મતદાનમાં ગરબડ / સ્થાનિક સ્વરાજની ચૂંટણીમાં એક સાથે 4 જિલ્લાઓમાં બોગસ મતદાનની ઘટના

• ગુજરાતની સ્થાનિક સ્વરાજની ચૂંટણીમાં બોગસ વોટિંગ
• 4 જિલ્લામાંથી બોગસ વોટિંગના સમાચાર
• પાટણ, કચ્છ, પોરબંદરમાં બોગસ વોટિંગ

ગુજરાતમાં સ્થાનિક સ્વરાજની ચૂંટણીના મતદાનમાં બોગસ વોટિંગની ઘટના સામે આવી છે. પોરબંદર, કચ્છ, પાટણ અને નવસારીમાં આ પ્રકારના કેસ નોંધાયા છે. કચ્છમાં 80 વર્ષિય વૃદ્ધાના નામે મતદાન કર્યું હતું. 

પાટણમાં બોગસ મતદાન થયું હોવાનો ખુલાસો સામે આવ્યો છે. વોર્ડ નં-7માં મતદારો મતદાન કરવા પહોંચ્યાના પહેલા જ મતદાન થયું હોવાનું સામે આવ્યું છે. માતા અને દીકરો  મતદાન કરવા પહોંચતા ભાંડો ફૂટ્યો હતો. માતા અને દીકરાના નામે  કોઇ અન્ય મતદાન કરી ગયુ હોવાનું સામે આવ્યું છે. મતદાન કર્યા વિના જ માતા-દીકરા પરત ફર્યા હતો. આ અંગે  અધિકારીઓએ દોષનો ટોપલો એજન્ટો પર ઢોળ્યો હતો.

પોરબંદરના બગવદરમાં બોગસ વોટિંગનો પ્રયાસ સામે આવ્યો છે. બગવદરમાં એક મતદાર દ્વારા બોગસ વોટિંગનો પ્રયાસ કરાયો હતો. સંવેદનશીલ ગણાતા બુથ પર બોગસ વોટિંગનો પ્રયાસ થયો છે. આ જિલ્લા ભાજપના અગ્રણીનો ગઢ ગણાય છે. શખ્સ બોગસ વોટિંગ કરે તે પહેલા જ પોલીસે અટકાવ્યો હતો. બગવદર પોલીસે અટકાયત કરી વધુ પૂછપરછ હાથ ધરી છે.

કચ્છના સામખિયાળી મતદાન કેન્દ્રમાં બોગસ મતદાન થયું છે. જેમાં 80 વર્ષીય વૃદ્ધ મહિલાના નામે અન્ય કોઈએ મતદાન કર્યુ હતું. વૃદ્ધ મહિલાનો વીડિયો વાયરલ થયો છે.

રાજ્યમાં સ્થાનિક સ્વરાજ્યની ચૂંટણી માટે મતદાન ચાલી રહ્યું છે. વહેલી સવારથી મતદારો મતદાન કરવા માટે પહોંચી રહ્યા છે. પરંતુ નવસારીમાં એક બોગસ મતદાર પકડાયો છે. નવસારીના વોર્ડ નંબર 8માં બોગસ મતદાર પકડાયો છે. કોંગ્રેસના કેટલાક કાર્યકરોએ શંકાના આધારે પૂછપરછ કરતા બોગસ મતદાર હોવાનું સામે આવ્યું છે. બોગસ મતદાન કરવા આવેલો યુવાન બહારના રાજ્યનો હોવાનું અનુમાન છે.