ચીનની અગ્રણી રસી ઉત્પાદક કંપની ચાઇના નેશનલ ફાર્માસ્યુટિકલ ગ્રુપ (સિનોફાર્મ) એ બુધવારે જણાવ્યું હતું કે તેણે દેશની મેડિકલ રેગ્યુલેટરી બોડીને બજારમાં રસી ઉતારવાની અનુમતિ આપવા અરજી કરી છે. ચીની સ્ટેટ મીડિયા અનુસાર આ જાહેરાત કંપનીના જનરલ મેનેજર શી શેંગીએ કરી હતી.
ચીનની વેક્સિન આવી શકે છે બજારમાં
ચીની કંપનીનો દાવો,"અમે વેચાણની મંજૂરી માંગી છે"
અમેરિકી કંપનીઓએ ઇમરજન્સી ઉપયોગની માંગી છે મંજૂરી
જાણકારી પ્રમાણે વિદેશમાં ક્લિનિકલ ટ્રાયલ કરતી કંપનીએ કહ્યું કે તેણે UAE જેવા દેશોનો ડેટા એકત્રિત કર્યો છે. કંપનીએ કહ્યું છે કે તેને સારા પરિણામની અપેક્ષા છે, પરંતુ સમીક્ષાના ધોરણોને કડક રાખવામાં આવતા હોવાથી આખરી નિર્ણય ચીની સત્તાધીશો પર છે.
કંપનીએ કહ્યું,"અમે ઓથોરિટીને ડેટા સબમિટ કર્યો છે"
આ અગાઉ, કંપનીએ કહ્યું હતું કે તેણે ચીનના સ્ટેટ ફૂડ એન્ડ ડ્રગ એડમિનિસ્ટ્રેશનને રસીના ત્રીજા તબકકાનો ક્લિનિકલ ડેટા સબમિટ કર્યો છે અને વધુ માહિતી આપવાની તૈયારીમાં છે. કંપનીએ જણાવ્યું હતું કે બજારમાં વેચાણ માટેની અનુમતિ પહેલા તે હાલમાં ટ્રાયલના અંતિમ ચરણમાં છે અને પહેલા મંજૂરી મેળવવી એ તેની પ્રાથમિકતા છે.
જો આ મંજૂરી આપવામાં આવે તો, રશિયા પછી સિનોફાર્મ પ્રથમ કંપની હશે, જેની રસી બજારમાં આવી શકે છે. હાલ ચીન ની આ મૂવમેન્ટ તેની વેક્સિનને વિશ્વવ્યાપી ધોરણે વેચાણ કરવાના પ્રયાસ તરીકે જોવામાં આવે છે જેનાથી તેને બજારમાં વહેલા આવી જવાનો ફાયદો મળે, તેની સામેની બાજુએ ફાઈઝર ઇન્ક જેવી અમેરિકી કંપનીઓએ હાલમાં ફક્ત તાત્કાલિક ઉપયોગ માટે મંજૂરી માંગી છે, જે ચીન જુલાઇમાં જ તેની વેક્સિન કંપનીઓને આપી ચૂક્યું છે.
"પાંચ રસીના ટ્રાયલ હાલમાં શરૂ છે": ચીની વિદેશ મંત્રાલય
ચીનના વિદેશ મંત્રાલયના પ્રવક્તા ઝાઓ લિજિયાને ગયા અઠવાડિયે એક પત્રકાર પરિષદમાં જણાવ્યું હતું કે, પાંચ ચીની રસી કેન્ડીડેટની હાલમાં ક્લિનિકલ ટ્રાયલ ચાલુ છે. યુએઈ, બ્રાઝિલ, પાકિસ્તાન અને પેરુ જેવા દેશોમાં તેમની ટ્રાયલ ચાલી રહી છે. સ્ટેજ 1 અને 2 ના ટ્રાયલમાં ગતિ રખવામાં આવી છે. સિનોફાર્મે ગયા અઠવાડિયે કહ્યું હતું કે ઇમરજન્સી યુઝ પ્રોગ્રામ હેઠળ ઓછામાં ઓછા 1 મિલિયન લોકોને રસી આપવામાં આવી હતી.
ચીને જુલાઈમાં ત્રણ વેક્સિનને ઇમરજન્સી ઉપયોગ અંગેની મંજૂરી આપી હતી. આ રસી આવશ્યક સેવાઓ સાથે સંકળાયેલા લોકોને આપવામાં આવી હતી. જો કે, નિષ્ણાતોએ આ પગલા પર સવાલ ઉઠાવ્યા છે, કારણ કે તેમની સલામતી અને અસરકારકતા જોવા માટે હજુ ક્લિનિકલ ટ્રાયલ ચાલી રહી છે.