ઠંડીની સિઝનમાં શરીરને ચુસ્ત અને તંદુરસ્ત રાખવા લોકો વિવિધ પ્રકારનાં શાકભાજી આરોગતા હોય છે, તેમાં મૂળા ખાવાથી અનેક પ્રકારના ફાયદા મળે છે.
શિયાળામાં ખાસ ખાવા જોઈએ મૂળા
મૂળા ખાવાથી થાય છે અનેક પ્રકારના ફાયદા
મૂળા ખાવાથી બ્લડ પ્રેશર નિયંત્રણમાં રહે છે
મૂળા ન માત્ર સ્વાદમાં સારા હોય છે, પરંતુ તેમાં રહેલાં ગુણકારી તત્ત્વો આપણી રોગ પ્રતિકારકશક્તિ, બ્લડ પ્રેશર અને રક્તવાહિનીઓ માટે પણ ફાયદાકારક છે. મોટા ભાગના લોકો મૂળાને સલાડની રીતે ખાવાનું પસંદ કરે છે. આવો, જાણીએ ઠંડીની સિઝનમાં રોજ મૂળા કેમ ખાવા જોઈએ.
બ્લડ પ્રેશર કંટ્રોલ
મૂળા શરીરમાં પોટેશિયમ પહોંચાડે છે, જેનાથી બ્લડ પ્રેશર નિયંત્રિત રહે છે. ખાસ કરીને જો તમારે હાઈપરટેન્શનની સમસ્યા હોય તો ડાયટમાં મૂળા જરૂર સામેલ કરવા જોઈએ. આરોગ્ય નિષ્ણાતોના જણાવ્યાં અનુસાર હાઇ બીપીના લોકો માટે પણ મૂળા ખૂબ જ ફાયદાકારક છે. એન્ટી હાઇપરટેન્સિવ ગુણોથી ભરપૂર મૂળા હાઇ બ્લડ પ્રેશરને કંટ્રોલ કરવામાં મદદ કરે છે. આ ઉપરાંત તેમાં પર્યાપ્ત પ્રમાણમાં પોટેશિયમ હોય છે, જે આપણા શરીરમાં સોડિયમ-પોટેશિયમના ગુણોત્તરનું બેલેન્સ જાળવી રાખે છે, જેનાથી બ્લડ પ્રેશર મેન્ટેન રહે છે.
હૃદયની બીમારીઓ
મૂળાને એન્થોસાયનિનનો સારો સ્રોત માનવામાં આવે છે, તેનાથી આપણું હૃદય સારી રીતે કામ કરે છે. રોજ મૂળા ખાવાથી હૃદયરોગનો ખતરો ઓછો થાય છે. મૂળામાં ફોલિક એસિડ અને ફ્લેવોનોઈડ્સ પણ સારી માત્રામાં મળે છે. મૂળા લોહીમાં ઓક્સિજનના સપ્લાયને વધારે છે.
ફાઈબર
મૂળામાં સારી માત્રામાં ફાઈબર મળે છે. જે લોકો દરરોજ સલાડના રૂપમાં મૂળા ખાય છે તેમના શરીરમાં ફાઈબરની કમી રહેતી નથી. ફાઈબરના કારણે પાચનતંત્ર સારી રીતે કામ કરે છે. આ સિવાય મૂળા લિવરને પણ સુરક્ષિત રાખે છે.
સ્કિન
જો તમારે ચમકતી ત્વચા જોઈએ છે તો દરરોજ મૂળાનું જ્યૂસ પીવું જોઈએ, કારણ કે તેમાં વિટામિન-સી અને ફોસ્ફરસ મળે છે. આ સિવાય રફ સ્કિનથી પણ છુટકારો મળે છે. મૂળાના જ્યૂસને વાળમાં નાખવાથી વાળ ખરવાની સમસ્યામાંથી મુક્તિ મળે છે.
