T-20માં બાંગ્લાદેશને 6 વિકેટ હરાવીને ટીમ ઇન્ડિયાએ મેળવી શાનદાર જીત

શ્રીલંકા રમાઇ રહેલી ટ્રાઇ T-20 સીરિઝની બીજી મેચમાં ટીમ ઇન્ડિયાએ બાંગ્લાદેશને 6 વિકેટે હરાવ્યું. બાંગ્લાદેશે 20 ઑવર્સમાં 8 વિકેટમાં 139 રન ફટકાર્યા હતા જ્યારે ટાર્ગેટનો પીછો કરવા માટે આવેલી ટીમ ઇન્ડિયાએ 18.4 ઑવર્સમાં 6 વિકેટ ગુમાવીને ટાર્ગેટ પૂરો કરી દીધો. ટીમ ઇન્ડિયા તરફથી જયદેવ ઉનડકટે સૌથી વધુ 3 વિકેટ લીધી જ્યારે બેટિંગમાં ફરી એકવાર શિખર ધવને 55 રન કર્યા હતા. ટીમ ઇન્ડિયાને પહેલી T-20 મેચમાં શ્રીલંકાની સામે હારનો સામનો કરવો પડ્યો હતો. 

અગાઉ બાંગ્લાદેશના કેપ્ટન મહમુદુલ્લાહે ટૉસ જીતી પ્રથમ બેટિંગ કરવાનો નિર્ણય લીધો હતો. ટીમ ઇન્ડિયાના બોલર્સે શરૂઆતની બે ઓવર્સને છોડી દેતા આખી ઈનિંગ દરમિયાન બાંગ્લાદેશી બેટ્સમેનોને છૂટથી રન લેવા દીધા નહોતા. ફિલ્ડીંગમાં અપેક્ષાનુસારનું પ્રદર્શન ન હોવા છતા ભારત બાંગ્લાદેશને 139 રનના સામાન્ય સ્કોર સુધી મર્યાદિત રાખી શકી હતી. બાંગ્લાદેશ તરફથી લિટન દાસે 34 અને શબ્બીર રહેમાને 30 રનની ઈનિંગ રમી હતી.

ટાર્ગેટ પૂરો કરવા આવેલી ટીમ ઇન્ડિયાના ઑપનર્સે સારી શરૂઆત કરી. કેપ્ટન રોહિત અને ધવન સેટ થઈ ગયા હોય તેમ લાગતું હતું એવા જ સમયે મુસ્તફિઝુરે રોહિતને 17 રને અને બાદમાં રુબેલ હસને રિષભ પંતને 7 રન પર આઉટ કરી દેતા ટીમ ઇન્ડિયા ભીંસમાં આવી ગયું હતું. જોકે ચોથા ક્રમે આવેલા સુરૈશ રૈના(28)એ ધવન સાથે મળીને ટીમનો સ્કોર આગળ વધાર્યો હતો. બંને વચ્ચે ત્રીજી વિકેટ માટે 68 રનની મહત્વપૂર્ણ ભાગીદારી કરી ટીમને જીતની નજીક પહોંચાડી દીધી હતી. શિખર ધવને સૌથી વધારે 43 બૉલમાં 5 બાઉન્ડ્રી અને 2 સિક્સર્સની મદદથી 55 રન કર્યા ધવને સતત બીજી T-20 મેચમાં હાફ સેન્ચુરી અને T-20 કરિયરની છટ્ઠી હાફ સેન્ચુરી છે 

સીરિઝની ત્રીજી મેચ 10 માર્ચના શ્રીલંકા અને બાંગ્લાદેશની વચ્ચે કોલંબોમાં રમવામાં આવશે. જણાવી દઇએ કે સીરિઝની પહેલી મેચમાં શ્રીલંકાએ ટીમ ઇન્ડિયાને હરાવી હતી હવે ટીમ ઇન્ડિયા અને શ્રીલંકાના 2-2 પૉઇન્ટ થઇ ગયા છે.