વર્ષ 2018-19માં દેશભરમાં સરકારી શાળાઓની સંખ્યામાં ઘટાડો થયો છે. જ્યારે ખાનગી શાળાઓની સંખ્યામાં 3.6 ટકાનો વધારો થયો છે. શાળા શિક્ષણ વિભાગના એક એકમ UDISE ના અહેવાલ મુજબ, વર્ષ 2018-19માં સરકારી શાળાઓની સંખ્યા 10 લાખ 83 હજાર 678 હતી, જે વર્ષ 2019-20માં ઘટીને 10 લાખ 32 હજાર 570 થઈ ગઈ છે. રિપોર્ટના ડેટા અનુસાર, દેશભરમાં 51 હજાર 108 સરકારી શાળાઓ બંધ કરવામાં આવી છે.
દેશમાં ખાનગી શાળાઓની સંખ્યામાં 3.6 ટકાનો વધારો
આ સાથે ખાનગી શાળાઓની વાત કરીએ તો આ સંખ્યામાં વધારો થયો છે. દેશભરમાં ખાનગી શાળાઓની સંખ્યા પહેલાં 3 લાખ 25 હજાર 760 હતી જે હવે વધીને 3 લાખ 37 હજાર 499 થઈ ગઈ છે. જે મુજબ ખાનગી શાળાઓની સંખ્યામાં 3.6 ટકાનો વધારો થયો છે. ગત સપ્તાહે 2020-21નો ડેટા જાહેર કરવામાં આવ્યો હતો, જેમાં સરકારી શાળાઓની સંખ્યામાં ફરી ઘટાડો જોવા મળ્યો છે. હવે આ સંખ્યા ઘટીને 10 લાખ 32 હજાર 49 પર આવી ગઈ છે, જેનું કારણ કોરોના મહામારી હોવાનું માનવામાં આવી રહ્યું છે.
બિહાર અને બંગાળમાં સરકારી શાળાઓની સંખ્યામાં વધારો
ઉત્તર પ્રદેશમાં સરકારી શાળાઓની સંખ્યામાં 26,074 શાળાઓનો ઘટાડો જોવા મળ્યો છે. સપ્ટેમ્બર 2018માં શાળાઓની સંખ્યા 163,142 હતી જે સપ્ટેમ્બર 2020માં ઘટીને 137,068 થઈ ગઈ. જ્યારે મધ્ય પ્રદેશમાં શાળાઓની સંખ્યા ઘટીને 22,904 થઈ ગઈ છે. સપ્ટેમ્બર 2018માં શાળાઓની સંખ્યા 122,056 હતી જે સપ્ટેમ્બર 2020માં ઘટીને 99,152 થઈ ગઈ.
જો કે, કેટલાંક રાજ્યોમાં સરકારી શાળાઓની સંખ્યામાં થોડો વધારો જોવા મળ્યો હતો. બંગાળમાં સરકારી શાળાઓની સંખ્યા 82,876 થી વધીને 83,379 થઈ છે તો બિહારમાં તે 72,590 થી વધીને 75,555 થઈ ગઇ છે. જો કે, તમને જણાવી દઇએ કે UDISE પ્લસના રિપોર્ટમાં સરકારી શાળાઓની સંખ્યામાં ઘટાડો થવાના કારણો સમજાવવામાં નથી આવ્યા.