રેટમાં પણ સુધારો છે. રિકવરી રેટ 63.54% છે જેમાં છેલ્લા 24 કલાકમાં 32,223 લોકો રિકવર થયા છે. આના આગલા દિવસે 34,602 લોકો રિકવર થયા હતા. છેલ્લા કેટલાક દિવસથી દેશમાં વિક્રમ જનક રિકવરી નોંધાઈ રહી છે. અત્યારે એક્ટિવ કેસ અને રિકવર કેસ વચ્ચેનો તફાવત 3,93,360 છે.
દેશમાં રાજ્યોને ટેસ્ટિંગ વધારવાનો કેન્દ્રનો આદેશ
દેશમાં અત્યાર સુધી 13 લાખ 36 હજારથી વધુ કોરોનાના કેસ નોંધાઈ ચુક્યા છે. જેમાંથી આશરે 8.5 લાખ લોકો રિકવર થઇ ચુક્યા છે. ભારતમાં કોરોનાથી 31 હજારથી વધુ લોકો મોતને ભેટ્યા છે જેમાંથી 757 મોત છેલ્લા 24 કલાકમાં નોંધાયા છે.
મહારાષ્ટ્ર અને તામિલનાડુ દેશમાં સૌથી વધુ કેસ સાથે છે જયારે દિલ્હી ત્રીજા ક્રમે છે. સરકારે આ મામલે રાજ્યોને વધુમાં વધુ ટેસ્ટિંગ કરવાની સૂચના આપી છે. કેન્દ્ર સરકારનો તર્ક છે કે આમ કરવાથી 24 કલાકમાં નોંધાતા નવા કેસમાં ઉછાળો આવશે પરંતુ લાંબા સંક્રમણ ફેલાતું અટકાવવામાં મદદ મળશે.