કોરોના સંકટ બાદ ભારત હવે વૈશ્વિક મેન્યુફેક્ચરિંગ હબ બની શકે છે. ઘણા અર્થશાસ્ત્રીઓ કહી રહ્યા છે અને સરકાર પણ આ દિશામાં ઝડપથી કામ કરી રહી છે. છેલ્લા બે મહિનામાં કોરોના વાયરસને કારણે પરિસ્થિતિઓ એટલી બદલાઈ ગઈ છે કે ભારતને તેની શક્તિનો અહેસાસ થઈ ગયો છે.
ભારત વિશ્વમાં PPE કીટ બનાવવાના મામલે બીજા સ્થાને પહોંચી ગયું છે
PPE કીટ્સનું ટર્નઓવર આશરે 7000 કરોડ રૂપિયા થઇ ગયું છે
હકીકતમાં, જેના માટે ભારત હંમેશાં ચીન સહિતના અન્ય દેશો પર નિર્ભર હતું આજે ભારતે તેનો સિક્કો એ જ ક્ષેત્રમાં જમાવ્યો છે. કોરોના વાયરસ ફાટી નીકળતાં પહેલાં ભારત પર્સનલ પ્રોટેક્ટીવ ઇક્વિપમેન્ટ (PPE)કીટની સપ્લાય માટે વિદેશ ઉપર આધાર રાખવો પડતો હતો. કારણ કે ક્લાસ 3 કક્ષાની PPE કિટ્સ માર્ચ પહેલા ભારતમાં બનાવવામાં આવતી ન હતી.
સ્ટાન્ડર્ડ PPE કીટનું નિર્માણ ભારતમાં ફેબ્રુઆરી 2020 પહેલાં થતું ન હતું
પરંતુ હવે કોરોના વાયરસે ભારતને આત્મનિર્ભર બનાવ્યું છે. સ્ટાન્ડર્ડ PPE કીટનું નિર્માણ ભારતમાં ફેબ્રુઆરી 2020 પહેલાં થતું ન હતું. તે દરમિયાન જ્યારે કોરોના વાયરસ વિશ્વમાં હાહાકાર મચાવવા લાગ્યો ત્યારે ભારતે પણ આ મહામારી સામે લડવાની તૈયારી શરૂ કરી અને વિદેશથી 52,000 કીટ મંગાવવામાં આવી. પરંતુ જે ગતિથી કોરોના કેસ સામે આવ્યા તે પ્રમાણે વિદેશી PPE કિટ્સ ઓછી પડવા લાગી.
ભારત વિશ્વમાં PPE કીટ બનાવવાના મામલે બીજા સ્થાને પહોંચી ગયું છે
નોંધનીય છે કે USA, ચીન અને યુરોપિયન દેશોમાં મોટા પાયે PPE કીટ બનાવવામાં આવે છે અને ભારત અહીંથી તેને આયાત કરતું હતું. પરંતુ હવે આંતરરાષ્ટ્રીય ધોરણની PPE કીટ્સ ભારતમાં જ બનાવવામાં આવી રહી છે. જો તમે ઉત્પાદનના આંકડા પર નજર નાખો તો આજે ભારત વિશ્વમાં PPE કીટ બનાવવાના મામલે બીજા સ્થાને પહોંચી ગયું છે. ભારતમાં WHO ધોરણ મુજબના 106 મેન્યુફેક્ચર્સ હાલમાં PPE કીટ બનાવવાના કામે લાગી ચુક્યા છે. આટલું જ નહીં દેશમાં ખૂબ જ ઓછી કિંમતે શ્રેષ્ઠ ગુણવત્તાની PPE કીટ તૈયાર કરવામાં આવી રહી છે. અને આ બધું છેલ્લા બે મહિનામાં બન્યું છે. માર્ચના અંતિમ સપ્તાહમાં, ભારતને WHO તરફથી PPE કીટ બનાવવા માટે લીલી ઝંડી મળી હતી.
દરરોજ 1.7 લાખ PPE કીટ તૈયાર થાય છે
મળતી માહિતી મુજબ હાલમાં ભારતમાં દરરોજ 1.7 લાખ PPE કીટ તૈયાર થાય છે અને દરરોજ 2 લાખ કીટનું ઉત્પાદન કરવાનું લક્ષ્ય છે. હકીકતમાં, ટેક્સટાઇલ મંત્રી સ્મૃતિ ઈરાનીના નેતૃત્વમાં ભારતમાં રેકોર્ડ સ્તરે PPE કીટ બનાવવાનું શક્ય બન્યું છે. ટેક્સટાઇલ મંત્રી સ્મૃતિ ઈરાની એ તેમના મંત્રાલય દ્વારા દેશમાં માસ્ક અને PPE કિટ્સ અંગે ઝડપી પગલાં લીધાં, અનેક ગારમેન્ટ્સ અને જૂટ(શણ) કંપનીઓને PPE કીટ બનાવવાનું કામ સોંપવામાં આવ્યું છે. આ હેતુ માટે, એક વર્કશોપ પણ યોજવામાં આવ્યો હતો.
રેકોર્ડ ઉત્પાદન હોવા છતાં, ટેક્સટાઈલ મંત્રાલયે PPE કીટ્સના નિકાસ પર પ્રતિબંધ મૂક્યો છે
આજે ભારત એટલી બધી PPE કીટ બનાવી રહ્યું છે કે તેની નિકાસ થઈ શકે છે. જો કે, રેકોર્ડ ઉત્પાદન હોવા છતાં, ટેક્સટાઈલ મંત્રાલયે PPE કીટ્સના નિકાસ પર પ્રતિબંધ મૂક્યો છે. આરોગ્ય મંત્રાલયના જણાવ્યા અનુસાર જો કોરોનાના કેસોમાં વધારો થાય તો દેશમાં જૂન સુધીમાં 2 કરોડ PPE કીટની જરૂર પડી શકે છે.
PPE કીટ્સનું ટર્નઓવર આશરે 7000 કરોડ રૂપિયા થઇ ગયું છે
નોંધપાત્ર વાત એ છે કે બે મહિનાથી ઓછા સમયમાં ભારતે PPE કીટ બનાવવામાં બીજો ક્રમ મેળવ્યો છે. સરકારને અનેક એરલાઇન્સના પીપીઈ કિટ્સ માટે ઓર્ડર મળ્યા છે, અને કીટની માંગ વિદેશથી પણ આવી રહી છે. ભારતમાં PPE કીટ્સનું ટર્નઓવર આશરે 7000 કરોડ રૂપિયા થઇ ગયું છે. એટલું જ નહીં, નિષ્ણાતો જણાવી રહ્યા છે કે આવનારા દિવસોમાં દેશમાં આ કારોબારનો વધુ ઝડપથી વિકાસ થશે.