કોરોના વાયરસે વિશ્વભરમાં હાહાકાર મચાવ્યો છે, મોટી સંખ્યામાં લોકો આ મહામારીનો શિકાર ન બને તો માટે કેટલાય દેશોએ લોકડાઉનની જાહેરાત કરી છે. કારણ કે, લોકો ઘરની બહાર ન નીકળે. તો આ તરફ લોકોને કારણ વગર બહાર ન નીકળવાની સલાહ આપવામાં આવી છે અને જો કોઇ વ્યક્તિ ભૂલથી પણ છીંક ખાય તો આસપાસના તમામ લોકોમાં ભયનો મહોલ જોવા મળે છે. ત્યારે એક અનોખી ઘટના અમેરિકાના પેન્સિલવેનિયાની સુપર માર્કેટમાં બની હતી.
કોરોનાના કહેર વચ્ચે અમેરિકામાં બની અનોખી ઘટના
મોલમાં ખરીદી કરવા આવેલી મહિલાએ છીંક ખાધી
26 લાખનો સામાન ફેંકી દેવાયો
ઘટના જાણે એમ બની કે, પેન્સિલવેનિયાની એક સુપર માર્કેટમાં એક મહિલાએ છીંક ખાધા બાદ મોલમાં પડેલો તમામ સામાન બહાર ફેંકવામાં આવ્યો હતો. જો કે, બહાર ફેંકવામાં આવેલ સામાનની કિંમત 35 હજાર ડોલર એટલે કે આશરે 26 લાખ રૂપિયા આંકી શકાય.
મહિલાએ છીંક ખાધા બાદ તમામ ચીજ-વસ્તુઓ બહાર ફેંકી દેવાઇ
સુપરમાર્કેટની અંદર કામ કરતા એક કર્મચારીએ જણાવ્યું કે, મહિલા સુપરમાર્કેટમાં પ્રવેશ કરી અને બેકરી ઉત્પાદનોની પાસે આવતાની સાથે જ તેને છીંક આવવા લાગી. માંસ અને કરિયાણા પણ ત્યાં રાખવામાં આવ્યાં હતાં. જો કે, ત્યારબાદ કોરોના વાયરસના ભયને જોતા, સુપરમાર્કેટમાં રાખવામાં આવેલી તમામ ચીજ-વસ્તુઓને ફેંકી દેવામાં આવી હતી.
લોકોને કોઇ ચેપ ન લાગે માટે મોલની તમામ ચીજ-વસ્તુઓ ફેંકી દેવાઇ
સુપરમાર્કેટના કર્મચારીએ વધુમાં જણાવ્યું હતું કે તમામ સામાન એટલા માટે ફેંકી દેવામાં આવ્યો હતો કે જેથી જો મહિલા કોરોના પોઝિટિવ બની જાય તો વધુ લોકોને સામાનને કારણે ચેપ લાગી શકે. મહિલાને છીંક આવ્યા બાદ સ્ટોર માલિકે તાત્કાલિક પોલીસને બોલાવી હતી, ત્યારબાદ તેને કસ્ટડીમાં લેવામાં આવી હતી.
મહિલાની કરવામાં આવી તપાસ
મીડિયા રિપોર્ટ્સના જણાવ્યા અનુસાર, મહિલાએ ઇરાદાપૂર્વક આવું કર્યું હતું. એવું કહેવામાં આવી રહ્યું છે કે તે કોરોના પોઝિટિવ નહોતી. તેમ છતાં, સાવચેતી તરીકે તેની તપાસ કરવામાં આવશે. પોલીસનું કહેવું છે કે મહિલા પર ગુનાહિત કાર્યવાહી કરવામાં આવશે. જો કે, આ ઘટના બાદ, સુપરમાર્કેટને સંપૂર્ણ રીતે સાફ કરવામાં આવી હતી, જેથી જોખમ રહેવાની સંભાવના ન રહે.