સંકટ / પંજાબ સરકાર પર સંકટ, પૂર્વ પાર્ટી અધ્યક્ષે કરી આ માંગણી

• કોંગ્રેસમાં કમઠાણ, રાજસ્થાન બાદ હવે પંજાબમાં પણ ભંગાણ 
• પૂર્વ પ્રદેશ અધ્યક્ષ બાજવાએ કરી મુખ્યમંત્રીને હટાવવાની માંગણી 
• ઝેરી દારૂથી ૧૧૩ના મોતના મામલે કરી હતી પોતાની સરકારની ટીકા 

રાજસ્થાનમાં કોંગ્રેસ સરકાર પર સંકટના સમાચારોની શાહી હજી સુકાઈ નથી ત્યારે પંજાબમાં કેપ્ટન અમરિન્દર સિંઘના વડપણ વાળી સરકાર પર સંકટના વાદળો ઘેરાઈ રહ્યાં હોવાનું લાગી રહ્યું છે. આ મામલે પંજાબના પૂર્વ પાર્ટી પ્રમુખ પ્રતાપ બાજવાએ એક મોટું નિવેદન આપ્યું હતું જેમાં તેમણે જણાવ્યું હતું કે,'' જો પંજાબમાં કોંગ્રેસને પોતાનું અસ્તિત્વ બચાવવું હોય તો અમરિંદર સિંઘ અને સુનીલ જાખડ પાસેથી રાજીનામુ લઈ લેવું જોઈએ.'' ઉલ્લેખનીય છે કે બાજવા હાલમાં રાજ્યસભામાં સાંસદ છે.

શું છે મામલો?

પંજાબમાં હાલમાં જ કોંગ્રેસના બે રાજ્યસભા સાંસદોએ પોતાની જ સરકાર વિરુદ્ધ મોરચો ખોલ્યો હતો. ઉલ્લેખનીય છે કે હમણાં પંજાબમાં ઝેરીલી દારૂ પીવાના લીધે કુલ ૧૧૩ જેટલા લોકોના મોત નિપજ્યા હતાં. જે બાદ પંજાબના બે રાજ્યસભા સાંસદો પ્રતાપસિંઘ બાજવા અને શમશેરસિંઘ ધુલોએ પોતાની જ સરકાર પર આક્ષેપો કર્યા હતાં. જેમાં બાજવાએ જણાવ્યું હતું કે અમે લોકો રાજ્યમાં નશાનું દુષણ ખતમ કરવાના વાયદા સાથે સત્તા પર આવેલા અને આ અમે શું કરી રહ્યાં છીએ? આ બાબતે અમે આલાકમાન સાથે વાતચીત કરી છે પણ હજી સુધી કઈ પણ નિર્ણય લેવામાં આવ્યો નથી. જે બાદ તેમણે કેપ્ટન અને જાખડને હટાવવાની માગણીની પણ વાત કરી હતી.

પંજાબ કેબિનેટ કરી ચુકી છે બયાન જાહેર 

 આ મામલે જો કે પંજાબની કેબીનેટના બધા પ્રધાનો એક સાથે આવી ગયા હતા અને આક્ષેપ કરનાર બંને સાંસદોને પાર્ટીમાંથી હાંકી કાઢવા માટેની માંગણી પણ આલાકમાન પાસેથી કરી હતી. આ મામલે એવી જાણકારી મળી રહી છે કે હાલના પ્રદેશ પ્રમુખ સુનીલ જાખડ આ મુદ્દે ચિંતિત છે અને પંજાબમાં પ્રતાપસિંઘ બાજવા કોંગ્રેસ માટે નવા સચિન પાયલોટ ન બને તે માટેની ગોઠવણ કરી રહ્યાં છે.કોંગ્રેસે જો કે એવો આક્ષેપ પણ કર્યો હતો કે ભાજપ તેના સાથી પક્ષ શિરોમણી અકાલી દલ સાથે મળીને વર્તમાન કોંગ્રેસ સરકારને ઉથલાવવાનું ષડ્યંત્ર રચી રહી છે. જો કે નોંધનીય છે કે  શિરોમણી અકાલી દલના અધ્યક્ષ સુખબીર બાદલ પહેલા જ પંજાબના રાજ્યપાલને મળીને વર્તમાન કોંગ્રેસ સરકારને બરખાસ્ત કરવાની માંગણી કરી ચુક્યા છે.