IND vs ENG / ભારતે બીજી ટી-20માં ઈંગ્લેન્ડને 49 રને હરાવીને સીરીઝ પોતાના નામે કરી, ભુવી સહિતના બોલરોનો ચાલ્યો જાદુ

• બીજી ટી-20માં ઇંગ્લેન્ડને 49 રને હરાવ્યું
• ભારતના નામે થઈ સીરીઝ
• રોહિત શર્મા અને પંતની જબરદસ્ત ઓપનિંગ

ઈંગ્લેન્ડને ભારતે 170 રનનો ટાર્ગેટ આપ્યો હતો, પરંતુ ભારતની દમદાર બોલિંગની સામે ઇંગ્લિશ બેટ્સમેનનો નિષ્ફળ સાબિત થયા અને ભારતને આ મેચમાં 49 રનના મોટા અંતરે જીત મળી.

ટીમ ઇન્ડિયાની ઇનિંગ પૂરી થઇ તો લાગ્યું કે 170 રન ક્યાંક ઓછા ન પડી જાય, પરંતુ ભારતીય ટીમની બોલિંગે એવો કમાલ કર્યો કે ઇંગ્લેન્ડ ટકી ન શક્યું. ઇંગ્લેન્ડની ટીમ માત્ર 121ના સ્કોર પર જ ઓલઆઉટ થઇ ગઈ. ખાસ વાત એ છે કે એજબેસ્ટનમાં જ ટીમ ઇન્ડિયાને ટેસ્ટ મેચમાં હારનો સામનો કરવો પડ્યો હતો અને હવે એજબેસ્ટનમાં જ ટી-20 સીરીઝમાં જીત મેળવીને તેનો બદલો લીધો છે.

• ભારતનો સ્કોર- 170(20)
• ઈંગ્લેન્ડનો સ્કોર- 121(17)

ટીમ ઇન્ડિયા તરફથી બોલિંગમાં સૌથી મોટા હીરો ભૂવનેશ્વર કુમાર સાબિત થયા, જેમણે 3 વિકેટ ઝડપી. ભુવીએ ફરી એકવાર સ્વિંગનો કમાલ દેખાડ્યો અને શરૂઆતમાં બન્ને ઓપનર્સને પવેલિયન ભેગા કર્યા. ભુવનેશ્વરે પોતાના સ્પેલમાં માત્ર 15 રન આપ્યા. ભુવને તે માટે પ્લેયર ઑફ ધ મેચનો એવોર્ડ મળ્યો. તો ભુવી સિવાય જસપ્રીત બુમરાહ અને યુજવેન્દ્ર ચહલે 2-2 વિકેટ ઝડપી. જ્યારે હાર્દિક પંડ્યા અને હર્ષલ પટેલે પણ 1-1 વિકેટ લીધી.

India seal the series in Birmingham.

🏴󠁧󠁢󠁥󠁮󠁧󠁿 #ENGvIND 🇮🇳 pic.twitter.com/mYFEqnqxkI

— England Cricket (@englandcricket) July 9, 2022

રોહિત શર્મા અને પંતની જબરદસ્ત ઓપનિંગ
આ મેચમાં પણ ટીમ ઇન્ડિયાએ પહેલા બેટિંગ કરી અને તાબડબોત શરૂઆત કરી. કેપ્ટન રોહિત શર્માની સાથે ઋષભ પંત ઓપનિંગ કરવા આવ્યા અને સૌને ચોંકાવી દીધા. બન્ને વચ્ચે 49 રનની પાર્ટનરશિપ થઈ, જેમાં રોહિત શર્માએ તોફાની 31 રન ફટકાર્યા. પહેલી વખત ઓપનિંગમાં આવેલા પંતે 26 રન બનાવ્યા.

રવિન્દ્ર જાડેજાએ બચાવી ટીમ ઇન્ડિયાની લાજ
ટીમમાં વાપસી કરી રહેલા વિરાટ કોહલી એક જ રન બનાવી શક્યા. આ સિવાય સૂર્યકુમાર યાદવ(15), હાર્દિક પંડ્યા(12) રન બનાવીને ફ્લૉપ થયા. અંતમાં ટીમ ઇન્ડિયાની લાજ રવિન્દ્ર જાડેજાએ બચાવી, જેમણે 29 બોલમાં 46 રન બનાવ્યા અને ટીમ ઇન્ડિયાને સ્કોરને 170 સુધી પહોંચાડ્યો.

ઈંગ્લેન્ડ સામે સતત 4થી ટી-20 સીરીઝ જીત

• 2017 - ભારત 2-1થી જીત્યું (ઇન્ડિયા)
• 2018 - ભારત 2-1થી જીત્યું (ઇંગ્લેન્ડ)
• 2021 - ભારત 3-2થી જીત્યું (ઇન્ડિયા)
• 2022 - ભારત 2-0થી આગળ (ઇંગ્લેન્ડ)