સાવચેતી / ACમાં ધડાકા સાથે થઈ શકે છે મોટું નુકસાન! ઉનાળામાં ક્યારેય પણ ન કરવી જોઈએ આ 3 ભૂલ

• એસીની ઝીંદગી વધારવા સમયાંતરે આટલું કરવું
• સર્વિસ ન કરવા પર એસીમાં થઈ શકે છે મોટું નુકસાન
• આ 3 બાબતોનું ધ્યાન રાખવાં આવે તો એસી ચાલશે લાંબો સમય

ઉનાળાની તોબા પોકારતી ગરમીના પ્રારંભની સાથે જ એસી, પંખા, કુલર સહિતની વસ્તુઓના વપરાશમાં વધારો આવતો હોય છે. આવી સ્થિતિ વચ્ચે અમુક સામાન્ય બાબતોનું ધ્યાન ન રાખવામાં આવે તો એસી પંખામાં નુકસાન પણ થતું હોય છે ત્યારે ઉનાળાની ઋતુના પ્રારંભની સાથે એસી ચલાવતા પહેલા સંપૂર્ણ ચેકિંગ કરી લેવું જરૂરી છે. ખાસ કરીને ગેસની તપાસ કરવી જોઈએ ઘણી વખત એવું બને છે કે ગેસ વગર એસીનો ઉપયોગ કરવામાં આવે છે. પરિણામે શરૂઆતમાં એસીને વધુ નુકસાન આવતું નથી. પરંતુ લાંબા ગાળે ગેસ વગર વપરાશને પગલે એસી કાયમી માટે બંધ થઈ શકવાની સંભાવના રહે છે. સમયાંતરે જો સર્વિસ કરવામાં ન આવે તો એસીમા ધડાકા સાથે ભારે નુકસાન પણ થઈ શકે છે.

કુલિંગ કોયલને સંપૂર્ણપણે સાફ રાખે

શરૂઆતના સમયગાળા દરમિયાન એસીની ફૂલ સર્વિસ કરાવી લેવી હિતાવહ છે. કારણ કે સર્વિસ કરાવ્યા વગર જ એસીનો ઉપયોગ કરવામાં આવે તો તે બગડી જવાની શક્યતાઓ વધે શકે છે. ઉપરાંત એસીની ઠંડક ઉપર પણ પ્રતિકૂળ અસર પડે છે. જેને પગલે સર્વિસ સાથે એસીનું કમ્પ્રેસર પણ ચેકિંગ કરાવી લેવું જોઈએ. સર્વિસ કરવાનો સૌથી મોટો ફાયદો એ છે કે કુલિંગ કોયલને સંપૂર્ણપણે સાફ રાખે છે આથી ઠંડકમાં વધારો થાય છે.

એસીનું ફિલ્ટર સમયાંતરે સાફ-સફાઈ કરવી જોઈએ

એસીમા કુલિંગ કોયલની આગળના ભાગે એર ફિલ્ટર લગાવવામાં આવે છે. આવી સ્થિતિમાં એર ફિલ્ટરને સાફ રાખવું ખૂબ જરૂરી હોય છે કારણ કે તેની જવાબદારી મહત્વપૂર્ણ હોય છે. સ્વચ્છ ફિલ્ટર રાખવાથી એસીની ઠંડક તો વધે જ છે સાથે સાથે સમયાંતરે એસી પર ખર્ચા કરવાની જરૂર રહેતી નથી. જો એસીનું ફિલ્ટર સાફ કરવામાં આવે તો એસી ભાગ્ય જ ખરાબ થાય છે આથી એસીનું ફિલ્ટર સમયાંતરે સાફ-સફાઈ કરવી જોઈએ.