વડોદરા / અટલ બ્રિજના કોન્ટ્રાક્ટરોના બિલ રોકવા/ડિપોઝીટ ન આપવા MLAની રજૂઆત, તંત્રની માનીતી રણજીત બિલ્ડકોનું કામ ફરી છાપરે ચડી પોકાર્યું

• રણજીત બિલ્ડકોન વિરુદ્ધ ધારાસભ્યની રજૂઆત
• અટલબ્રિજને લઈને બોલ્યા યોગેશ પટેલ
• "કોન્ટ્રાક્ટરના બિલ અને ડિપોઝીટ રોકી દો"

વડોદરાની સંકલન બેઠકમાં ધારાસભ્ય યોગેશ પટેલે અટલ બ્રિજને લઈ કોન્ટ્રાક્ટરોના બિલ રોકવા અને ડિપોઝીટ ન આપવા રજૂઆત કરી છે. અમદાવાદમાં વિવાદીત હાટકેશ્વર બ્રિજ બનાવનાર રણજીત બિલ્ડકોન કંપનીએ વડોદરાનો અટલબ્રિજ બનાવ્યો છે. 

મહાપાલિકાની સંકલન બેઠકમાં બોલ્યા યોગેશ પટેલ
બ્રિજની ખામીઓ વારંવાર ઉજાગર થતા યોગેશ પટેલે રજૂઆત કરી છે. ધારાસભ્ય યોગેશ પટેલે જણાવ્યુ હતુ કે, ચોમાસા દરમિયાન વધુ ડેમેજ થાય છે કે કેમ તેનો અભ્યાસ કરો. તેમણે વધુમાં ઉમેર્યુ હતુ કે, એવા કોઈ કાયદા ન હોવાથી સજા થાઈ તેવા કાયદા બનાવવમાં આવે .તેમજ વિધાનસભામાં કડક કાયદો બનાવવામાં આવે તો આ વસ્તુ રોકી શકાય છે.

પાંચ જેટલા પોલ તૂટી ગયા હતા
વડોદરા જિલ્લામાં અને શહેર વિસ્તારમાં પણ વહેલી સવારે વાવાઝોડા સાથે ખાબકેલા વરસાદના કારણે અનેક વૃક્ષો ધરાશાયી થયાં હતા, તો બીજી તરફ વડોદરા બહારથી પસાર થતા નેશનલ હાઇવે ઉપર આવેલા દેણા ફ્લાય ઓવર બ્રિજ ઉપર લગાવવામાં આવેલી સોલાર લાઇટના પાંચ જેટલા પોલ તૂટી ગયા હતા, અને લાઇટના પોલ સોલાર પેનલો ઉપર પડતા ભારે નુકસાન થયું છે. 

પાંચ માસમાં જ બ્રિજની સેફ્ટી દિવાલ ધરાશયી !
ખાસ વાત એ છે કે, આ 52 કરોડના ખર્ચે બનેલા આ બ્રિજનું 2 જૂને જ કેન્દ્રીય મંત્રી નીતિન ગડકરીએ લોકાર્પણ કર્યું હતું. બીજી તરફ બ્રિજ બનાવતી કંપનીઓની પોલ પણ પહેલા જ વરસાદે ખોલી નાખી છે. ભારે પવનના કારણે વડોદરા શહેરના સૌથી લાંબા અને પાંચ માસ પહેલાં જ લોકાર્પણ કરાયેલા અટલ બ્રિજની સેફ્ટી દિવાલ ધરાશયી થઇ ગઇ છે

દિવાલના બ્લોક તુટી પડ્યા
5 મહિના પહેલા સેફ્ટી દિવાલ બનાવવામાં આવી હોય અને પહેલા વરસાદમાં જ સેફ્ટી દિવાલના બ્લોક તુટી પડ્યા હોય તો સ્વાભાવિક રીતે બ્રિજ બનાવનારની કામગીરી પર સવાલો ઉઠવાના છે. તેવામાં જોવાનું એ રહેશે કે, આ મુદ્દે આગામી કોઈ પગલાં ભરાય છે કે, પછી સમગ્ર મામલાને લીપાપોતી કરીને દબાવી દેવાય છે.