વલસાડ / વલસાડમાં બુટલેગરોએ જ ખોલી પોતાની પોલ, જાહેર રોડ પર થયું એવું કે પોલીસે કર્યા સીધા જેલભેગા,વીડિયો થયો વાયરલ

• વલસાડમાં બુટલેગરો બન્યા બેફામ
• નશાની હાલતમાં ડિલીવરી બોયને લીધો અડફેટે
• બોક્સમાંથી દારુની બોટલો પડતા ખૂલી પોલ

ગુજરાતમાં દારૂબંધી છે પરંતુ નશાના સૌદાગરો યેનકેન પ્રકારે ગુજરાતમાં દારૂની રેલમછેલ કરતા ખચકાતા નથી. ક્યારેક દૂધની ટેન્કરમાં તો ક્યારેક ટ્રકમાં દારુની હેરાફેરી કરવામાં આવે છે. ત્યારે વલસાડમાં બેફામ બનેલા બુટલેગરોએ જાતે જ પોતાની પોલ ખોલી. નશામાં ચૂર બુટલેગરો મોપડ પર દારૂ લઇને જઇ રહ્યા હતા તે સમયે તેઓએ ડિલીવરી બોયને અડફેટે લેતા રસ્તા પર દારૂની રેલમછેલ જોવા મળી.

ડિલીવરી બોયે બનાવ્યો વીડિયો

વલસાડના તિથલ રોડ પર આવેલા એમ. સ્કવેર મોલ પાસે આ ઘટના બની હતી.  એક ડિલીવરી બોય ત્યાંથી પસાર થઇ રહ્યો હતો તે સમયે મોપેડ લઇને નીકળેલા બુટલેગરોએ ડીલીવરી બોયને અડફેટે લીધો. બોક્સમાં દારૂની બોટલો હોવાની પોલ ખૂલતા બુટલેગરો ઉભી પૂંછડીએ ભાગ્યા. આ સમગ્ર ઘટનાનો ડિલીવરી બોયે વીડિયો ઉતારી લીધો. વીડિયોમાં સ્પષ્ટ જોઇ શકાય છે કે દારૂની બોટલો રસ્તા પર પડી છે.  મોપેડ ચાલક પણ નશાની હાલતમાં છે.

આખરે ઝડપાઇ ગયા બુટલેગરો

જાહેર જગ્યા પર આવી ઘટના બને અને તે પોલીસથી અજાણી રહે ખરા ?  ઘટનાની જાણ થતા જ પોલીસે આ બંને બુટલેગરોને ઝડપી પાડ્યા. તિથલ રોડના થોડા અંતરે જ દારુ સંતાડીને ભાગવા જતા બુટલેગરોને પોલીસે ઝડપી પાડીને વધુ તપાસ હાથ ધરી છે. દારુનો જથ્થો ક્યાંથી લાવ્યા હતા અને કોને પહોંચાડતા હતા તેવા અનેક સવાલોને લઇને પોલીસે બુટલેગરોની અટકાયત કરીને તપાસ હાથ ધરી છે.