ભારત અને ચીન વચ્ચે લદાખમાં લાંબા સમયથી ઘર્ષણ ચાલુ છે. એવામાં હવે મોસમની માર પણ આ વિસ્તારોમાં પડવાની છે, હાડ થીજવતી ઠંડીમાં આ વિસ્તારમાં ઉભા રહેવું પણ પડકાર સાબિત થાય છે ત્યારે મીડિયા અહેવાલ અનુસાર ઠંડીના કારણે આ વિસ્તારોમાં ફેરફાર જોવા મળી શકે છે.
લદાખની સરહદ પર -40 ડીગ્રી સુધી જતું રહે છે તાપમાન
લદાખમાં અથડામણ થઇ હતી ત્યારે પણ સૈનિકો માટે ઠંડી પણ દુશ્મન બની હતી
સૈનિકો માટે સ્પેશ્યલ ટેન્ટની તૈયારીઓ શરુ
લદાખની ગલવાન ખીણમાં શૂન્યથી પણ નીચે તાપમાનમાં ભારત અને ચીન વચ્ચે થયેલ હિંસક અથડામણ થઇ હતી ત્યારે મોટી સંખ્યામાં સૈનિકો હાઈપોક્સિયાના શિકાર થઇ ગયા. આટલી ઊંચાઈ પર શરીરમાં ઓક્સિજન લેવલ ઓછું થઇ ગયું જ્યારે બીજી તરફ શરીરમાં ઈજા અને ઠંડીના કારણે સૈનિકો હાઈપોથર્મિયાના પણ શિકાર થઇ ગયા.એવામાં આવતા મહિનાથી આ વિસ્તારમાં બંને દેશના સૈનિકો માટે ડ્યુટી કરવી ખૂબ કરવી ખૂબ અઘરી થઇ જશે. આ કારણે LAC પર પરિસ્થિતિઓ બદલાઈ શકે છે.
ભારતીય સૈન્ય કમાન્ડરોએ મીડિયાને આપેલ જાણકારીઓ અનુસાર સપ્ટેમ્બર મહિનામાં લદાખમાં ખૂબ ઝડપથી મોસમ બદલાઈ જાય છે. શિયાળામાં લદાખમાં તાપમાન -40 ડીગ્રી સુધી ગબડી જાય છે એવામાં સરહદ પર આટલી ઊંચાઈ પર ઉભા રહેવું ખૂબ મોટો પડકાર છે. સેનાના અધિકારીઓનું માનવું છે કે વર્તમાન વિવાદ હજુ લાંબો ચાલશે અને ચીને પોતાના સૈનિકો માટે સ્પેશીયલ ટેન્ટ લગાવવાની પણ શરૂઆત કરી દીધી છે.
ભારતના સૈનિકો આવા સમયમાં સ્પેશીયલ ટેન્ટમાં જ રહે છે અને આ વખતે સૈનિકોની સંખ્યા ખૂબ વધારે હોવાથી વધારે ટેન્ટની જરૂર પડશે. બીજી તરફ ચીન પણ આ બધા પડકારોનો સામનો કરવા માટે તૈયારીઓ કરી રહ્યું છે. ચીનની સેના ઠંડીમાં પણ તહેનાત રહેવા માટે સામાન ભેગો કરી રહી છે.