Bloomberg Index / ભારતીય અબજોપતિઓની આવક ઘટી, બીજાથી ત્રીજા ક્રમે સરક્યા અદાણી, અંબાણી ટોપ 10માંથી બહાર 

• બ્લૂમબર્ગ બિલિયોનેર્સ ઈન્ડેક્સ મુજબ ભારતીય અબજોપતિઓની આવક ઘટી 
• વિશ્વના સૌથી અમીર લોકોની યાદીમાં ગૌતમ અદાણી ફરી એકવાર ત્રીજા સ્થાને 
• મુકેશ અંબાણી ટોપ 10માંથી બહાર, અમીર લોકોની યાદીમાં અંબાણી 11માં  સ્થાને સરક્યા 

તાજેતરના Bloomberg  Indexના રિપોર્ટ મુજબ ભારતીય અબજોપતિઓની આવક ઘટી છે. જેમાં વિશ્વના સૌથી અમીર લોકોની યાદીમાં ગૌતમ અદાણી ફરી એકવાર ત્રીજા સ્થાને આવી ગયા છે. સોમવારે ભારતીય બજારમાં આવેલા મોટા ઘટાડાને કારણે આવું થયું હોવાનું મનાઈ રહ્યું છે. જે બાદ ગૌતમ અદાણીની કંપનીઓના શેરના ભાવમાં ઘટાડો થયો છે.

મહત્વનું છે કે, ગઈકાલે અદાણી જૂથની કંપનીઓના શેરમાં જોરદાર ઘટાડો જોવા મળ્યો હતો અને ગૌતમ અદાણીની નેટવર્થમાં $6.91 બિલિયનનો ઘટાડો થયો હતો. જેના કારણે તેઓ વિશ્વના અમીરોની યાદીમાં ત્રીજા સ્થાને સરકી ગયા હતા અને એમેઝોનના જેફ બેઝોસ ફરી એકવાર આગળ નીકળી ગયા હતા. સોમવારે જેફ બેઝોસની સંપત્તિમાં $1.36 બિલિયનનો વધારો થયો, ત્યારબાદ તેમની નેટવર્થ ઘટીને $138 બિલિયન થઈ ગઈ. આ સાથે ગૌતમ અદાણીની સંપત્તિ $ 6.91 બિલિયન ઘટીને $ 135 બિલિયન થઈ છે.

ભારતીય અબજોપતિઓની સંપતિમાં ઘટાડો અદાણી બીજાથી ત્રીજા ક્રમે ગબડ્યા, જેફ બેઝોસ ફરી આગળ નીકળ્યા#mukeshambani #gautamadani #vtvcard pic.twitter.com/SCCS2oj9Kg

— VTV Gujarati News and Beyond (@VtvGujarati) September 27, 2022

આ તરફ ભારતના મુકેશ અંબાણી બ્લૂમબર્ગ બિલિયોનેર્સ ઈન્ડેક્સમાં ટોપ 10ની યાદીમાંથી બહાર થઈ ગયા છે અને ગઈકાલે તેમની સંપત્તિમાં $2.83 બિલિયનનો ઘટાડો થયો છે. અમીર લોકોની યાદીમાં મુકેશ અંબાણી 11મા સ્થાને સરકી ગયા છે અને તેમની કુલ સંપત્તિ 82.4 બિલિયન ડોલર થઈ ગઈ છે. 10મા સ્થાને લેરી એલિસન છે, જેની કુલ સંપત્તિ $84.9 બિલિયન છે.

નોંધનિય છે કે, ગૌતમ અદાણી તાજેતરમાં જ એમેઝોનના જેફ બેઝોસને પાછળ છોડીને અમીરોની યાદીમાં બીજા ક્રમે આવ્યા હતા અને આવું કરનાર પ્રથમ એશિયન અને ભારતીય વ્યક્તિ બન્યા હતા. જોકે ગઈ કાલે અદાણીના શેરમાં થયેલા ઘટાડાને કારણે જેફ બેઝોસ ફરી એકવાર બીજા સ્થાને આવી ગયા છે અને ગૌતમ અદાણી ત્રીજા સ્થાને સરકી ગયા છે. જોકે આ આખા વર્ષની વાત કરીએ તો ગૌતમ અદાણીની નેટવર્થમાં $58.5 બિલિયનનો વધારો થયો છે જ્યારે બેઝોસની નેટવર્થમાં $54.3 બિલિયનનો ઘટાડો થયો છે.