વાપી નગરપાલિકાના વોર્ડ નંબર 6 ના લઘુમતી સમાજના 300થી વધુ કાર્યકરોએ ભાજપનો ખેસ ધારણ કર્યો છે.
વાપીમાં 300થી વધુ કાર્યકર્તાઓ ભાજપમાં જોડાયા
લઘુમતી સમાજના કાર્યકર્તાઓ જોડાયા
સી. આર. પાટીલ અને કનુ દેસાઇએ આવકાર્યા
વાપી નગરપાલિકાની આગામી ડિસેમ્બર મહિનામાં ચૂંટણીઓ યોજાઇ રહી છે. ત્યારે ચૂંટણી પહેલાં જ કોંગ્રેસના ગઢમાં ગાબડું પડયું છે આજે વાપી નગરપાલિકાના વોર્ડ નંબર 6 ના લઘુમતી સમાજના 300થી વધુ કાર્યકર્તાઓ ભાજપમાં જોડાયા હતા..
લઘુમતી સમાજના લોકોએ ભાજપનો ખેસ પહેર્યો
ભાજપના પ્રદેશ પ્રમુખ સી આર પાટીલની વાપીની મુલાકાત દરમિયાન વિધાનસભા બેઠકની પેજ કમિટીના સંમેલનમાં સી આર પાટીલ અને રાજ્યના નાણા ઊર્જા અને પેટ્રોકેમિકલ મંત્રી કનુભાઇ દેસાઇ ની હાજરીમાં વાપી નગરપાલિકાના વોર્ડ 6 ના 300 થી વધુ કાર્યકર્તાઓ ભાજપમાં જોડાયા હતા.
સી આર પાટીલ અને કનુભાઇ દેસાઇએ લઘુમતી સમાજના અગ્રણીઓ અને કાર્યકર્તાઓને કેસરી ખેસ પહેરાવી અને ભાજપમાં આવકાર્યા હતા. મહત્વપૂર્ણ છે કે અત્યારે વાપી નગરપાલિકામાં ભાજપનું શાસન છે. ગઈ ચૂંટણીમાં વાપી નગરપાલિકાની 44 માં થી 41 બેઠકો પર ભાજપના ઉમેદવારોનો વિજય થયો હતો..જોકે વોર્ડ નંબર 6 માં લઘુમતી સમાજ ની વસ્તી વધારે હોવા થી એક માત્ર વોર્ડ નંબર 6 માં ભાજપ ના માત્ર 1 ઉમેદવાર જીત્યા હતા ..બાકી ની 3 બેઠકો પર કોંગ્રેસ ના ઉમેદવાર જીત્યા હતા.
વાપી નગરપાલિકાની ચૂંટણીમાં જીત મેળવવા કવાયત
જો કે આ વખતે ડિસેમ્બર મહિનામાં યોજાયી રહેલી વાપી નગરપાલિકાની ચૂંટણીમાં વાપી નગરપાલિકા ની 44 બેઠકોમાંથી તમામ 44 બેઠકો કબજે કરવા માટે ભાજપે અત્યારથી જ રણનીતિ મુજબ તૈયારીઓ શરૂ કરી દીધી છે. અને આજે પાલિકાના વોર્ડ નંબર 6 ના પણ લઘુમતી સમાજના 300થી વધુ કાર્યકર્તાઓ એ કેસરીયો ખેસ ધારણ કરતાં ભાજપની છાવણીમાં ઉત્સાહનો માહોલ જોવા મળ્યો હતો. આજે આ લઘુમતી સમાજના કાર્યકર્તાઓ ભાજપમાં જોડાવા ભવ્ય રેલી સ્વરૂપે કાર્યક્રમ સ્થળ પર પહોંચ્યા હતા.