મેટાબોલિઝમ
મૂળા પાચનતંત્ર માટે સારા હોય છે. તે એસિડિટી, સ્થૂળતા, ગેસની સમસ્યા અને ઊબકા જેવી સમસ્યાઓને પણ ઠીક કરવામાં મદદરૂપ થાય છે.
પોષક તત્ત્વો
લાલ મૂળા વિટામિન-ઇ, એ, સી, બી-૬ અને કેથી ભરપૂર હોય છે. આમાં એન્ટી ઓક્સીડન્ટ, ફાઈબર, પોટેશિયમ, ફોસ્ફરસ, મેગ્નેશિયમ, કેલ્શિયમ, આયર્ન સારી માત્રામાં મળે છે. આ તમામ પોષક તત્ત્વો શરીર માટે બહુ ફાયદાકારક છે.
લિવરની પરેશાની દૂર કરશે
જો તમને પેટ ભારે લાગી રહ્યું છે તો તમે મૂળાના રસમાં થોડું મીઠું મિક્સ કરીને પીઓ. તેનાથી તમને ઘણો આરામ મળશે. જે લોકોને લિવર સંબંધિત કોઇ મુશ્કેલી છે. તેમણે પોતાના ડાયટમાં મૂળા સામેલ કરવા જોઇએ. આ તમારા લિવરને સ્વસ્થ રાખે છે.
રક્તવાહિનીઓમાં મજબૂતી
મૂળામાં સારી માત્રામાં કોલેજન મળે છે, જે આપણી રક્તવાહિનીઓને મજબૂત બનાવે છે. આના કારણે એથેરોક્લેરોસિસ જેવી ગંભીર બીમારી થવાની સંભાવના ઘટી જાય છે.
આંખો સારી રહે છે
આંખોની રોશનીને વધારે છે
મૂળામાં ખૂબ વધુ પ્રમાણમાં વિટામિન ‘એ’, ‘બી’, ‘સી’ જેવાં તત્ત્વો મળી આવે છે, જે આપણી આંખોની રોશનીને વધારે છે. રોજ સવારે મૂળા ખાવાથી આંખોની રોશની વધે છે. સવારે ખાવામાં નિયમિત મૂળાને જરૂર ઉમેરો.
દૂર થાય છે ઊંઘ ન આવવાની તકલીફ
આમ તો રાત્રે મૂળા ન ખાવા જોઈએ પણ જો તમે પણ ઊંઘ ન આવવાની તકલીફથી પરેશાન છો તો રોજ સાંજે એક મૂળાનું સેવન કરો. આમ કરવાથી તમને ઊંઘ સારી આવશે. મૂળામાં ખૂબ વધુ પ્રમાણમાં ફાઈબર હોય છે, જેના લીધે પેટ ભરેલું રહે છે અને ઊંઘ સારી આવે છે.
ભૂખ ઉઘડે છે
જો તમને ભૂખ ન લાગવાની તકલીફ છે તો રોજ ખાતા સમયે એક મૂળાને મરી સાથે લગાવીને ખાવાથી ભૂખ સારી લાગે છે. મૂળા ખાવાથી આખા પેટમાં પાચકરસનું નિર્માણ વધી જાય છે અને ખૂલીને ભૂખ લાગે છે.
કિડનીને સ્વસ્થ રાખે છે
પૌષ્ટિક તત્ત્વોથી ભરપૂર મૂળા આપણી કિડનીને સ્વસ્થ રાખવામાં પણ મદદરૂપ થાય છે. મૂળા આપણા શરીરમાંથી ઝેરી પદાર્થોને બહાર કાઢવામાં પણ મદદ કરે છે અને એટલા માટે જ તેને ‘નેચરલ ક્લીન્ઝર’ પણ કહેવામાં આવે છે. તે આપણાં આંતરડાંને સ્વસ્થ રાખવામાં મદદ કરે છે. તેમાં સારા પ્રમાણમાં ફાઇબર મળી આવે છે, જે કબજિયાતના દર્દીઓ માટે રામબાણ ઈલાજ છે.