શર્મનાક / અમદાવાદના આ વિસ્તારમાં બાંગ્લાદેશી મહિલાઓને ગેરકાયદે ભારત લાવી ચાલતો દેહવ્યાપારનો ધંધો ઝડપાયો

• બાંગ્લાદેશથી ગેરકાયદે મહિલાઓ ઘૂસાડતો શખ્સ 
• અમદાવાદમાં દેહવ્યાપાર કરાવતો મહિલાઓ પાસે 
• SOG ક્રાઈમએ શખ્સને વસ્ત્રાલથી ઝડપી લીધો 

બાંગ્લાદેશી મહિલાઓને ગેરકાયદેસર રીતે ભારતમાં લાવી અમદાવાદ શહેરમાં દેહવેપાર કરાવનાર શખ્સની પોલીસે ધરપકડ કરી છે..અગાઉ ભારતમાં ગેરકાયદેસર રીતે આવેલા શખ્સને SOG ક્રાઇમે પરત બાંગ્લાદેશ મોકલ્યો હતો પરંતુ માત્ર 10-12 દિવસમાં જ આરોપી ભારત પરત આવી મહિલાઓ પાસે દેહ વિક્રેય કરાવતો હતો. કોણ છે આ આરોપી અને કઈ રીતે મહિલાની કરતો તસ્કરી.

વસ્ત્રાલથી ઝડપાયો 

અમદાવાદ શહેર SOGક્રાઈમની ગિરફતમાં આવ્યો છે મિલ્ટન શેખ. પકડાયેલો આરોપી અગાઉ ગેરકાયદે રીતે 2016 માં ભારતમાં ઘૂસણખોરી કરીને આવ્યો હતો જે ગુનામાં તેને SOG ક્રાઈમે ઝડપી બાંગ્લાદેશ ડિપોટ કર્યો હતો. પરંતુ થોડા જ દિવસોમાં આરોપી પરત ભારત આવી ગયો અને બાંગલાદેશમાંથી મહિલાઓને ગેરકાયદેસર રીતે ભારત લાવી તેઓની મરજી વિરુદ્ધ દેહવેપાર કરાવતો હતો. માનવ તસ્કરી મામલે તપાસ કરી રહેલી SOG ક્રાઈમને ગેરકાયદે ભારતમાં ઘૂસણખોરી કરીને રહેતા બાંગ્લાદેશી નાગરિકની બાતમી મળતા જ વસ્ત્રાલથી તેને ઝડપી લીધો છે.

3 બાંગ્લાદેશી મહિલાઓ પણ મળી

SOG ક્રાઇમે વસ્ત્રાલના સત્યમ આવાસ યોજનામાં રેડ કરતા આરોપી મિલ્ટન શેખ સાથે 3 બાંગ્લાદેશી મહિલાઓ પણ મળી આવી હતી. તેઓની પૂછપરછ કરતા સામે આવ્યું કે એક સપ્તાહ પહેલા જ મિલ્ટન શેખ આ મહિલાઓને ભારતમાં રોજગારી અપાવવાની લાલચ આપીને લાવ્યો હતો અને અહીંયા લાવી દેહવેપારના ધંધામાં જબરદસ્તી મોકલતો હતો. જેથી SOG ક્રાઈમે મહિલાઓને આરોપીના ચુંગાલમાંથી છોડાવી હતી.અને વધુ તપાસ શરૂ કરી છે.

તપાસ ચાલુ 
મહત્વનું છે પશ્ચિમ બંગાળના રસ્તે ભારતમાં ઘૂસણખોરી સતત વધી રહી છે તેવામાં આ ગુનામાં પકડાયેલો આરોપી 2016 થી ભારતમાં હતો ત્યારે અન્ય કોઈ બાંગ્લાદેશી મહિલાઓને તસ્કરી કરીને ભારતમાં લાવ્યો છે કે કેમ અને તેની સાથે આ ગુનામાં અન્ય કોણ કોણ સામેલ છે તે દિશામાં તપાસ શરૂ કરી છે...