દિલ્હીના અરૂણ જેટલી સ્ટેડિયમમાં ગયા ગુરૂવારે ભારત અને સાઉથ આફ્રિકા વચ્ચે પાંચ મેચની ટી-20 શ્રેણીની પ્રથમ મેચ રમાઈ હતી. આ મેચમાં મેદાન પર બંને ટીમોની વચ્ચે કાટાની ટક્કર જોવા મળી હતી. આ મેચમાં સાઉથ આફ્રિકાએ બાજી મારી હતી.
ભારત અને સાઉથ આફ્રિકા વચ્ચેની મેચમાં થઇ હતી મારામારી
પેવેલિયનમાં બેઠેલા દર્શકો વચ્ચે થઇ હતી મારામારી
ત્રણ લોકોએ એક યુવક સાથે કરી મારામારી
પોલીસે વચ્ચે પડીને મામલો થાળે પાડ્યો
અરૂણ જેટલી સ્ટેડિયમમાં જ્યાં બેટરો રન પર રન વરસાવી રહ્યાં હતા તો પેવેલિયનમાં બેઠેલા દર્શકો વચ્ચે મારામારી થઇ હતી. સોશિયલ મીડિયામાં એક વીડિયો વાયરલ થયો છે, જે ભારત અને સાઉથ આફ્રિકાની વચ્ચેનો જણાવવામાં આવ્યો છે. આ વીડિયોમાં કેટલાંક દર્શકો મારામારી કરી રહ્યાં છે. આ વીડિયોમાં ત્રણ લોકો એક યુવકને મારી રહ્યાં છે અને આ યુવક એકલો ત્રણ યુવક સાથે લડી રહ્યો છે. આ દરમ્યાન ખૂબ હોબાળો થયો અને મુક્કાબાજી પણ થઇ. ત્યાં ઉભા રહેલા દર્શકો આ બધુ જોતા હતા. એટલામાં જ એક પોલીસકર્મી આવ્યો અને તેણે આ ઝઘડી રહેલા લોકોને અલગ કર્યા. જો કે, આ વિવાદ કયા કારણોસર થયો તેનુ કોઈ સાચુ કારણ સામે આવ્યું નથી.
આ મેચમાં ભારતીય બેટરોએ પ્રથમ બેટીંગ કરીને 20 ઓવરમાં 211 રનનો વિશાળ સ્કોર ઉભો કરી દીધો. આ સ્કોરને જોયા બાદ લાગી રહ્યું હતુ કે ભારતીય ટીમ આ મેચ સરળતાથી જીતી જશે. ટીમે શરૂઆત પણ સારી કરી હતી અને સાઉથ આફ્રિકાને પ્રારંભિક ઝટકા આપ્યાં હતા. પરંતુ ડેવિડ મિલર અને રાસી વેન ડર ડુસેએ ધમાકેદાર ઈનિંગ રમીને જીત તરફ કૂચ કરી હતી. ભારતે આ મેચમાં પાંચ બોલ પહેલા સાત વિકેટથી કારમી હારનો સામનો કરવો પડ્યો હતો. આ સાથે સાઉથ આફ્રિકા 1-0થી આગળ છે.