અમાનૂષી ઘટના / પપ્પા મને મારી ભૂલ સમજાઈ ગઈ છે કહીને કર્યો આપઘાત, 19 વર્ષની કબડ્ડી ખેલાડી સાથે દુષ્કર્મની ભયાનક ઘટના

• વડોદરામાં 19 વર્ષીય વિદ્યાર્થીનીનો આપઘાત 
• વિદ્યાર્થીની પર મિત્રએ જ દુષ્કર્મ આચરતા કર્યો આપઘાત
• લક્ષ્મીપુરામાં ભાડાના મકાનમાં રહેતી હતી વિદ્યાર્થીની 

વડોદરાના લક્ષ્મીપુરામાં રહેતી અને કોલેજમાં અભ્યાસ કરતી સ્ટેટ લેવલ કબડ્ડી પ્લેયર સાથે મિત્રોએ દારૂ પાર્ટી યોજ્યા બાદ દુષ્કર્મ આચરતા ફાંસો લગાવી આપઘાત કરી લીધો છે. આપઘાત પૂર્વે યુવતીએ પોતાની સાથે થયેલા ઘૃણાસ્પદ બનાવને બયાન કરતી ઓડિયો ક્લિપ બનાવી હતી. ઘટનાની ગંભીરતા જોતાં એક્શનમાં આવેલી પોલીસે મોડી રાતે દુષ્કર્મનો ગુનો નોંધ્યો હતો. યુવતી સાથે પાર્ટી કરનાર 19 વર્ષિય દિશાંત ઉર્ફ દિપક કહાર અને 20 વર્ષિય નઝીમ ઇસ્માઇલરહીમ મિરઝાની ધરપકડ કરી કાર્યવાહી હાથ ધરી છે.

પીડિતા વિદ્યાર્થિનીએ પોતાના ઘરે 8 જૂનના રોજ દુપટ્ટાથી સવારે 10.30 કલાકે ફાંસો લગાવી લીધો હતો. લગભગ 12 કલાકે તેના પરિવારજનોને જાણ થતાં ગોત્રી જીએમઇઆરએસ હોસ્પિટલ ખાતે લઇ ગયા હતા. જ્યાં ફરજ પરના તબીબે તેને મૃત જાહેર કરી હતી. શરૂઆતમાં યુવતીના પરિવારે અકસ્માતે મોતનો ગુનો દાખલ કરવા પોલીસને કહ્યું, પણ યુવતી માત્ર 19 વર્ષની હોવાથી પોલીસે યુવતીનું મેડિકલ પરીક્ષણ કરાવવાનો નિર્ણય કર્યો જેમાં યુવતી સાથે દુષ્કર્મ થયું હોવાનો ખુલાસો થયો. જેના આધારે પોલીસે યુવતીના પિતાની પૂછપરછ કરતાં યુવતીના મિત્રોએ જ દારૂની મહેફીલ બાદ દુષ્કર્મ આચર્યું હોવાનો ઘટસ્ફોટ થયો.

મહત્વની વાત છે કે યુવતી ખાનગી કંપનીમાં જોબ કરતી હતી. મંગળવારે સાથી કમર્ચારી અને મિત્ર એવા 2 યુવક અને એક યુવતી સાથે તેની રૂમ પર દારૂ પાર્ટી રાખી હતી. જ્યાં તમામે દારૂનો નશો કર્યા બાદ યુવતીએ ભાન ગુમાવતાં દિશાંત કહાર નામના યુવકે ફાયદો ઉઠાવી તેની પર રેપ કર્યો હતો. સવારે યુવતીને ભાન આવ્યા બાદ દુષ્કર્મ થયું હોવાની ખબર પડી હતી. યુવતીને રાત્રે શું બન્યું એની ખબર પડતાં 2 યુવકો અને યુવતી ભાગી ગયાં હતાં. ડઘાઇ ગયેલી યુવતીએ તેના અન્ય મિત્રને કોલ કરી બનાવ અંગેની જાણ કરતાં મિત્રે તેને પોલીસ ફરિયાદ કરવાની સલાહ આપી હતી. 

આપઘાત પહેલા યુવતીએ એક ઓડિયો રેકોર્ડ કરી હતી

હતાશ યુવતી ધ્રુસકે ધ્રુસકે રડી પડી હતી. બાદમાં યુવતીએ તેના પિતાના ઘરે જઈ આપઘાત કરી લીધો. આપઘાત પહેલા યુવતીએ એક ઓડિયો ક્લિપ બનાવી. જેમાં તેણે ઓડિયોમાં પિતાને સંબોધી કહ્યું કે, પપ્પા મને મારી ભૂલ સમજાઇ ગઇ છે. આઇ લવ યુ પપ્પા. પોલીસે હાલમાં યુવતીના બંને મિત્રોની ધરપકડ કરી તેમની સામે ઇપીકો કલમ 376, 306 અને 114 મુજબ ગુનો નોંધી વધુ કાર્યવાહી હાથ ધરી છે.