હૃદયરોગને પાછળ રાખીને કેન્સર ખૂબ જ જલદી વિશ્વની સૌથી મોટી મહામારી બની રહ્યું છે. લગભગ એક દાયકા સુધી ચાલેલાં બે વૈશ્વિક સર્વેક્ષણ અનુસાર અમીર દેશોમાં કેન્સરના કારણે સૌથી વધુ લોકો પોતાનો જીવ ગુમાવી રહ્યા છે. જો આ ક્રમ ચાલુ રહ્યો તો કેટલાક દાયકામાં કેન્સર દુનિયામાં સૌથી પ્રાણઘાતક રોગ બની જશે.
વયસ્કો અને વૃદ્ધોમાં વધ્યું કેન્સરનું પ્રમાણ
2017માં 26 ટકા મૃત્યુ કેન્સરથી થયા
દુનિયાભરમાં થયેલા મૃત્યુનું બીજું મોટું કારણ કેન્સર
હ્રદયની બિમારીમાં થઈ રહ્યો છે સતત ઘટાડો
હૃદયરોગની સરખામણીમાં બમણા મૃત્યુ કેન્સરના કારણે
દુનિયાભરમાં હજુ પણ વયસ્કો અને વૃદ્ધોમાં સૌથી વધુ મૃત્યુ હૃદય સંબંધિત બિમારીઓથી થાય છે, પરંતુ અમીર દેશોમાં આ આંકડો બદલાઇ રહ્યો છે. આ દેશોમાં હૃદયરોગની સરખામણીમાં બે ગણાં મૃત્યુ કેન્સરના કારણે થાય છે. અભ્યાસમાં સામેલ કેનેડા સ્થિત ક્યુબેક લેવલ યુનિવર્સિટીના ગિલ્સ ડેગાનીસે કહ્યું કે આપણા રિપોર્ટ અનુસાર ર૦૧૭માં દુનિયાભરમાં થયેલાં મૃત્યુનું બીજું પ્રમુખ કારણ કેન્સર હતું.
જાણો બંને રોગને કારણે 2017માં થયેલા મૃત્યુના આંકડા
ર૦૧૭માં લગભગ ર૬ ટકા મૃત્યુ આ ખતરનાક બિમારીથી થયાં હતાં. હૃદયની બિમારીઓની બાબતમાં સતત ઘટાડો થઇ રહ્યો છે. આવનારા કેટલાક દાયકામાં કેન્સર સૌથી મોટી બિમારી બની શકે છે. પ્રોસ્પેક્ટિવ અર્બન રૂરલ એપીડેમિયોલોજી અભ્યાસ હેઠળ કરાયેલા આ સર્વેમાં ભારત, આર્જેન્ટિના, બાંગ્લાદેશ, બ્રાઝિલ, કેનેડા, ચીલી, ચીન, કોલંબિયા, ઇરાન, મલેશિયા, પાકિસ્તાન, સ્વિડન, દક્ષિણ આફ્રિકા, ફિલિપાઇન્સ જેવા દેશોના આંકડાઓનું વિશ્લેષણ કરાયું હતું. વર્ષ ર૦૧૭માં ૧.૭૭ કરોડ લોકોએ હૃદયરોગના હુમલાથી જીવ ગુમાવ્યો હતો. હૃદયરોગ અને તેનાથી થતાં મૃત્યુમાં ૭૦ ટકા મૃત્યુનું કારણ હાઇ બ્લડપ્રેશર, હાઇ કોલેસ્ટ્રોરોલ, ખાણી-પીણી અને ધૂમ્રપાન છે. અમીર દેશોમાં કોલેસ્ટ્રોલને નિયંત્રિત કરનાર ઉપચાર અને હાઇ બ્લડપ્રેશરની દવાના કારણે હૃદયરોગને હરાવવાનું શક્ય બન્યું છે, પરંતુ તેની સામે છેલ્લા કેટલાક દાયકામાં કેન્સર પ્રાણઘાતક બિમારી બનીને સામે આવ્યું છે.