નવા વર્ષની શરૂઆત થવામાં હવે અમુક કલાકો જ બાકી છે. ત્યારે નવા વર્ષમાં તમારા બજેટને અસર કરે એવા કયા-કયા ફેરફાર થવાના છે, તે અંગે દરેક વ્યક્તિએ જાણવું હોય છે. તો તમને જણાવી દઈએ કે, નવા વર્ષમાં રોજિંદા જીવનથી જોડાયેલી વસ્તુઓ મોંઘી થવાની છે. ચાલો જાણીએ કઈ-કઈ વસ્તુઓ નવા વર્ષમાં તમારું બજેટ બગાડશે.
વર્ષ 2020માં મોંઘી થશે આ વસ્તુઓ
સામાન્ય વ્યક્તિના બજેટ પર વધશે ભાર
રોજિંદા વપરાશની વસ્તુઓ થશે મોંઘી
ફ્રીઝ-એસી થશે મોંઘા
નવા વર્ષમાં 5 સ્ટાર ફ્રીઝ અને એસીની કિંમતોમાં વધારો થવાનો છે. હકીકતમાં વર્ષ 2020માં ન્યૂ એનર્જી લેવલિંગ નોર્મ્સ લાગુ થવાના છે. જેના કારણે ઈલેક્ટ્રોનિક ઉત્પાદકોએ ફાઈવ સ્ટાર ફ્રીઝ અને એસીની કૂલિંગ માટે પારંપરિક ફોમની જગ્યાએ વેક્યૂમ પેનલનો ઉપયોગ કરવો પડશે. આ નવા નોર્મ્સને કારણે ફાઈવ સ્ટાર ફ્રીઝ અને એસી લગભગ 6000 રૂપિયા સુધી મોંઘા થવાની સંભાવના છે.
ટ્રેનમાં મુસાફરી કરવી મોંઘી થશે
નવા વર્ષમાં ટ્રેનમાં મુસાફરી મોંઘી થઈ શકે છે. રેલ્વે બોર્ડના અધ્યક્ષ વી.કે. યાદવે સંકેત આપ્યા છે કે, રેલ્વે બોર્ડ વર્તમાન પરિસ્થિતિ અનુસાર મુસાફરો અને માલ-સામાન ભાડાને તર્કસંગત બનાવશે. વી.કે. યાદવના કહેવા પ્રમાણે, જ્યાં ભાડુ ઓછું છે, તેમાં વધારો કરવામાં આવશે અને જ્યાં ભાડુ વધારે છે, ત્યાં ઘટાડો કરવામાં આવશે. તેમણે કહ્યું કે, ઘણાં દિવસોથી મુસાફરોના ભાડામાં કોઈ વધારો કરવામાં આવ્યો નથી, જ્યારે રેલ્વેના ખર્ચમાં વધારો થઈ રહ્યો છે.
પેટ્રોલ અને ડીઝલ પર પ્રીમિયમ
નવા વર્ષમાં, સામાન્ય લોકોને પેટ્રોલ અને ડીઝલ પર પ્રીમિયમ ચૂકવવું પડી શકે છે. હકીકતમાં, ઓઇલ માર્કેટિંગ કંપનીઓએ પેટ્રોલિયમ મંત્રાલયને વાહન ઇંધણના ભાવમાં વધારો કરવા 'પ્રીમિયમ યોજના'ને સમર્થન આપવા અપીલ કરી છે. અહેવાલ છે કે, સરકાર આ માંગ અંગે વિચારણા કરી રહી છે. જો સરકાર આ દરખાસ્તને સ્વીકારી લે તો ગ્રાહકોએ પેટ્રોલ અને ડીઝલના છૂટક ભાવ પર આશરે 80 પૈસા અને લિટર દીઠ 1.50 રૂપિયા આવતા 5 વર્ષ માટે ચૂકવવા પડશે. ઉલ્લેખનીય છે કે ઓઈલ કંપનીઓ દરરોજ પેટ્રોલ અને ડીઝલની કિંમતમાં ઘટાડો અથવા વધારો કરે છે.
બિસ્કિટ-નાસ્તા થશે મોંઘા
નવા વર્ષમાં પારલે અને આઈટીસી જેવી એફએમસીજી કંપનીઓ તેમના ઉત્પાદનોના ભાવમાં વધારો કરી શકે છે અથવા વસ્તઓના પેકેટ્સ બદલી શકે છે. થોડાં મહિના પહેલાં જ એફએમસીજી કંપનીઓએ આ સંદર્ભે સંકેત આપ્યો હતો. કહેવાનો અર્થ એ છે કે, નવા વર્ષમાં નાસ્તા, ફ્રોઝન ફૂડ, કેક, સાબુ, મીટ, બિસ્કિટ, રેડી ટૂ ઈટ મીલ્સ અને અન્ય ખાદ્ય વસ્તુઓ મોંઘી થઈ શકે છે.
બાઈક થશે મોંઘી
નવા વર્ષમાં મોટાભાગની કંપનીઓ કાર અને બાઈકની કિંમતોમાં વધારો કરવાની છે. એટલે કે, વર્ષ 2020માં કાર કે બાઈક ખરીદવાનું વિચારી રહ્યા છો તો તમારા ખિસ્સા પર ભાર વધી શકે છે.
વીમા પોલિસી થશે મોંઘી
વીમા કંપનીઓને રેગ્યુલેટ કરનાર સંસ્થા ઈરડાના આદેશ મુજબ, નવા વર્ષમાં જીવન વીમા પોલિસીના નિયમોમાં ફેરફાર થવાનો છે. આ ફેરફાર માત્ર લિંક્ડ, નોન લિંક્ડ જીવન વીમા પોલિસીમાં થશે. નવા નિયમ લાગુ થવાથી પ્રીમિયમ મોંઘુ થશે અને ગેરંટીડ રિટર્નમાં પણ ઘટાડો થવાની શક્યતા છે.