વરસાદ / દક્ષિણ ગુજરાતમાં ઠેર-ઠેર મેઘ મહેર, ઉકાઇ ડેમમાં નવા નીર આવતા ધરતીપુત્રો ગેલમાં

ઉલ્લેખનીય છે કે, બીજી તરફ શહેરના ચોખવાડાથી ખુતારામપૂર ગામનો રોડ ધોવાઈ જતા વાહન-વ્યવહાર પણ ખોરવાયો હતો. બીજી તરફ નવસારી જિલ્લામાં પણ ધોધમાર વરસાદ પડ્યો. શહેર અને ગ્રામ્ય વિસ્તારોમાં પડી રહેલા અવિરત વરસાદના કારણે રસ્તાઓ નદી બની ગયા હતા. જેના કારણે લોકોને હાલાકીનો સામનો કરવો પડ્યો હતો. 

રસ્તાઓ ધોવાયા

સુરતના ઉમરપાડામાં ધોધમાર વરસાદ વરસી રહ્યો છે. ભારે વરસાદના કારણે અનેક વિસ્તારમાં પાણી ભરાયા છે. પાણીના પ્રવાહના કારણે રસ્તા ધોવાયા છે. ચોખવાડાથી ખુતારામપૂર ગામનો રોડ ધોવાયો છે.. રસ્તો ધોવાતા વાહન વ્યવહાર બંધ થયો છે. 

સિવિલ હોસ્પિટલમાં પાણી ભરાયા

સુરતમાં વહેલી સવારથી ધીમીધારે વરસાદ વરસી રહ્યો છે. વરસાદ આવતા અનેક વિસ્તારોમાં પાણી ભરાયા છે. વરસાદને પગલે સુરતની સિવિલ હોસ્પિટલમાં પાણી ભરાયા છે. પાણી ભરાવવાના કારણે દર્દીઓને હાલાકી ભોગવવાનો વારો આવ્યો છે. નિકાલની વ્યવસ્થા ન હોવાના કારણે સિવિલ હોસ્પિટલ પાસે પાણી ભરાયા છે. 

ઉકાઈ ડેમમાં આવ્યા નવા નીર

સમગ્ર દક્ષિણ ગુજરાતમાં વરસાદ મન મુકીને વરસી રહયો છે ત્યારે તાપી જિલ્લામાં સવારથી મેઘરાજા એ ધમાકેદાર એન્ટ્રી કરી હતી. દક્ષિણ ગુજરાતની જીવાદોરી સમાં ઉકાઈ ડેમમાં પણ 4200 ક્યૂસેક નવા નીરની આવક થઈ છે. હાલ ઉકાઈ ડેમની સપાટી 275.78 ફૂટે પહોંચી છે. જેને લઈ ને ધરતી પુત્રોમાં આનંદની લાગણી ફેલાઇ ગઈ છે.