ક્રાઇમ / લાંબી મૂછો કેમ રાખે છે કહીને વિરમગામમાં 11 શખ્સોએ ભાઈ-બહેનને માર માર્યો, કિરીટ સોલંકીએ વ્યક્ત કર્યો વિરોધ

• લાંબી મૂછો રાખવી અપરાધ છે?
• વિરમગામના કરકથલની છે ઘટના : 11 શખ્સોએ યુવાનને માર્યો માર
• સાંસદ કિરીટ સોલંકીએ ઉઠાવ્યા સવાલ, રાજ્ય સરકારે લખીશ પત્ર- કિરીટ સોલંકી

લાંબી મૂછો રાખવી અપરાધ છે?
ગુજરાતમાં કાયદો વ્યવસ્થા પર સવાલ ઉઠે તેવી વધુ એક ઘટના પ્રકાશમાં આવી છે. વિરમગામમાં લાંબી મૂછ રાખવાના કારણે એક યુવકને માર માર્યો હોવાનો આરોપ કરવામાં આવ્યો છે. કરકથલ ગામમાં ગામના જ 11 શખ્સોએ લાંબી મૂછો કેમ રાખે છે તેમ કહીને યુવક અને તેની બહેનને માર માર્યો. ઘટનામાં તપાસ મામલે પોલીસે દોડધામ શરૂ કરી છે. 

કરકથલ ગામના લોકોએ યુવક અને તેની બહેનને માર માર્યો
સમગ્ર ઘટનામાં ગામના જ 11 લોકો પર આરોપ છે ત્યારે પોલીસે આ ઘટનામાં આરોપીને પકડવા માટે તજવીજ હાથ ધરી છે. વિરમગામ રૂરલ પોલીસ દ્વારા 7 શખ્સોની અટકાયત કરવામાં આવી છે. 

વિરમગામમાં દલિત યુવકને માર મારવાની ઘટના મામલે પડ્યા ઘેરા પડઘા
વિરમગામમાં થયેલી આ ઘટનાના ઘેરા પડઘા રાજકારણમાં પણ પડ્યા છે. ઘટના સામે આવતા દલિત સમાજના નેતા તથા ભાજપના સાંસદ કિરીટ સોલંકીએ ઘટનાની નિંદા કરીને મોટું નિવેદન આપ્યું છે. કિરીટ સોલંકીએ કહ્યું કે એક દલિત યુવાને મૂછો રાખી અને તેના કારણે કેટલાક તત્વો તરફથી તેને માર મારવામાં આવ્યો અને તેનું અપમાન કરવામાં આવ્યું. દલિતો પ્રત્યેની જે માનસિકતાના કારણે આ ઘટનાઑ સામે આવે છે જેની હું નિંદા કરું છું. ભાજપની સરકાર આ મામલે ઝીરો ટોલરન્સ રાખીને કાર્યવાહી કરશે. દરેક લોકોએ આ પ્રકારની માનસિકતામાંથી બહાર આવવું પડશે. સોલંકીએ કહ્યું કે આ બાબતે હું સરકારમાં અને ગૃહવિભાગમાં આ બાબતે રજૂઆત કરવાનો છું. 

નોંધનીય છે કે આ પહેલા ભૂતકાળમાં પણ આ પ્રકારની અનેક ઘટનાઓ ગુજરાતમાં સામે આવી છે છતાં ગુનાહિત લોકોમાં હજુ પણ કાયદાનો ડર હોય તેવું દેખાઈ રહ્યું નથી. સરકાર દ્વારા સબ સલામતના દાવા વચ્ચે સતત અત્યાચારના વધતાં કેસથી અનેક સવાલો ઊભા થાય છે.