ચૂંટણી / સાબરકાંઠામાં આ નેતાના અનોખા પ્રચારને કારણે જબરી લોકપ્રિયતા મળી રહી છે

હજુ ભારતીય નાગરિકોની નજર સામેથી વિંગ કમાન્ડર અભિનંદન વર્ધમાન અને તેની પાણીદાર મૂછો ઓઇલ થઈ નથી. ગત દિવસોમાં ભારતીય નાગરિકોનાં દિમાગ પર જે રાષ્ટ્રવાદ ચરમસીમા પર હતો તેને અભિનંદન વર્ધમાનની મૂછો પણ તાવ ચડાવી રહી હતી. પાકિસ્તાન સામેની દાઝ અને અભિનંદનની વિજેતા મૂછો જાણે એકબીજાનાં પર્યાય બની ગયાં હતાં. પરંતુ હવે મોસમ લોકશાહીનાં પર્વની ચાલુ થઈ છે.

નેતાઓ પ્રચારકાર્ય માટે જનસંપર્કમાં લાગી ગયાં છે. ત્યારે વિવિધ પક્ષનાં ઉમેદવારો માત્ર વાયદા અને વચનોનો જ રસથાળ લઈને મતદારો પાસે નથી જઈ રહ્યાં. પરંતુ ઉમેદવારો હવે પોતાની સ્ટાઈલથી પણ મતદારોને આંજવાનો પ્રયાસ કરી રહ્યાં છે. દૂર ક્યાંય જવાની જરૂર નથી આ અદભૂત અને ઘાટી દાઢી-મૂછોવાળાં અપક્ષ ઉમેદવાર મગનભાઈને જ જુઓને. સાબરકાંઠા બેઠક પર અપક્ષ ઉમેવાર તરીકે ચૂંટણી લડી રહેલાં મગનભાઈની મૂછો સામે જોશો તો જોતાં જ રહી જશો.

ઉમેદવાર મગનભાઈની આ મૂછો જેટલી ઘાટી છે તેટલી લાંબી પણ છે. તમે મગનભાઈની મૂછો જોશો તો પછી નથુલાલની મૂછો ભૂલી જશો અને એવું બોલતા થઈ જશો કે `મૂછે હો તો મગનલાલ જૈસી' સબારકાંઠા જિલ્લા લોકસભા બેઠક પરથી 20 ઉમેદવારો ચૂંટણી લડી રહ્યાં છે, જેમાંથી અપક્ષ ઉમેદવારોમાંથી મગનભાઈ અનેક મતદારોને મૂછાળા મગનભાઈ સોલંકીમાં રસ પડ્યો છે. જેનું કારણ છે મગનભાઈની મૂછો. મગનભાઈ પોતાની મૂછોને કારણે ધીરે-ધીરે લોકપ્રિય બની રહ્યાં છે.

પોતાની મૂછો પર તાવ દઈ રહેલાં અપક્ષ ઉમેદવાર મગનભાઈ કંઈ એમ જ આવી ઘટાટોપ અને પાણીદાર મૂછોનાં હકદાર નથી બન્યાં. આ અઢી-અઢી ફૂટ લાંબી મૂછોનાં ધારણકર્તા મગનભાઈ ભારતીય સેનામાં નાયબ સૂબેદાર તરીકે પણ ફરજ નિભાવી ચૂક્યાં છે. મગનભાઈ સોલંકી સૈન્યમાં વીરતા અને શૌર્ય દાખવતાં 6 મેડલ પણ મેળવી ચૂક્યાં છે. તેઓ કારગીલ યુદ્ધમાં પણ દુશ્મનનાં દાંત ખાટા કરવાની તક ચૂક્યાં નથી.

અનેક વર્ષો સુધી સરહદ પર ફરજ નિભાવીને દેશની સેવા કરનારા મગનભાઈ હવે સેવા નિવૃત્ત થયાં છે. પરંતુ કહેવાય છે ને કે સૈનિક ક્યારેક રિટાયર્ડ થતો નથી. દેશની સેવા કરી ચૂકેલાં મગનભાઈને હેવ રાજનીતિનાં માર્ગે સમાજસેવા કરવાની પ્રબળ ઈચ્છા છે. એટલે જો તો અનેક પક્ષોનાં રંગો અનુભવી ચૂકેલા મગનભાઈ સોલંકીએ સાબરકાંઠા બેઠક પર અપક્ષ ઉમેદવારી કરીને સમાજસેવા કરવા નવી ઈનિંગની શરૂઆતનો સંકેત આપી દીધો છે. તેમનો આ જુસ્સો ટકાવી રાખવામાં તેમનાં ધર્મપત્ની તેમને ઘણો સહયોગ આપી રહ્યાં છે. ઘરકામની જવાબદારી સાથે-સાથે તેમનાં પત્ની પણ મગનભાઈ સાથે પ્રચારમાં જોડાઈને લોકોને મત માટે અપીલ કરી રહ્યાં છે.

સાબરકાંઠા લોકસભા બેઠક પર અપક્ષ ઉમેદવારી કરી રહેલાં મગનભાઈ હાલ પ્રચારકાર્ય માટે જનસંપર્ક કરી રહ્યાં છે. ઠેર-ઠેર તેઓ લોકોને પોતાનો સામાજિક કાર્યનો એજન્ડા જણાવી રહ્યાં છે અને લોકોને મત માટે અપીલ કરી રહ્યાં છે. લોકોને તેમની વાતમાં તો રસ પડી જ રહ્યો છે. આ સાથે-સાથે લોકો તેમની મૂછોથી પણ આકર્ષાઈ રહ્યાં છે. નાના બાળકોથી માંડીને યુવાનો અને વડીલોમાં મગનભાઈની મૂછોએ આકર્ષણ જમાવ્યું છે.

મૂછ એ શૌર્ય, વીરતા, પરાક્રમ અને બહાદુરીનું પ્રતીક છે. એ વાત પણ એટલી જ સાચી છે કે, જેટલાં સાહસ અને હિંમતની જરૂર સરહદ પર સેવા કરવામાં પડે છે તેટલી જ હિંમત અને સાહસની જરૂર રાજનીતિમાં આવીને સેવા કરવામાં જરૂર પડે છે. કેમ કે, સરહદ પર માત્ર દુશ્મનો સામે જ લડવાનું હોય છે. જ્યારે રાજનીતિમાં તો દુશ્મનો ઉપરાંત અનેક લોભ અને પ્રલોભનો સામે પણ લડવું પડે છે. શું એક ભૂતપૂર્વ આર્મીમેન સેવાનો આ નવો જંગ જીતી શકશે?